Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, вәкил Ҹавад Ҹавадов Маиде.аз сајтына мүсаһибә верәрәк дејиб: “17 сајлы ҹәзачәкмә мүәссисәсиндә сахланылан Азәрбајҹан Руһаниләр Мәҹлисинин (АРМ) үзвү, Маиде.Аз сајтынын баш редактору, намаз мәһбусу Шејх Сәрдар Һаҹыһәсәнли (Бабајев) илә ҝөрүшдүм. Сәһһәти, руһијјәси јахшыдыр. Сахланылма шәраитиндән наразылығы јохдур. Бүтүн достлара саламлары вардыр. Истинтаг вә мәһкәмә дөврүндә она дәстәк олан һәр кәсә, медиа нүмајәндәләринә бир даһа тәшәккүрүнү билдирди.”
О, билдириб ки, Шејх Сәрдар “Сәрдар Бабајевлә Али Мәһкәмәјә верилән касасија шикајәтини мүзакирә едиб:
“Ҝәлән һәфтә онун тәгдим олунмасыны разылашдырдыг. Ејни заманда тәрәфимиздән Азәрбајҹан Республикасы Конститусија Мәһкәмәсинә Азәрбајҹан Республикасы Ҹинајәт Мәҹәлләсинин 168-1.1. маддәсинин (Ислам дининә аид ајин вә мәрасимләрин хариҹдә дини тәһсил алмыш Азәрбајҹан Республикасынын вәтәндашы тәрәфиндән апарылмасы) Азәрбајҹан Республикасынын Конститусијасына вә тәрәфдар чыхдығы бејнәлхалг мүгавиләләрә (Әсас Ганунун 25, 48, 149.1, һәмчинин "Инсан Һүгуглары вә Әсас Азадлыгларынын Мүдафиәси " һаггында Авропа Конвенсијасынын 9, 14-ҹу, БМТ-нин "Үмумдүнја инсан һүгуглары бәјаннамәси"-нин 18-ҹи маддәсинә) ујғун олмамасына вә гүввәдән салынмасына даир шикајәт ҝөндәрилир. Үмид едирик ки, Конститусија Мәһкәмәсинә мүраҹиәт етмәк һүгугу олан башга субјектләр дә өлкәмизә баш уҹалығы ҝәтирмәјән һәмин антиконститусион норманын гүввәдән салынмасы үчүн Конститусија Мәһкәмәсинә мүраҹиәт едәҹәкләр".
Гејд едәк ки, руһани артыг Шүвәлан һәбсханасындан Бинә гәсәбәсиндә јерләшән 17 сајлы ҹәзачәкмә мүәссисәсинә көчүрүлүб.
Хатырладаг ки, Шејх Сәрдар Һаҹыһәсәнли Масаллы рајонунун мәсҹидиндә намаз гылдығына вә дини сөһбәтләр етдијинә ҝөрә рајонун иҹра башчысы онун барәсиндә полисә шикајәт едиб. Шикајәт әсасында руһанијә ҹинајәт иши ачылыб вә барәсиндә һәбс гәтимкан тәдбири сечилиб.
Ијул ајынын 3-дә Масаллы Рајон Мәһкәмәсиндә Анар Алмурадлынын сәдрлији илә кечирилән просесдә Шејх Сәрдара һөкм охунуб. Мәһкәмәнин гәрары илә Шејх Сәрдар Һаҹыһәсәнли 3 ил мүддәтинә азадлыгдан мәһрум едилиб.
Сентјабр ајынын 25-дә Ширван шәһәр апелјасија мәһкәмәси апелјасија шикајәтини тәмин етмәјиб вә Масаллы рајон мәһкәмәсинин һөкмүнү гүввәдә сахлајыб.
Диггәт: Хәбәрдән истифадә етдикдә мәнбәјә истинад лазымдыр
