Блинкен: КТМТ-сиз дә проблемләри һәлл етмәк оларды

АБНА24 Хәбәр Верир, АБШ дөвләт катиби Ентони Блинкен бәјан едиб ки, Газахыстан һакимијјәти Коллектив Тәһлүкәсизлик Мүгавиләси Тәшкилатынын (КТМТ) иштиракы олмадан тәкбашына иғтишашлара гаршы мүбаризә апармаға гадирдир.

О дејиб: "Бизим Газахыстанын тәҹили јардым үчүн мүраҹиәтинин маһијјәти, нә үчүн ирәли сүрүлмәси илә бағлы суалларымыз вар, бунунла бағлы даһа әтрафлы мәлумат алмаға чалышырыг. Сөзсүз ки Газахыстан һакимијјәтинин вә һөкумәтинин етиразларла бағлы вәзијјәти дүзҝүн һәлл етмәк, асајиши горумаг, етиразчыларын һүгугларына һөрмәтлә јанашмаг потенсиалы вар. Одур ки, Газахыстан лидерләринин һансы сәбәбдән кәнар јардыма еһтијаҹ дујдуглары ајдын дејил. Тарихдән бир дәрс: руслар евиниздә оланда онлары чыхыб ҝетмәјә мәҹбур етмәк чәтин олур", - дејә Блинкен вурғулајыб.

АБШ дөвләт катибинин иттиһамына Русијанын ҹавабы чох ҝеҹикмәјиб. Русија Хариҹи Ишләр Назирлији АБШ Дөвләт катиби Ентони Блинкенин фикирләринә мүнасибәт олараг өз ачыгламасында Блинкенин Газахыстандакы һадисәләрлә бағлы кобуд формада зарафат етдијини вурғулајыб.

“Блинкен тарих дәрсләрини чох севирсә, бунлары билмәлидир: Америкалылар киминсә евинә ҝәләндә һәјатда галмаг, сојғуна уғрамамаг чәтин олур. Јахын кечмиш дејил, АБШ-ын 300 иллик тарихи бизә дәрс верир. Шимали Америка гитәсиндәки һиндулар, корејалылар, вјетнамлылар, ираглылар, панамалылар, југославлар, ливијалылар, суријалылар вә бу чағырылмамыш гонаглары өз евләриндә ҝөрән диҝәр бәдбәхт инсанлар бу барәдә чох шеј даныша биләрләр”, - дејә ачыгламада гејд олунур

Гејд едәк ки, газ гијмәтләринин артымына әһалинин кәскин етиразлары сәбәбиндән Газахыстанын бир нечә шәһәр вә вилајәтиндә фөвгәладә вәзијјәт режими елан едилиб. Газахыстан Президенти Касым-Жомарт Токајев бу барәдә фәрман имзалајыб.

Һәмчинин, Газахыстан президенти әһалијә мүраҹиәт едәрәк Газахыстан Тәһлүкәсизлик Шурасына өзүнүн башчылыг едәҹәјини дејиб. Бунунла да Токајев 1995-ҹи илдән бу вәзифәни иҹра едән өлкәнин илк президенти Нурсултан Назарбајеви ишиндән кәнарлашдырыб.

Јанварын 5-дә Газахыстан президенти Касым-Жомарт Токајевин сәдрлији илә Тәһлүкәсизлик Шурасынын иҹласы кечирилиб. Токајев иҹласда өлкәдәки ҝәрҝин вәзијјәтлә бағлы КТМТ тәрәфдашларындан һәрби јардым истәјәҹәјини ачыглајыб. Онун КТМТ-јә мүраҹиәтинә чевик реаксија верилиб.

342/