АБНА24 Хәбәр Верир, АБШ-ын Дөвләт катиби Мајк Помпео билдириб ки, Чин Һонконгун милли тәһлүкәсизлик ганунуну бүтүн дүнјадакы инсанлара тәтбиг етмәјә чалышыр. Бу, инсан һүгугларыны вә әсас азадлыгларын чәрчивәләнмәсинә јөнәлик бир ҹәһддир. Онун сөзләринә ҝөрә, Пекинин авторитар идарәетмә моделини дүнја өлкәләринә тәблиғ етмәсинә иҹазә верилмәмәлидир. Мајк Помпео бундан әввәл дә Чин Коммунист Партијасыны Америка халгынын тәһлүкәсизлијини әсаслы шәкилдә тәһдид етдијини демишди. Гејд едәк ки, АБШ Федерал Кәшфијјаты бу јанларда һазырладығы һесабатда Чини Америка үчүн ән узунмүддәтли тәһлүкә олараг гијмәтләндириб. Сәнәддә иддиа олунуб ки, Чин әввәлкитәк Американын дөвләт сирләрини оғурламаға чалышыр. бу дөвләт һәмчинин Америкада јашајан чинлиләри тәгиб едир, онлары Чинә ҝери гајытмаға вадар етмәјә чалышыр. Сон ҝүнләр бу иттиһамлар фонунда Чинин Һјустон шәһәриндәки консоллуғунун бағланмасы да истәр-истәмәз диггәт чәкир. Белә ки, тиҹарәт мүһарибәсинин ардынҹа ики өлкә арасында дипломатик мүһарибә дә јени мүстәвијә кечир вә етимадсызлыг атмосфери даһа да ҝенишләнмәкдәдир. Вашингтонун чинли мәмурлара гаршы нөвбәти санксија гәрарыны елан етмәси вә Чинин Һонконг сијасәтини гынамасы да бөһраны дәринләшдирир. Әслиндә әввәлҹәдән тәхмин олунурду ки, АБШ-ын 45-ҹи президенти Доналд Трампын хариҹи сијасәтиндә Чин әсас һәдәфләрдән бири олаҹаг. Бу истигамәтдә о, Ағ Евә дахил олан кими АБШ базарыны әлә кечирмиш Чин мәһсулларыјла бағлы тәдбир ҝөрмәјә башлады. Сон ајларда исә коронавирусла бағлы сөз атышмасы әлагәләри даһа да зәрбә алтында гојду. Америка рәһбәрлији һесаб едир ки, Чин һәм дахили, һәм дә хариҹи сијасәтдә АБШ-ын гаршысында дуран әсас актор сајыла биләр. Трамп администрасијасыны Чинлә бағлы нараһат едән мәгамлар бунлардыр: - Чинин девалвасија вә ҝөмрүк сијасәтинин АБШ-а зијаны; - Пекинин Ҹәнуби Чин дәнизиндә һәрби ҹәһәтдән мөһкәмләнмәси вә һәр јердә Бирләшмиш Штатларын дөвләт марагларына тәһлүкә јаратмасы. Бунунла јанашы Чинин Иран сијасәти дә Вашингтону гане етмир вә бу барәдә онун Иранла имзаламаг истәдији 25 иллик тәрәфдашлыг мүгавиләсинә гаршы чыхыр. Мүшаһидәчиләр хәбәрдарлыг едирләр ки, Трамп Америкасынын Чини аз гала дүшмән образында ҝөрмәси, бүтүн ҹәбһәләрдә ону сыхышдырмаг јолуну тутмасы бејнәлхалг сүлһ вә сабитлијә чох ҹидди тәһлүкә јарада биләр.
342/
