Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, бу ҝүнләрдә Бакы Ағыр Ҹинајәтләр Мәһкәмәсиндә Суријада ИШИД террор тәшкилатынын сыраларында дөјүшмәкдә иттиһам олунан 40 јашлы Бакы шәһәр сакини “Абу Ҹиһад” ләгәбли Елдәниз Мәммәдовун ҹинајәт иши үзрә мәһкәмә истинтагы јекунлашыб.
Мәлумата ҝөрә, иттиһам актына әсасән Елдәниз Мәммәдов Суријада дини дүшмәнчилик зәмининдә апарылан силаһлы мүнагишәләрдә иштирак етмәк мәгсәдилә 13 ијун 2013-ҹү илдә Түркијәнин Һатај вилајәтинә, орадан да Суријанын Артма шәһәринә ҝедиб. Артмада “Абу Һамза” нын рәһбәрлик етдији, “Ҹејшүл Мүһаҹирун” вә “Абу Һаниф Дағыстани”нин рәһбәрлик етдији, гәрарҝаһы Һәләбдә јерләшән силаһлы груплашмаларын тәркибинә дахил олуб.
2014-ҹү илин јанвар ајынадәк Е.Мәммәдов Сурија силаһлы гүввәләринә гаршы дөјүшләрдә иштирак едиб. Һәмин ил јанварын ахырында Азәрбајҹана ҝери гајыдыб. Тәхминән бир ил сонра јенидән Суријаја ҝери дөнүб. Бу дәфә Суријанын шималындакы Ҹераблус бөлҝәсинә үз тутан Е.Мәммәдов “Јасир” ләгәбли ИШИД командиринин Тапка рајонунда фәалијјәт ҝөстәрән террорчу груплашмасына гатылыб. Даһа сонра исә Раггада “Харис” ләгәбли ИШИД-чинин дәстәсиндә дөјүшүб.
Ордудан ајрылыб, һәбсә ҝириб...
Иттиһам актында Е.Мәммәдовун биографијасы да јер алыр. Орада дејилир ки, “Абу Ҹиһад” Ҹ.Нахчывански адына һәрби лисеји битирдикдән сонра 1996-ҹы илдә Али Һәрби Дәнизчилик мәктәбинә дахил олуб. 2005-ҹи илә гәдәр ајры-ајры һәрби һиссәләрдә әрзаг-әшја хидмәти рәиси вәзифәсиндә ишләјиб. 2005-ҹи илин апрелиндә исә өз истәји илә һәрби хидмәтдән еһтијата бурахылыб.
Еһтијата бурахылдыгдан бир мүддәт сонра ганунсуз силаһ сахлама вә диҝәр әмәлләринә ҝөрә 7 ил 7 ај мүддәтинә һәбс ҹәзасы алыб. 2012-ҹи илдә азадлыға бурахылыб. Һәбсдән чыхдыгдан сонра Е.Мәммәдов 9 сајлы ҹәзачәкмә мүәссисәсиндә таныш олдуғу Васиф Худавердијевин Суријаја ҝедәрәк ИШИД-ин тәркибинә гатылдығыны өјрәниб. “Скјпе” васитәсилә онунла әлагә јарадыб. Васиф она Суријада вәзијјәтин јахшы олдуғуну дејәрәк ҹиһада дәвәт едиб. Е.Мәммәдов белә гәрара ҝәлиб ки, шәриәтин һаким олдуғу торпаглара ҝетмәли вә кафир гүввәләрә гаршы мүбаризә апармалыдыр.
Сурија ҹәһәннәминә ҝедән јолун башланғыҹы
“Абу Ҹиһад” истинтага вердији ифадәсиндә ҝөстәриб ки, һәмин мәгсәдлә 2013-ҹү илин јајында Бакыдан Түркијәјә јола дүшүб. Һатај вилајәтинә чатдыгдан сонра Васифин әввәлҹәдән әлагә нөмрәләрини вердији инсан гачагчылары илә әлагә сахлајыб, онларын көмәклији илә Түркијә - Сурија сәрһәддини ганунсуз кечәрәк Артма шәһәринә ҝедиб.
