Әһли Бејт (әлејһимус-сәлам) Хәбәр Аҝентлији –АБНА-нын вердији хәбәрә әсасән, Латын Америкасы өлкәси олан Һондурас сәфирлијини Тәл-Әвивдән Гүдсә көчүрүб. Һәмчинин сәфирлик бинасы 24 ијун 2021 тарихиндә Һондурас Президенти Хуан Орландо Ернандес тәрәфиндән истифадәјә верилиб.
Бу аддымла Һондурас, Америка Бирләшмиш Штатлары, Гватемала вә Косоводан сонра сәфирлијини Гүдсә көчүрән 4-ҹү өлкә олуб.
Бундан дәрһал сонра Фәләстин Һондурасын Тәл-Әвивдәки сәфирлијини Гүдсә көчүрмәсини гынајыб.
Фәләстин ХИН: БМТ гәрарлары позулуб
Фәләстин Хариҹи Ишләр Назирлијинин ачыгламасында “БМТ гәрарлары вә бејнәлхалг һүгугун позунтусу мәнасы дашыјан Һондурасын сәфирлијинин Гүдсә көчүрүлмәсини ән сәрт шәкилдә гынајырыг” ифадәси јер алыб.
Ачыгламада Һондурас Президентинин сәһв гәрар вердији вә бунун тәәссүф доғурдуғу гејд едиләрәк, сәфирлијин көчүрүлмә гәрарынын Фәләстин халгына гаршы ишғал гүввәләринин позунтуларынын артдығы бир дөврә тәсадүф етмәсинә диггәт чәкилиб.
Иорданија: Рәдд едир вә гынајырыг
Иорданија Хариҹи Ишләр Назирлији тәрәфиндән јајылан јазылы ачыгламада да атылан аддымын рәдд едилдији вә гынандығы, бунун бејнәлхалг гәтнамәләрә зидд олдуғу гејд едилиб.
Ачыгламада Гүдс шәһәринин дурумунун дәјишдирилмәси мәгсәди илә едиләҹәк һәр һансы бир дәјишиклијин дә ганунсуз вә етибарсыз олаҹағы хатырлатылыб.
Һәртәрәфли вә әдаләтли бир сүлһүн ваҹиблијинә ишарә едилән ачыгламада БМТ гәтнамәләринә ујғун олараг ики дөвләтли һәлл јолунун тәтбиг олунмасынын зәрурилији вурғуланыб.
Түркијә: Бу гәрары гынајырыг
Түркијә Хариҹи Ишләр Назирлијинин бунунла бағлы ачыгламасында “Бу аддымла Һондурас Гүдсүн статусу мөвзусунда БМТ гәрарлары дахил олмагла бејнәлхалг һүгугу позду, ики дөвләтли бир һәлл вә бөлҝәдәки сүлһ үмидләринә зәрәр верди. Һондурасын сәфирлијини Тәл-Әвивдән Гүдсә көчүрмәси вә сәфирлијин ачылышынын олмасы мәнфи бир аддымдыр. Бу гәрары гынајырыг. Һондурасы “бу сәһв гәрарындан” ҝери аддым атмаға чағырырыг.”, -дејә билдирилир.
ҺӘМАС: Фәләстин халгынын һүгугларына “ачыг һүҹум”дур
Фәләстин Ислами Мүгавимәт Һәрәкаты Һәмас да Һондурасын бејнәлхалг һүгуга зидд олараг ишғал олунмуш Гүдсдә сәфирлик ачмасыны гынадығыны билдириб.
Сөзүҝедән аддымын Фәләстин халгынын һүгугларына “ачыг бир һүҹум” олдуғуну гејд едән Һәмас Һондурас рәһбәрлијини бејнәлхалг ганунлара ујғун олараг гәрарыны ҝери гајтармаға дәвәт едиб.
Һәмас ајрыҹа “Фәләстин халгынын азадлыг вә мүстәгиллик һүгугуну дәстәкләмәк үчүн тәҹили һәрәкәтә” чағырыб.
Диггәт: Хәбәрдән Истифадә Етдикдә Мәнбәјә Истинад Лазымдыр!
