Иран вә Азәрбајҹан Республикасы ХИН рәһбәрләри телефонла данышыблар

АБНА24 Хәбәр Верир,Хариҹи Ишләр Назирлијинин (ХИН) Мәтбуат хидмәти идарәсиндән АПА-ја верилән хәбәрә ҝөрә, назирләр, ики өлкә арасындакы мүнасибәтләрин мүхтәлиф аспектләринин инкишафындан мәмнунлуг ифадә едибләр.

Сон һәфтә әрзиндә Иранын јол вә шәһәрсалма назири Рүстәм Гасиминин Азәрбајҹана сәфәринин нәтиҹәләри вә әлдә олунмуш разылыглар, һабелә Азәрбајҹан мүдафиә назири Закир Һәсәновун Ирана сәфәри вә бу чәрчивәдә кечирилмиш ҝөрүшләр ики өлкә арасындакы әлагәләрин инкишафынын бариз ҝөстәриҹиси кими вурғуланыб.

Тәрәфләр, о ҹүмләдән бирҝә лајиһәләрин һәјата кечирилмәсини, Астарачај үзәриндә тәмәли гојулмуш јени көрпүнүн, еләҹә дә Иран Астарасында дәмир јолу јүк терминалынын тикинтисинин 2022-ҹи илдә тамамланмасынын һәдәфләнмәсинин икитәрәфли әлагәләрин инкишафына мүсбәт тәсир едәҹәјини гејд едибләр.

Азәрбајҹан Республикасы илә Иран Ислам Республикасы арасында игтисади, тиҹарәт вә һуманитар саһәләрдә әмәкдашлыг үзрә Дөвләт Комиссијасынын нөвбәти иҹласынын бу илин март ајында Бакыда кечирилмәсинин планлашдырылдығы мәмнунлугла билдирилиб.

Назирләр, Азәрбајҹанын азад олунмуш торпагларында Иран ширкәтләринин јахын заманларда конкрет лајиһәләрлә ишә башлајаҹағыны вурғулајыб вә бунунла әлагәдар фикир мүбадиләси апарыблар.

Тәрәфләр, һәмчинин гаршылыглы мараг доғуран диҝәр реҝионал мәсәләләри мүзакирә едибләр

Телефон данышығы заманы Иранын Хариҹи Ишләр Назири Һүсејн Әмир Әбдуллаһијан Азәрбајҹан Республикасында мәһбус иранлылардан бир групунун Ирана көчүрүлмәси илә бағлы рәсми Бакынын тәшәббүсүнү алгышлајыб. Һүсејн Әмир Абдуллаһиан ики өлкә арасындакы әлагәләрин јүксәк сәвијјәдә олдуғуну хатырладараг ики өлкә вәтәндашларынын хүсусијлә дә тәләбәләр вә иш адамларынын ҝедиш-ҝәлишинин асанлашдырылмасына чағырыб.

Данышыг заманы Азәрбајҹан Республикасынын ХИН рәһбәри Ҹејһун Бајрамов иранлы һәмкарынын рәсми дәвәтинә ҝөрә өз тәшәккүрүнү билдирәрәк јахын ҝәләҹәкдә Ирана сәфәринин реаллашаҹағына үмидварлығыны билдириб.



342/