Депутатларын ниҝаранчылыгларына бахмајараг ганун лајиһәси гәбул олунуб

АБНА24 Хәбәр Верир, ганун лајиһәсини Милли Мәҹлисин Мәдәнијјәт комитәсинин сәдри Гәнирә Пашајева тәгдим едиб.

Комитә сәдри билдириб ки, ганун лајиһәси 15 маддәдән ибарәтдир.

Ганун лајиһәсинә әсасән, Азәрбајҹанын мәдәнијјәт пајтахты Шуша шәһәринин инзибати сәрһәдләри дахилиндә Шуша шәһәри Дөвләт Горуғу јарадылаҹаг.

Шуша шәһәринин инзибати сәрһәдләринә битишик јерләшән вә онунла тәбии ландшафт, сосиал, тарихи, мәдәни вә ја тәсәррүфат бағлылығы олан вә ја Шуша шәһәри Дөвләт Горуғунун мүһафизәси, горунмасы вә ја инкишафы үчүн әһәмијјәтә малик олан әразиләрдә публик һүгуги шәхс тәрәфиндән мүһафизә зонасынын сәрһәдләри мүәјјән едиләҹәк.

Ганун лајиһәсинин мајын 27-дә ММ-нин икинҹи охунушу заманы бу лајиһәјә гаршы сәсләндирилән ирадлар үчүнҹү охунушда өз һәллини тапмајыб. Бу барәдә комитә сәдри Гәнирә Пашајева һәмин ирадлары чох ваҹиб тәклифләр адландырса да дөвләт гурумларынын һәмин тәклифләри нәзәрә алаҹагларына үмид етмәклә кифајәтләниб вә “Биз тәклифләрлә бағлы һакимијјәт органлары илә мүзакирәләр апармышыг.” - дејә депутатлары ганун лајиһәсинә сәс вермәјә чағырыб.

Ганун лајиһәсиндә бәзи депутатлары ниҝаран едән маддәләр нәдән ибарәтдир вә һансы бошлуглар вар?

Депутат Гүдрәт Һәсәнгулијев “Азәрбајҹанын мәдәнијјәт пајтахты - Шуша шәһәри һаггында” ганун лајиһәсинин икинҹи охунушда мүзакирәси заманы белә демишди: “Лајиһәдә јазылыб ки, шәһәрә ҝириш-чыхыш тәнзимләнәҹәк. Бу неҹә тәнзимләнәҹәк?. Бу тәнзимләнмә заманы пул алынаҹагмы? Јахуд кимләрин ҝиришинә иҹазә вериләҹәк?

Гүдрәт Һәсәнгулијев һәмчинин шәһәрин идарәетмә системи барәдә дә ниҝаранлыг билдирәрәк дејиб ки, бу шәһәр горуг елан олунмагла бүтүнлүклә шәһәрин идарәетмә системини дәјишә билмәрик. Орада јашајан инсанларын мүвафиг идарәетмәси олмалыдыр. Бу, Конститусијада әксини тапыб.”

Депутат әлавә олараг дејиб: “Биздә горугларла бағлы ганун лајиһәси јохдур. Һәлә дә ҝириш-чыхышын неҹә тәнзимләнәҹәји бәлли дејил. Бу мәсәләјә ајдынлыг ҝәтирилмәси мәним өзүмдән чох, иҹтимаијјәт үчүн мараглыдыр”.

ММ-ин Мәдәнијјәт комитәсинин сәдри, депутат Гәнирә Пашајева исә дејиб ки,

“Дөвләт горуғуна ҝириш-чыхышын тәнзимләнмәси јени анлајыш дејил. Ичәришәһәр дөвләт горуғуна да ҝириш-чыхыш тәнзимләнир. Инсанларымызын Шушаја ҝетмәсиндә һеч бир проблем олмајаҹаг”.

Депутат Сијавуш Новрузов исә ичәришәһәрлә Шуша арасында фәрг олдуғуну дејиб:” Ичәришәһәр Бакынын Сәбаил рајонунун бир һиссәсидир, лајиһәдә исә Шуша шәһәри бүтөвлүкдә горуг елан едилир.

Депутат шуша сакинләринин өз доғма шәһәрләринә гајытмалары мәсәләсинә дә ајдынлыг ҝәтирилмәсини истәјиб, гејд едиб ки, Шушада 20 минә јахын инсанын јашамасы нәзәрдә тутулур: “Бүтүн ишғалдан азад едилмиш әразиләрә инсанларымыз һансы гајдада көчүрүләҹәксә, Шушада да ејни гајдада олмалыдыр”.

Депутат Ваһид Әһмәдов исә бу ганун лајиһәсиндә Шушанын инзибати бөлҝүсүнүн өз әксини тапмалы олдуғуну вурғулајыб. О дејиб: Шушанын кәндләри чох бөјүк сијаси әһәмијјәтлидир. Һазырда бу кәндләрдә ермәниләр јашајыр вә рус сүлһмәрамлылар фәалијјәт ҝөстәрир. Шуша кәндләринин бу шәкилдә ишғал алтында олмасы ҝәләҹәкдә проблемә сәбәб ола биләр. Шуша шәһәри Шуша рајонуна дахилдир. Бу ганун лајиһәсиндә Шушанын инзибати бөлҝүсү әксини тапса, јахшы оларды. Чүнки бәднам гоншуларымыз ҝәләҹәкдә лајиһәдә Шушанын кәндләринин өз әксини тапмамасындан истифадә едә биләрләр”.

Бүтүн бу ирадлар вә ниҝаранчылыглара бахмајараг “Азәрбајҹанын мәдәнијјәт пајтахты - Шуша шәһәри һаггында” ганун лајиһәси үчүнҹү охунушда гәбул едилиб.

342/