Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Азәрбајҹан Хариҹи Ишләр Назирлијинин мәтбуат катиби Лејла Абдуллајева билдириб: "Бу ҝүнләрдә бәзи күтләви информасија васитәләриндә јајылан “Азәрбајҹан НАТО үзв өлкәләри үчүн өз әразисиндән кечән дәһлизи бағлајыр” ифадәси һәгигәтә ујғун дејил."
“Вәзијјәтин ајдынлашдырылмасы мәгсәдилә гејд етмәк истәрдик ки, Азәрбајҹан дәһлиз мәнасында һеч кимә, о ҹүмләдән, НАТО-ја һәр һансы әразисини вермир. Бурада сөһбәт НАТО-нун Әфганыстанда һәјата кечирдији вә Азәрбајҹанын да иштиракчысы олдуғу “Гәтијјәтли Дәстәк” миссијасынын үзвләринә өлкә әразисиндән, о ҹүмләдән, гуру, һава вә су мәканындан сөзүҝедән миссија чәрчивәсиндә мүвафиг јүк дашымаларынын һәјата кечирилмәси үчүн мүвафиг имканынын тәмин едилмәсиндән ҝедир. Белә бир тәҹрүбә 2001-ҹи илдән мөвҹуддур.
Бу имканларын тәмин олунмасы үчүн НАТО-ја үзв өлкәләрин мүвафиг учуш иҹазәләринин әлдә едилмәси мүраҹиәтләри икитәрәфли әсасларда нәзәрдән кечирилир. Сөзүҝедән мүраҹиәтләрә Азәрбајҹан тәрәфинин мүвафиг гајда вә проседураларына ујғун олараг, еләҹә дә, тәрәфдашлығын тәмәлини тәшкил едән дөвләтләрин бир-бирләринин суверенлији вә әрази бүтөвлүјүнә һөрмәт вә әмәкдашлыг принсипләри әсасында бахылыр”, - дејә ХИН рәсмиси билдириб.
Онун сөзләринә ҝөрә, буҝүнәдәк Азәрбајҹан мәһз бу призмадан јанашараг, НАТО-нун Әфганыстанда һәјата кечирдији миссијасына, еләҹә дә, үмумијјәтлә, бөлҝәдәки сүлһ вә тәһлүкәсизлијә өз төһфәсини вериб:
“АБШ вә диҝәр НАТО өлкәләри Әфганыстана учушларыны мәһз Азәрбајҹан әразисиндән истифадә етмәклә һәјата кечирирләр. Диҝәр тәрәфдән, бу ҝүн Азәрбајҹан транс-реҝионал әлагәләндирмә өлкәси кими таныныр. Азәрбајҹан әразисинин гуру вә су мәканы үзәриндән транзит имканлары јарадылыб. 2017-ҹи илдән етибарән фәалијјәтә башлајан Бакы-Тбилиси-Гарс дәмир јолу хәтти вә өтән илдән Әләт Бејнәлхалг Дәниз Лиманынын там фәалијјәтә кечмәси бу хүсусда јени имканлар ачыб.
Бир нечә НАТО үзв өлкәләри Әфганыстана јүк дашымаларыны мәһз бу јоллардан истифадә етмәклә тәмин едирләр. Бүтүн бу гејд олунанларын мүсбәт дәјәнләндирилмәсинин давамы олараг ҹари илин 4 апрел тарихиндә Вашингтонда НАТО Баш катиби мәтбуат конфрансында ачыглама илә чыхыш едәрәк гејд едиб ки, Азәрбајҹан Алјансын јахын тәрәфдашыдыр вә өлкәмиз бејнәлхалг сүлһ вә тәһлүкәсизлијин бәргәрар олунмасында НАТО илә сых әмәкдашлыг едир. Баш катиб, һәмчинин, Азәрбајанын НАТО-нун “Гәтијјәтли Дәстәк” миссијасына әһәмијјәтли һәрби гүввә вә мултимодал транзит төһфәси вердијини гејд едиб, бу хүсусда, Бакы-Тбилиси-Гарс дәмир јолу хәттинин Әфганыстана дашымалар заманы истифадә олундуғу вә бу дәмир јолунун Алјансын “Гәтијјәтли Дәстәк” миссијасына мүһүм төһфә вердијини вурғулајыб. Вурғуламаг истәрдик ки, баш катиб НАТО өлкәләринин коллектив мөвгејини тәгдим едир вә баш катибин сөзүҝедән бәјанаты да мәһз бу әсасларда верилиб”.
Лејла Абдуллајева гејд едиб ки, сон ҝүнләр Алманија мәтбуатына сызылмыш мәлуматлар вә иттиһамлар анлашылмазлыг јаратмагла јанашы, киминсә гәрәзлилијиндән хәбәр верир:
“Әсассыз иттиһамлары өзүндә әкс етдирән бу мәлуматлар конкрет фактлара әсасланмыр. Бир даһа билдиририк ки, Азәрбајҹан мүвафиг тәрәфдашлыг принсипләри әсасында вә бејнәлхалг һүгугун нормаларына ујғун олараг НАТО-ја үзв өлкәләрлә әмәкдашлыг едиб, һазырда едир вә ҝәләҹәкдә дә бу әмәкдашлығы давам етдирмәјә һазырдыр.
Алманија КИВ-ә сызылмыш мәлумата истинадән мүшаһидә етдијимиз ујдурма кампанија јанлышдыр вә Азәрбајҹан һаглы олараг ҝөзләјир ки, Алманија һөкумәти мүвафиг шәкилдә өзү бу мәсәләни ҹавабландыраҹагдыр. Азәрбајҹан НАТО үзв өлкәләринин мүраҹиәтләринә бундан сонра да мүвафиг шәкилдә бахмаға давам едәҹәк”.
Диггәт: Хәбәрдән истифадә етдикдә мәнбәјә истинад лазымдыр