Орада “Абу Һамза”нын рәһбәрлик етдији “Ҹејшул Муһаҹирун”, “Абу Һаниф Дағыстани”нин рәһбәрлик етдији “Шуһада” адлы силаһлы ҹиһадчы групларын тәркибины дахил олуб. Сурија силаһлы гүввәләринә гаршы апарылан дөјүшләрдә, сәрһәд постларынын мүһафизәсиндә иштирак едиб. Ҝүндәлик ҝејим вә јемәклә тәмин едилиб.
Тәгсирләндирилән шәхсин ифадәсиндән: “Јени ҝәләнләрә одлу силаһдан истифадә барәдә тәлимләр кечирилирди. Мән илк дәфә Суријаја чатыб ҹиһадчылара гошуланда Рамазан ајы олдуғундан тәлимләр дајандырылмышды. Она ҝөрә дә “Ҹејшул Муһаҹирун” да олдуғум мүддәтдә һәрби тәлим алмамышам. Рамазан ајы битәндән сонра һәмин групдан ајрылдым. Һәрби тәлимләрдә иштирак етмәмишәм, јалныз дини тәлимләрдә иштирак етмишәм”.
Азәрбајҹана гајыдыб, бир ил сонра јенидән Суријаја дөнүб...
Е.Мәммәдов һәмчинин ифадәсиндә ҝөстәриб ки, һәрбчи олдуғундан һеч бир тәлимләрдә иштирак етмәдән бирбаша ИШИД-ин тәркибиндәки “Шуһада” силаһлы груплашмасына гошулуб. Бир мүддәт сонра исә груп рәһбәриндән аилә үзвләрини ҝөрмәк үчүн иҹазә алараг Азәрбајҹана гајыдыб. Бир илә јахын Азәрбајҹанда галан Елдәниз Суријаја ҝери гајытмаг үчүн бу дәфә Украјнанын Кијев шәһәрини сечиб. ИШИД үзвләринин васитәсилә таныш олдуғу Мүслүм адлы шәхслә әлагә јарадыб. Мүслүм 300 доллар мүгабилиндә онун үчүн Таҹикистан вәтәндашына мәхсус сахта паспорт дүзәлдиб.
Һәмин сәнәдлә “Абу Ҹиһад” Украјнадан Түркијәјә, ораданса Суријанын Ҹераблус шәһәринә ҝәлиб. Һәмин дөврдә Ҹераблус тамамилә ИШИД гүввәләринин нәзарәтиндә олуб. ИШИД-ин пајтахты Раггаја үз тутан Елдәниз орадакы шәријәт-тәлим-тәдрис мәркәзинә јерләшдирилиб. Азәрбајҹандан олан ҹиһадчыларла бирҝә шәриәт ганунлары барәдә дәрс алыб: “Мәнә јалныз динин әсас гајдалары бардә дәрс кечибләр. Тәдрис баша чатдыгдан сонра Рагга бөлҝәсинин Тапка шәһәринә ҝөндәрилмишәм”.
Тапкада исә о, “Јасир” ин рәһбәрлик етдији 100 нәфәрдән ибарәт груплашмаја дахил олуб. Онунла бирҝә һәмин груплашмада “Абдулла Ләзҝи”, “Ибраһим Ләзҝи”, “Абу Рајја”, “Абу Тураб Ләзҝи”, “Абу Камал Азәри” Азәрбајҹан вәтәндашлары да олуб. Онлар актив дөјүш әмәлијјатларында иштирак едибләр. Илк дөјүшдә “Јасир” вә адлары һалланан азәрбајҹанлылар да дахил олмагла груплашма үзвләринин әксәријјәти һәлак олублар. Бундан сонра онлары Раккаја ҝөндәрибләр.
