Әһли-Бејт (әлејһимус сәлам) – Хәбәр Аҝентлији АБНА-нын вердији мәлумата әсасән, Азәрбајҹан хариҹи ишләр назири Ҹејһун Бајрамовун Иран Ислам Республикасынын хариҹи ишләр назири Һүсејн Әмир Абдуллаһиан илә телефон данышығы баш тутуб.
Бу барәдә Азәрбајҹан Хариҹи Ишләр Назирлији мәлумат јајыб.
Назирләр ики өлкә арасындакы мүнасибәтләрин мүхтәлиф аспектләринин инкишафындан мәмнунлуг ифадә едибләр.
Сон һәфтә әрзиндә Иранын јол вә шәһәрсалма назири Рүстәм Гасиминин Азәрбајҹана сәфәринин нәтиҹәләри вә әлдә олунмуш разылыглар, һабелә Азәрбајҹанын мүдафиә назири Закир Һәсәновун Ирана сәфәри вә бу чәрчивәдә кечирилмиш ҝөрүшләр ики өлкә арасындакы әлагәләрин инкишафынын бариз ҝөстәриҹиси кими вурғуланыб.
Тәрәфләр, о ҹүмләдән бирҝә лајиһәләрин һәјата кечирилмәсини, Астарачај үзәриндә тәмәли гојулмуш јени көрпүнүн, еләҹә дә Иран Астарасында дәмир јолу јүк терминалынын тикинтисинин 2022-ҹи илдә тамамланмасынын һәдәфләнмәсинин икитәрәфли әлагәләрин инкишафына мүсбәт тәсир едәҹәјини гејд едибләр.
Азәрбајҹан-Иран арасында игтисади, тиҹарәт вә һуманитар саһәләрдә әмәкдашлыг үзрә Дөвләт Комиссијасынын нөвбәти иҹласынын бу илин март ајында Бакыда кечирилмәсинин планлашдырылдығы мәмнунлугла билдирилиб.
Назирләр Азәрбајҹанын азад олунмуш торпагларында Иран ширкәтләринин јахын заманларда конкрет лајиһәләрлә ишә башлајаҹағыны вурғулајыб вә бунунла әлагәдар фикир мүбадиләси апарыблар.
Тәрәфләр, һәмчинин гаршылыглы мараг доғуран диҝәр реҝионал мәсәләләри мүзакирә едибләр.
Диггәт: Хәбәрдән Истифадә Етдикдә Мәнбәјә Истинад Лазымдыр!
