Һәрәкат Әфганыстанда үмуми сечкиләрин кечириләҹәјини вәд етди

АБНА24 Хәбәр Верир, Талибан һәрәкаты тәшкил едилән һөкумәтин мүвәггәти олдуғуну, сечкиләрин кечириләҹәји вә һөкумәтдә гадынлара јер вериләҹәји вәдини вериб.

Талибан һәрәкатынын сөзчүсү Зәбиһуллаһ Мүҹаһид Әлҹәзирә телеканалына мүсаһибәсиндә өлкәдә сечкиләрин кечириләҹәјини вә бүтүн әфганларын иштирак едәҹәјини билдириб.

Мүҹаһид Талибанын јени һөкумәтә һәрәкатын хариҹиндән баҹарыглы Әфган сималарыны ҹәлб етмәјә чалышдығыны иддиа едиб.

Талибан сөзчүсү дејиб: "Бу мүвәггәти бир һөкумәтдир вә гадынларын шәриәт ганунларына ујғун олараг вәзифәләри вә постлары олаҹаг. Бу, илк мәрһәләдир, гадынларын активлији вә варлығы үчүн зәмин јарадырыг, онлар һөкумәтә дахил ола биләрләр. Бу икинҹи мәрһәләдә олаҹаг.”

Дүнја иҹтимаијјәти Талибаны иттиһам едир ки, өлкәдә "инклүзив һөкумәт" гураҹағына даир вәдинә әмәл етмәмишдир.

Гејд едәк ки, Иран Ислам Республикасы да дахил олмагла дүнјанын апарыҹы дөвләтләри Әфганыстанда јени һөкумәтин сырф талибанчылардан тәшкил олунмасындан мәјуслугларыны ифадә етмишләр. Хүсусилә дә һөкумәтдә адлары терроризмдә иттиһам олунан дөрд назир тәмсил олунур.

Онлардан бири Молла Сираҹәддин Һәгганидир ки, Дахили Ишләр Назирлији бу шәхсә тапшырылыб. Һәггани террорчулугда иттиһам олунараг АБШ тәрәфиндән ахтарышдадыр вә һәбси үчүн беш милјон доллар мүкафат тәјин едилиб. Дүнән АБШ Федерал Тәһгигат Бүросу мүкафатын мәбләғини 10 милјон доллара артырыбдыр.

Талибан бүтүн тәнгидләри гулагардына вурараг дүнја иҹтимаијјәтини инандырмаға чалышыр ки, елан едилмиш һөкумәт мүвәггәтидир вә даһа ҹидди аддымлар атылаҹаг. Һәләлик Чин, Сәудијјә Әрәбистаны, Пакистан вә Гәтәр Талибанын һөкумәтинә гисмән мүсбәт јанашыблар.

Бунунла белә мүшаһидәчиләрин фикринҹә, Талибан елан етдији һөкумәтлә дүнја дөвләтләри тәрәфиндән танынмајаҹағындан нараһатдыр. Һазырда дүнја дөвләтләрини ниҝаран едән әсас мәсәләләрдән бири Талибанын мүхалифләрә о ҹүмләдән дә гадынлара ҝүҹ тәтбиг етмәси вә гадынларын иҹтимаи фәалијјәтини мәһдудлашдырмасыдыр. Јени гәрарла гадынлар вә гызларын идманла мәшғул олмасы һарам елан едиләрәк јасагланыбдыр.

342/