“Ара-сыра ПКК илә атышмалар олурду...”
Е.Мәммәдовун ифадәсинә ҝөрә, миллијјәтҹә түрк олан “Харис”адлы екстремисти “Јасир”ин групуна рәһбәр тәјин едибләр. Бу груплашманын тәркибиндә Рагга бөлҝәсиндәки “Ҹәријјәдә” гәсәбәсинин мүһафизәсиндә иштирак едиб. Әразинин мүһафизәси заманы она автомат силаһ верилиб: “Дөјүш нөвбәси үч-дөрд саат олурду. Нөвбәдә олдуғум заман ара-сыра ПКК гүввәләри илә атышмалар, хырда дөјүшләр баш верирди”.
“Абу Ҹиһад” мәһкәмәјә вердији ифадәсиндә Сурија әразисиндә һеч бир дөјүшләрдә иштирак етмәдијини, атышма заманы силаһла өзүнү горудуғуну дејиб. Лакин истинтага вердији илкин ифадәсиндә груплашмада олдуғу мүддәтдә она автомат силаһ верилдијини, дөјүшләрдә иштирак етдији заман һәмин силаһдан истифадә етдијини, ики ај “ПКК” террор групламасына вә коалисија гүввәләринә гаршы дөјүшдүјүнү ҝөстәриб. Сонракы ифадәләриндә исә елан олунан иттиһамларла өзүнү тәгсирли билмәјиб. Суријада олдуғу мүддәтдә одлу силаһ дашыдығыны, һәмин әразидә јашајан һәр кәсин өзүнү мүдафиә етмәк үчүн одлу силаһдан истифадә етдијини, ИШИД-ин тәркибиндә дөјүшмәдијини, үмумијјәтлә һеч бир дөјүшдә иштирак етмәдијини, әввәлки ифадәләриндә јалан данышдығыны, лакин бунун сәбәби барәдә ифадә вермәк истәмәдијини ҝөстәриб.
Ҹиһадчылар бир-бирләрини ләгәбләри илә таныјыблар
О, һәмчинин ифадәсиндә ҝөстәриб ки, ИШИД-ә гошулан мүҹаһидләр бир-бирини әсасән дини ләгәбләри илә таныјыблар. Һәр кәсә јалныз онун ләгәби илә мүраҹиәт олунуб. Бу сәбәбдән дә ајры-ајры шәхсләрин ады вә сојады демәк олар ки, билинмир. Бундан әлавә киминсә анкет мүәјјәнедиҹи мәлуматлары илә марагландыгда һәмин шәхсә шүбһә илә бахырлар вә ҹасуслуг етмәкдә шүбһәли билирләр.
Дедијинә ҝөрә Суријада дөјүшәндә она ИШИД террор тәшкилаты тәрәфиндән ајда 50 доллар пул верилиб. Тәхминән бир илә јахын һәмин груплашманын тәркибиндә дөјүшдүкдән сонра аилә үзвләринин тәкиди илә Азәрбајҹана гајытмағы гәрара алыб. Иҹазәсиз олараг ИШИД-дән ајрылмаға ҹәһд етдијинә ҝөрә ИШИД полиси тәрәфиндән сахланылараг үч ај һәбсдә галыб. Орадан азад олундугдан сонра исә 2016-ҹы илин декабрында танымадығы гачагчы 1000 доллар мүгабилиндә ону Азез гәсәбәсиндән Түркијәнин Килис шәһәринә кечириб. Бир мүддәт орада галдыгдан сонра Түркијә һүгуг-мүһафизә органлары тәрәфиндән сахланылыб вә Азәрбајҹана депорт едилиб.
