Әһли Бејт -АБНА- хәбәр аҝентлијинин вердији хәбәрә әсасән: Досјеси ачыгланан шәхсләрин арасында азәрбајҹанлы мәһкум Полад Сираҹов да вар. Досједә П. Сираҹовун фотосу да јерләшдирилиб.
П. Сираҹова аид досједә онун “Талибан” дөјүшчүсү олдуғу гејд олунуб. Досједә, һәмчинин, билдирилир ки, П. Сираҹов 2001-ҹи илдә көнүллү олараг Азәрбајҹандан Әфганыстана ҝәлиб вә “Талибан” гүввәләринә гошулараг АБШ коалисијасына гаршы һәрби әмәлијјатларда иштирак едиб. Онун дөјүшләрдә истифадә етдији силаһ исә 7.62 миллиметр чаплы “АКМ” автоматы олуб. П. Сираҹов Әфганыстанда Шимали Атлантика Алјансы гүввәләринин ачдығы атәш нәтиҹәсиндә јараланыб. 2001-ҹи илин нојабрында исә Мәзари Шәриф шәһәри јахынлығында НАТО гүввәләринә тәслим олуб.
АБШ һөкумәти тәрәфиндән ачылан досјеләрин һәр бириндә “Талибан” вә “Әл-Гаидә” тәрәфдарлары дүшмән дөјүшчү кими гәбул едилиб. П. Сираҹов да “Талибан” дөјүшчүсү олдуғу үчүн АБШ һөкумәти ону дүшмән дөјүшчү кими таныјыб вә мәһкәмә гаршысына чыхарыб.
Гејд едәк ки, АБШ президенти Барак Обама Гуантанамо һәбсханасынын бағланмасы барәдә 2009-ҹу илдә сәрәнҹам имзалајыб. Мәлум сәрәнҹамдан сонра һәмин һәбсханада ҹәза чәкән мәһкумларын бөјүк әксәријјәти азадлыға бурахылыб. П. Сираҹов да әфв олунан мәһкумлар сырасында олуб. Әфв олундугдан сонра исә П. Сираҹов өлкәсинә гајытмагдан имтина едиб. О, бејнәлхалг тәшкилатларын көмәклији илә үчүнҹү өлкәјә јерләшдирилиб. П. Сираҹов һазырда Словакијададыр.
Хатырладаг ки, Гуантанамода олан јеҝанә азәрбајҹанлы мәһбус П. Сираҹов Түркијәнин Кајсери шәһәриндәки Әрҹијәз Университетиндә игтисад факүлтәсини битириб вә бир мүддәт Русијада фәалијјәт ҝөстәрән түрк ширкәтиндә чалышыб. О, 2001-ҹи илин әввәлиндә евдән чыхыб вә ҝери гајытмајыб.
Диггәт: Хәбәрдән истифадә етдикдә мәнбәјә истинад лазымдыр
