АБНА24 Хәбәр Верир, мәрасим бу ҝүн августун 3-дә Имам Хомејни адына Һүсејнијјәдә кечирилиб вә әввәлҹә өлкәнин дахили ишләр назири 13-ҹү дөвр президент сечкиләринин кечирилмә просеси илә бағлы һесабат вериб. Сонра өлкәнин Али Рәһбәри Һәзрәт Ајәтуллаһүл-үзма Хаменеи тәрәфиндән имзаланмыш президентлик һөкмү ҹәнаб Рәисијә тәгдим олунуб.
Һәзрәт Ајәтуллаһүл-үзма Хаменеи, һөкмүндә халгын сечкиләрдә мәналы вә иззәтли иштиракыны, еләҹәдә халга ҹан јандыран, диндар вә идарәетмәдә парлаг бир кечмиши олан шәхсин сечилмәсини милләтин ингилаб јолуну јәни әдаләт, тәрәгги вә азадлыг јолуну давам етдирмәк әзминин әламәти олараг дәјәрләндириб.
О һәзрәт бүтүн саһәләрдә бир сычрајыш етмәјин зәрурилијини вурғулајараг өлкәдә истеһсал саһәсиндәки манеәләри арадан галдырмаға, милли валјутаны мөһкәмләндирмәјә, ҹәмијјәтин орта вә ашағы тәбәгәләрини ҝүҹләндирмәјә вә сүрәтлә ирәлиләмәјә сәј ҝөстәрилмәсинә тәкид едиб.
Мәрасимдә чыхыш едән јени сечилмиш президент исә рәһбәрлијә вә халга дәрин миннәтдарлығыны билдирәрәк өз һөкумәтинин приоритетләрини ачыглајыб.
Ибраһим Рәиси дејиб: “18 ијун сечкиләринин месажы мөвҹуд вәзијјәти дәјишдирмәкдән ибарәтдир. Халг бу сечкиләрдән вә һөкумәтдән истәјир ки, мөвҹуд игтисади вәзијјәтә вә инфилјасијаја сон гојулсун. Иран халгы бу сечкиләрә гатылмагла игтисади, иҹтимаи вә мәдәни проблемләрин һәллини тәләб едир. Халг һөкумәтдән истәјир ки, әдаләти бәрпа етсин, коррупсија илә мүбаризә апарсын, инзибати ишләрдә гејри-сағлам әлагәләрә вә рүшвәтхорлуг кими Ислам Ингилабынын дәјәрләрилә зиддијјәт тәшкил едән нә варса онлара сон гојсун. Санксијаларын ләғв едилмәси әсас ишләримиздән биридир. Лакин халгын сүфрәсини әҹнәбиләрдән асылы һала ҝәтирмәјәҹәјик. Бизим тәҹили вә гысамүддәтли бир планымыз вар. Мән халгы әмин едирәм ки, мәсәләләр чох јахшы арашдырылыб вә планлар нәзәрдә тутулуб. Бу планлар дәрһал һәјата кечириләҹәк.”
Мәрасимин сонунда алимәгамлы рәһбәр јени сечилмиш президенти тәбрик едиб вә һөкумәтин тез бир заманда формалашдырылмасыны истәјиб. Онун сөзләринә ҝөрә, мөвҹуд дурумда һөкумәтин формалашдырылмасында тәхирә јол вермәк олмаз.
Чыхышынын бир гисминдә јени президент Ибраһим Рәисини тәбрик едән Ајәтуллаһүл-үзма Хаменеи һәзрәтләри өлкәдә һакимијјәтин дөвр едилмәсинин динҹ, сивил вә демократик јолла һәјата кечирилдијини билдириб вә буна ҝөрә Аллаһа шүкүр етдијини дилә ҝәтириб.
Ејни заманда сечкиләрә гатылдыгларына ҝөрә Иран халгына тәшәккүр едән Ајәтуллаһүл-үзма Хаменеи инфлјасија, коррупсија вә саир охшар мәнфи һалларын арадан галдырылмасыны тәләб едибдир.
Ислам Ингилабынын алимәгамлы рәһбәри сонда Ирана гаршы әдавәтин һәр шејдән өнҹә медиа вә психоложи мүһарибә мүстәвисиндә олдуғуну сөјләјибдир.
342/
