Әһли Бејт -АБНА- хәбәр аҝентлијинин вердији хәбәрә әсасән: Бу ҝеҹә һүзүнлә долу ҝеҹәләрдән биридир. Бу ҝеҹә Бәшәр вә Ҹин тафаларынын доггузунҹу Имамы, Имам Муһәммәд Тәгинин (әлејһис сәлам) шәһадәт ҝеҹәсидир. Биз АБНА олараг бу һүзнү илк өнҹә Заманын Саһиби Имам Мәһди (Аллаһ онун зүһуруну тезләшдирсин), о һәзрәтин һагг наиби Имам Хамнеји вә үмум дүнја мүсәлманлары илә бөлүшмәки өзүмүзә борҹ билирик.
Мөвзу илә бағлы зијарәтчиләримизин һүзуруна Имам барәсиндә сил-силәвари гыса анлајыш веририк.
Имам Мәһәммәд Тәгинин (ә) һәјаты барәдә гыса мәлумат
Мәһәммәд ибн Әли әт-Тәги
Шиәләрин 9-ҹу имамы
818 — 835
Сәләфи: Имам Рза
Хәләфи: Имам Нәги
Дини: Ислам
Тәвәллүдү: 811-ҹи ил Мәдинә
Вәфаты: 835-ҹи ил Бағдад
Казимејн, Ираг
Атасы: Әли ибн Муса
Ушаглары: оғулу: Әли
Доггузунҹу Имамын ады Мәһәммәд, күнјәси Әбу Ҹәфәр, ләгәби Тәги вә Ҹавад олмуш, һиҹрәтин јүз дохсан бешинҹи илиндә Мәдинә шәһәриндә анадан олмушдур. Пејғәмбәрин һәјат јолдашы олмуш Марија Гибтијјәнин нәслиндән һесаб олунан Сәбикә ханым әхлаги дәјәрләр бахымындан јүксәк мәртәбәдә дурур вә өз дөврүнүн гадынларынын ән үстүнү һесаб олунурду. Белә ки, Имам Риза (ә) о ханымы пак,нәҹабәтли вә фәзиләтли бир гадын кими јад едирди.
Имам Ҹавадын (ә) атасы вәфат едәркән тәхминән сәккиз јашы олмуш, ијирми беш јашында оларкән шәһадәтә јетишмиш вә Бағдадын Гүрејш гәбристанлығында бабасы Имам Казимин (ә) мәзарынын јанында дәфн олунмушдур.
Имам Ҹавадын (ә) шәһадәти
Һиҹрәтин ики јүз он сәккизинҹи илиндә Мәмун вәфат едир. Ондан сонра гардашы Мөтәсим хәлифә олур. О, Имам Ҹавады (ә) өз нәзарәти алтында сахламаг мәгсәди илә һиҹрәтин ики јүз ијирминҹи илиндә о Һәзрәти Мәдинәдән Бағдада ҝәтиздирир. Имам (ә) Бағдада ҝәлдикдән сонра Мөтәсимин, оғрунун әлинин һарадан кәсилмәси барәдә тәшкил етдији мәҹлисдә иштирак етмишди. Һәмин мәҹлисдә Бағдад газысы (Ибн Әбу Дуад) вә башгалары (сәһв фәтва вердикләринә ҝөрә) рүсвај олмуш, бундан бир нечә ҝүн сонра Ибн Әбу Дуад һәсәд вә пахыллығы нәтиҹәсиндә хәлифәнин һүзуруна ҝәлиб демишдир: “Мән хејирхаһлыг мәгсәди илә сәнә хәбәрдарлыг едирәм ки, бир нечә ҝүн бундан габаг баш вермиш һадисә сәнин һөкумәтинин хејринә дејил. Чүнки сән бүтүн һөкумәт алимләри вә јүксәк рүтбәли нүмајәндәләрин һүзурунда (Имам) Ҹавадын (ә) вердији фәтваны башгаларынын фәтвасындан үстүн тутдун. Һалбуки, мүсәлманларын јарысы ону әсл хәлифә, сәни исә онун һаггыны гәсб етмиш билирләр. Бу хәбәр бүтүн ҹамаат арасында јајылараг онун һагг олдуғуна гәти бир сүбут олмушдур.”
Гәлбиндә Имам Ҹавада (ә) гаршы дүшмәнчилик кин-күдурәти бәсләјән Мөтәсим онун сөзләриндән бәрк нараһат олараг Имамы (ә) өлдүрмәк фикринә дүшдү. Нәһајәт, о, өз чиркин мәгсәдини һәјата кечириб Имам Ҹавады (ә) вәзирләриндән биринин катиби васитәсилә зәһәрләјиб шәһид едир. Имам Ҹавад (ә) шәһид оларкән мүбарәк өмрүндән ҹәми ијирми беш ил вә бир нечә ај кечмишди.
Диггәт: Хәбәрдән истифадә етдикдә мәнбәјә истинад лазымдыр
