АБНА24 Хәбәр Верир, Сабир Мәммәдли јазыр: Игтисади рајонларын јарадылмасы әсасән тарихи амилләрә, әһалинин мәшғуллуг формаларына, кәнд тәсәррүфатынын хүсусијјәтләринә, сәнајенин инкишаф характеринә вә башга мејарлара ҝөрә мүәјјәнләшир. Бу мәнада үмуми игтисади идарәетмә системиндә малијјә вәсаитинин ајрылмасына, һансы саһәјә даһа чох диггәт јетирилмәсинә хүсуси өнәм вериләҹәк. Мәсәлә ондан ибарәтдир ки, совет дөнәмидән галмыш сүни бир дүшүнҹә тәрзи варды: она ујғун олараг Дағлыг Гарабағ Аран Гарабағдан ајрылмышды, идарәетмәдә, дөвләт бүдҹәсиндән малијјә ајырмаларында, һәтта тәһсилдә (нәзәрә алсаг ки, Ханкәнди вә әтраф әразиләрдә азәрбајҹанлыларла јанашы ермәниләр дә јашајырды) мүәјјән фәргләр мөвҹуд иди. Һазырки игтисади рајонларын јарадылмасы мәсәләјә јени јанашманы ортаја гојур.
Нәзәрә алмаг лазымдыр ки, јени игтисади рајонларын јарадылмасы һаггында сәнәд һәм дә сијаси әһәмијјәт кәсб едир. Азәрбајҹан рәһбәрлији 10 нојабр разылашмасындан сонра илк дәфәдир ки, Ханкәнди вә әтраф әразиләрлә бағлы рәсми мөвге ортаја гојду – јәни бу әразиләрин ҝәләҹәјини неҹә ҝөрүр. Мәлум мәсәләдир ки, Ханкәнди вә әтраф бөлҝә гондарма ермәни бирләшмәләринин вә, ачығы десәк, онлары һимајә едән Русија сүлһмәрамлыларынын нәзарәтиндәдир. Онлар да мүхтәлиф планлар гурурдулар. Реваншист мәгсәдләрә наил олмагдан башламыш, давамлы олараг бурада рус һәрбчиләринин галмасына гәдәр. Гарабағ игтисади зонасынын јарадылмасы бир тәрәфдән бу хәјалларла јашајан гүввәләрә месаж верди ки, Азәрбајҹанын дөвләт мараглары дәјәшмәјиб вә Бакы бу әразиләри өз торпаглары кими ҝөрүр, диҝәр тәрәфдән Ханкәнди вә әтраф әразиләрдә јашајан ермәниләр ачыг шәкилдә сечим гаршысында галаҹаглар, ја Азәрбајҹан вәтәндашлығыны гәбул етмәлидирләр, ја да өз мүлкијјәтләрини сатыб бу әразиләри тәрк етмәлидирләр. Јәни рус тәблиғатына, рус паспортларынын пајланмасы просесинә инам сынаҹаг. Русија чалышыр ки, Јухары Гарабағда зиддијјәтләр давам етсин, мәсәлә һәлл олунмамыш галсын вә онун бурада галмасына еһтијаҹ дујулсун. Бу исә Азәрбајҹаны гане едә билмәз, мәһз она ҝөрә дә Бакы мүхтәлиф аддымлар атыр ки, бу әразиләрдә өз јурисдиксијасыны бәрпа етсин.
Јени јарадылмыш игтисади рајонун бири Шәрги Зәнҝәзур адланыр. Бу чох әһәмијјәтлидир. Азәрбајҹан тарихи ҝерчәклијә сөјкәниб Кәлбәҹәр, Лачын вә диҝәр торпаглары өз адыјла рәсмиләшдирир. Бу сәрһәдјаны әразиләр тарихи Зәнҝәзурун бир һиссәсидир. Әһалинин мәшғуллуг формалары, тәбии еһтијатлар, релјеф охшарлығы бу әразиләри бир ваһид кими ҝөтүрмәјә мәҹбур едир. Ејни заманда Азәрбајҹан Ермәнистана вә бејнәлхалг иҹтимаијјәтә чатдырмаг истәјир ки, Шәрги Зәнҝәзур олдуғу кими Гәрби Зәнҝәзур да вар. Совет дөнәминдә Москва Гәрби Зәнҝәзуру Азәрбајҹан халгынын ирадәсинә зидд олараг Ермәнистана вериб. Азәрбајҹан халгы исә бунунла һеч вахт разылашмајаҹаг вә өз торпагларына саһиб олаҹаг.
342/
11 iyul 2021 - 06:31
Xəbər kodu: 1158979
Бакы Дөвләт Университетинин Журналистика факүлтәсинин Бејнәлхалг журналистика кафедрасынын досенти Сабир Мәммәдли Сәһәр Каналы үчүн јаздығы шәрһдә дөвләт башчысынын јени фәрманыны изаһ етди.
