АБНА24 Хәбәр Верир, Азәрбајҹан Республикасынын президенти Илһам Әлијев буну Русијанын РБК телеканалына мүсаһибәсиндә апарыҹынын “Москвада баш верәнләри неҹә гијмәтләндирирсиниз” суалына ҹавабында билдириб. Әлијев әлавә едиб: “Ермәнистан илә Азәрбајҹан арасында субстантив данышыглар башланыр, һәмчинин данышыгларын форматынын дәјишмәз галмасы тәсдигләнир. Ермәнистанын јени һакимијјәти бу ики мөвгеји позмаға чалышырды. Она ҝөрә ки, һеч кәс үчүн сирр дејил, Јеревандан сәсләнән бәјанатлар маһијјәт етибарилә узун илләр әрзиндә ишләниб һазырланмыш данышыглар просесини, о ҹүмләдән база принсипләрини, данышыгларын форматыны позмаға јөнәлмишди. Буна ҝөрә принсипиал әһәмијјәтли мәгам одур ки, Ермәнистан тәрәфи анламаға мәҹбур олду ки, база принсипләри низамлама үчүн әсасдыр, һәмин принсипләрдә исә мүнагишәнин неҹә низамланмалы, Азәрбајҹанын ишғал едилмиш әразиләринин һансы ардыҹыллыгла гајтарылмалы олдуғу дәгиг ҝөстәрилиб”. Азәрбајҹан Республикасынын президенти гејд едиб ки, икинҹи мүһүм мәгам данышыгларын форматынын дәјишмәз галмасыдыр: “Бу, о демәкдир ки, данышыглар јалныз Азәрбајҹан илә Ермәнистан арасында апарылырды, апарылыр вә апарылаҹаг. Ермәнистан рәһбәрлијинин бу мәсулијјәти Дағлыг Гарабағда мөвҹуд олан ојунҹаг режимин үзәринә гојмаг үчүн ҝөстәрдији бүтүн ҹәһдләр уғурсуз олду. Беләликлә, әминәм ки, бундан сонра Пашинјандан “Гарабағ Ермәнистандыр” сөзләрини бир даһа ешитмәјәҹәјик. Һәмчинин онун белә бәјанатларыны ешитмәјәҹәјик ки, Азәрбајҹан данышыглары гондарма “Дағлыг Гарабағ республикасы”нын гондарма “рәһбәрлији” илә апармалыдыр. Әҝәр о, белә бәјанатлар верәрсә, бу, о демәк олаҹаг ки, о, һәм васитәчиләрә, һәм дә Москвада бу мәтни разылашдырмыш өз нүмајәндә һејәтинә һөрмәтсизлик едиб вә маһијјәт етибарилә, о, данышыглар просесини јенидән позур. Бу дәфә һәмин бәјанатлар нәјә ҝәтириб чыхарды? Зәннимҹә, буну һамы ашкар ҝөрүр, лакин дүшүнмүрәм ки, о, икинҹи дәфә һәмин сәһви тәкрарлајар”.
342/
