АБНА24 Хәбәр Верир, октјабрын 2-дә һәмчинин Азәрбајҹан Ордусу мүәјјән олунмуш истигамәтләрдә ирәлиләјәрәк јени дајаг мәнтәгәләрини азад етмәклә әразини дүшмән гүввәләрдән тәмизләјиб. Үмумиликдә сентјабрын 27-дән октјабрын 2-си саат 20.00-дәк Ермәнистанын 230-дәк танк вә диҝәр зиреһли техникасы, 250 әдәд артиллерија, јајлым атәшли ракет системләри вә минаатанлары, 38 әдәд һава һүҹумундан мүдафиә васитәләри; 10 команда-идарәетмә вә команда-мүшаһидә мәнтәгәси; 7 силаһ-сурсат анбары; 130-дан артыг автомобил техникасы вә 1 әдәд “С-300” зенит-ракет комплекси мәһв едилиб. Бу арада мәлумат верилир ки, Азәрбајҹанын јашајыш мәнтәгәләринин ермәни силаһлы гүввәләри тәрәфиндән атәшә тутулмасы давам едир. Гаршы тәрәф артыг Ермәнистан әразисиндәки тактики ракетләрдән Азәрбајҹанын јашајыш мәнтәгәләринә атәш ачмаға башлајыб. Дүнән сәһәр тездән ермәни силаһлы гүввәләри Азәрбајҹанын јашајыш мәнтәгәләрини бир нечә истигамәтдән артиллерија атәшинә тутуб. Ермәнистанын Азәрбајҹандакы мүлки шәхсләрә гаршы тактики силаһ истифадә етмәси барәдә дә мәлумат верилир. Бунунла әлагәдар Азәрбајҹан президентинин көмәкчиси, Президент Администрасијасынын Хариҹи сијасәт мәсәләләри шөбәсинин мүдири Һикмәт Һаҹыјев Ермәнистан силаһлы гүввәләрини иттиһам едиб ки, онлар Азәрбајҹанын јашајыш мәнтәгәләрини вә мүлки әһалисини гәсдән һәдәфә алырлар. Бәзи мәлуматлара ҝөрә, тәкҹә өтән ҝүн әрзиндә Тәртәрә 2 миндән чох мәрми дүшүб. Һикмәт Һаҹыјев дејиб ки, бу, вәһшилик, барбарлыг вә инсанлыға јарашмајан һәрәкәтдир. Ермәнистанын бејнәлхалг һуманитар һүгугун, о ҹүмләдән 1949-ҹу ил Ҹеневрә конвенсијаларынын мүддәаларыны кобуд сурәтдә позан бу һәрәкәти мүһарибә ҹинајәтидир. О, Азәрбајҹан силаһлы гүввәләри тәрәфиндән адекват ҹаваб тәдбирләринин һәјата кечириләҹәјини дејиб. Ән сон мәлумата әсасән, октјабрын 2-дә Азәрбајҹан Ордусу Ағдәрә истигамәтиндә Мадаҝиз әтрафындакы һаким јүксәкликләри азад едиб вә һазырда бу мәнтәгәни нәзарәтдә сахлајыр.
342/
