АБНА24 Хәбәр Верир, августун 23-дә Украјна пајтахты Кијевдә "Крым Платформасы" саммити кечирилиб. АБШ башда олмагла, Бөјүк Једдилијә, НАТО-ја вә Авропа Бирлијинә үзв олан бүтүн дөвләтләр, үстәлик тәшкилат олараг Авропа Бирлији, НАТО, Авропа Шурасы кими чох нүфузлу бејнәлхалг гурумлар Крым платформасынын тәсисчиләридир.
Тәсис топлантысында 46 дөвләтин вә бејнәлхалг тәшкилатын, Авропа Иттифагынын, НАТО-нун нүмајәндәләри, о ҹүмләдән 14 дөвләтин башчысы иштирак едирди.
Украјна тарихиндә ән бөјүк бејнәлхалг саммитдә Крымын ишғалынын әрази бүтөвлүјү принсипинә зидд олдуғу, Крымын бејнәлхалг бирлик тәрәфиндән Русија әразиси кими танынмајаҹағы, ишғал давам едәрсә Русијаја гаршы јени санксијаларын тәтбиг едиләҹәји вурғуланыбдыр.
Тәдбирә Азәрбајҹан Республикасынын гатылмамасы ҹидди суаллар доғуруб вә бир сыра сијасәтчиләр буна мүхтәлиф шәрһләр вермишләр.
Хүсусилә дә гејд олунур ки, иштиракчы дөвләтләрин бу бејнәлхалг һүгуг нормасына бирмәналы мүнасибәти Гарабағ низамланмасы просесиндә Азәрбајҹан үчүн һәлледиҹи әһәмијјәтә малик олса да, Азәрбајҹан һакимијјәти Русијанын мүмкүн реаксијасындан еһтијатланараг бу фүрсәти итирди. Белә ки, Азәрбајҹан рәсмиләри “Крым платформасында” иштирак етмәмәклә Кремли әсәбиләшдирмәмәјә гәрар верибләр. Әслиндә рус ордусунун Гарабағда олмасы Азәрбајҹанын мүстәгил хариҹи сијасәт имканларыны мәһдудлашдыран ҝерчәкликдир.
Она ҝөрә дә, игтидарын мөвгејини мүдафиә едәнләр дејирләр ки, Крым Платформасына јүксәк сәвијјәдә гатылсајдыг, бу тәдбири "антирусија тәдбири" кими гијмәтләндирән Москванын гәзәбинә туш ҝәлә биләрдик.
Бунунла белә Мүсават Партијасы Азәрбајҹан һакимијјәтиндән "Крым Платформасы" илә бағлы јанлыш мөвгејинә јенидән бахмасыны гәтијјәтлә тәләб едиб. Билдирилир ки, Крым Платформасына һеч олмаса, ашағы сәвијјәли тәмсилчи ҝөндәрмәк оларды, чүнки Азәрбајҹан онсуз да Крымын илһагыны танымајыб вә буну Русија да билир.
Бу мөвзуда ән сәрт мөвгеји исә Азәрбајҹан Халг Ҹәбһәси Партијасынын сәдри Әли Кәримли ортаја гојуб. Партија сәдри билдириб ки, һакимијјәтин ҹәсарәти чатмады ки, һамы кими, ҝедиб саммитдә иштирак етсин, мөвгејини дүнјаја ачыг бәјан етсин, јени достлар газансын, Азәрбајҹанын әрази бүтөвлүјүнә бејнәлхалг дәстәји артырсын. Бу сәбәбдән Крым платформасында иштирак етмәмәк Азәрбајҹан үчүн даһа бир итирилмиш фүрсәт олду. Чох парадоксал, мәнтигсиз вәзијјәт мүшаһидә олунмагдадыр.
342/
25 avqust 2021 - 04:25
Xəbər kodu: 1172991
Азәрбајҹан дөвләтинин Крым Платформасы Саммитиндә иштирак етмәмәси сијаси даирәләрдә гызғын мүбаһисәләрә сәбәб олуб.