“Әбу Ҹиһад” һәм дә популјар блоггер олуб
Гејд едәк ки, “Абу Ҹиһад” һәм дә сосиал шәбәкәләрдә ИШИД-чиләр арасында популјар олан “Инстаҝрам” сәһифәсини идарә едиб. О, сосиал шәбәкә һесаблары барәдә истинтага вердији ифадәсиндә ҝөстәриб ки, 2013-ҹү илдән етибарән “Фаҹебоок”, “Инстаҝрам” вә с. сосиал шәбәкләрдә һесаблары, шәхси сәһифәләри олуб. Һәмин сәһифәләрдән Суријада оларкән аиләси вә Азәрбајҹандакы танышлары илә әлагә сахлајыб. “Инстаҝрам”да јарадылан “абу ҹиһадддд” адлы сәһифә онун истифадәсиндә олуб. Һәмин сәһифәдәки фото вә видеофајллар Суријада чәкилиб вә онун тәрәфиндән пајлашылыб.
Лазым истинтага ҝәлди, ифадә верди: “Оғлум демишди Түркијәдә ишләјир”
Е.Мәммәдовун атасы, шаһид гисминдә диндирилән Лазим Мәммәдов ифадәсиндә дејиб ки, оғлу Елдәниз она һәбсдән чыхдыгдан сонра 2013-ҹү илдә ишләмәк мәгсәдилә Түркијәјә ҝетдијини демишди. Вә Елдәниз бир нечә дәфә онларла әлагә сахлајараг мағазалардан бириндә рус дили үзрә тәрҹүмәчи ишләдијини дејибмиш.
“2014-ҹү илин јанвар ајына гәдәр Елдәнизин Суријаја кечмәси вә силаһлы мүнагишәләрдә иштирак етмәси илә бағлы мәлуматым олмајыб. Елә билирдик ки, Түркијәдәдир. Чүнки зәнҝ вуранда бизә орада олдуғуну дејирди”-атасы дејиб.
Л.Мәммәдов ифадәсиндә ҝөстәриб ки, оғлу ҝери гајытдыгдан сонра Бакыда ара-сыра тиҹарәтлә мәшғул олуб. Сонра исә ишләмәк ады алтында Украјнаја ҝедиб. Дөрд ај оғлу илә әлагә сахлаја билмәјиб. Сонрадан Елдәниз өзү зәнҝ вурараг атасына Суријада олдуғуну билдириб.
“Фәрат чајында чимирди, деди бу чај Ҹәннәтдән башлајыр....”
Лазымын ифадәсиндән: “Баша дүшдүм ки, гачыб силаһлы бирләшмәләрә гошулуб. Она аҹыгландым, бу һәрәкәтинин дүзҝүн олмадығыны, орада баш верәнләрин бир ојун олдуғуну, ону алдатдыгларыны дедим. О, исә ејни шејләри тәкрарлады. Бу данышыгдан сонра Елдәниз бир дәгигәлик видео ҝөндәрди. Видеоҝөрүнтүләрдә Фәрат чајында чимдији ҝөрүнүрдү. Зәнҝ вуруб Фәрат чајында чимдијини, бу чајын башланғыҹыны Ҹәннәтдән ҝөтүрдүјүнү деди. Јенә дә аҹыгланыб дедим ки, сәнин Суријада нә ишин вар, гајыт ҝәл. Мәнә гулаг асмады. Бу данышыгдан беш-алты ај сонра өзү зәнҝ вуруб Түркијәдә олдуғуну деди”
Мәһкәмәнин һөкмү илә Е.Мәммәдов 15 ил 6 ај мүддәтинә азадлыгдан мәһрум едилиб.
Хатырладаг ки, ИШИД-ин вә Суријада, Ирагда фәалијјәт ҝөстәрән диҝәр террорчу груплашмаларын сыраларында дөјүшән јүзләрлә Азәрбајҹан вәтәндашы өлдүрүлүб. Онлардан бир гисми саламат Азәрбајҹана гајытмаға наил олсалар да һәбс едилибләр вә узунмүддәтли ҹәзалара мәһкум едилибләр.
Диггәт: Хәбәрдән истифадә етдикдә мәнбәјә истинад лазымдыр
