Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, августун 21-дә Бакы Ағыр Ҹинајәтләр Мәһкәмәсиндә Нардаран һадисәләриндән сонра сахланылан Гуран Һафизи Һөҹәтүл Ислам Һаҹы Зүлфүгар Микајылов, Һөҹәтүл Ислам Һаҹы Елман Ағајев, Һөҹәтүл Ислам Һаҹы Рамил Сејфуллајев, Һөҹәтүл Ислам Һаҹы Рузи Исмајылов диндар активистләрдән Мәшһәди Фаиг Аллаһвердијев, Мәшһәди Меһман Гулијев, Мәшһәди Меһман Мәммәдов, Мәшһәди Елдар Бүнјатов, Мәшһәди Елхан Һәсәнов, Мәшһәди Мүбариз Ибраһимов, Мәшһәди Әли Һүсејнов, вә Мәшһәди Ҹабир Әлијевин гондарма ҹинајәт иши үзрә мәһкәмә иҹласы давам едиб.
Һаким Зејнал Ағајевин сәдрлик етдији просес башламаздан әввәл Зүлфүгар Микајылзадә чыхыш едиб:
"Бу ҝүн Исламын әсл симасы јаваш-јаваш дүнјаја таныныр. Суријада, Ирагда баш верәнләр, бир нечә ҝүн әввәл Испанијада олан террор акты Исламын симасы дејил. Бәзиләри истәјир онлары Ислам кими тәгдим еләсин, амма әкси баш верир. Чүнки бу дин мәнәвијјат динидир, бүтүн инсанлара үнванланан ачыг, конкрет месажлары вар. Истәдиләр ки, бизи дә Ирагда, Суријада дөјүшән террорчуларын давамы кими ҝөстәрсинләр, амма нә олду? Артыг һәр шеј иҹтимаијјәтә ајдын олур".
Бундан сонра һакимин ҝәлмәси илә мәһкәмә просеси башлајыб. Просесдә мүдафиә тәрәфинин вәсатәти әсасында ики һал шаһиди диндирилиб. Шаһидләр тәгсирләндирилән Рамил Сејфуллајев вә Рузи Исмајыловун һәбс епизоду үзрә суаллары ҹавабландырыблар. Илк өнҹә Ҝәнҹәдә сахланылмыш Рамил Сејфуллајевин үзәринә бахыш заманы һал шаһиди олмуш Фазил Гәһрәманов зала дәвәт едилиб. О, бир чох суаллара "јадымда дејил, билмирәм", - дејә ҹаваб вериб. Һал шаһиди буну Гарабағ вә Әфганыстан мүһарибәси заманы алдығы "кантузија" илә әсасландырыб:
"Полисин габағындан кечирдим, мәни чағырдылар, ҝирдим ичәри. Ики полис чағырды, мән дә мараг үчүн ҝирдим. Гараторбаварды, онуничиндән "Ф-1" гумбараларывәжурналларварды. Нә ҝөрдүм, ону да изаһатда јаздым"
Ф.Гәһрәманов даһа өнҹә вә сонра һеч бир просесдә һал шаһиди олмадығыны дејиб. Ондан сонра диҝәр һал шаһиди Гошгар Әлијев диндирилиб. О, Рузи Исмајыловун үзәринә бахыш заманы шаһидлик етдијини билдириб:
"Полис идарәсинин габағындан кечирдим, мәни полис, сәһв еләмирәмсә, Елнур мүәллим иди, идарәјә дәвәт еләди. Гошгарын әлиндә компутер чантасы варды, ичиндән "РГД-5" вә "Ф-1" гумбаралары вә наркотик чыхды. Өзү деди ки, бунлары тапыб, сәһв еләмирәмсә, зибилликдән тапдығыны деди".
О, вәкилләрин суалларыны ҹавабландыраркән, Р. Исмајыловун үзәринә бахыш заманы үзүндә хәсарәт изләри олдуғуну, ҝөзүнүн алтында гаралты олдуғуну дејиб.
Р. Исмајылов исә билдириб ки, она зор тәтбиг едәрәк, бу сөзләри демәјә мәҹбур едибләр:
"Ишҝәнҹәләрлә, шантаж едәрәк мәҹбур етдиләр ки, елә дејим".
Просес бунунла битиб. Нөвбәти мәһкәмә иҹласы августун 28-ә тәјин олунуб.
2015-ҹи ил нојабрын 26-да Баш Мүтәшәккил Ҹинајәткарлыгла Мүбаризә Идарәсинин Бакынын Нардаран гәсәбәсиндә кечирдији әмәлијјатда, икиси полис олмагла, 6 нәфәр һәлак олуб. Рәсми иттиһама ҝөрә, радикал силаһлы дәстә полис әмәкдашларына силаһлы мүгавимәт ҝөстәриб вә өләнләр бу гаршыдурмада һәјатларыны итирибләр. Тәгсирләндириләнләр исә ҝүнаһсыз олдугларыны, полисләрин диҝәр полис әмәкдашлары тәрәфиндән өлдүрүлдүјүнү дејирләр.
Нардаранда вә Сабунчу Рајон Полис Идарәсинин гаршысында баш верән һадисәләрә ҝөрә 70-дән чох адам һәбс олунуб. Онларын бир гисминә силаһ сахлама иттиһамы илә илјарымдан 2 ил 6 ајадәк һәбс ҹәзасы кәсилиб, 40 нәфәрдән чох адама исә даһа ағыр маддәләрлә (дөвләт чеврилишинә ҹәһд, террорчулуг, дини нифаг салма вә с.) иттиһамлар верилиб. Үч група ајрылан ҹинајәт иши Бакы Ағыр Ҹинајәтләр Мәһкәмәсинә ҝөндәрилиб. Мүсәлман Бирлији Һәрәкатынын сәдри Тале Бағырзадә вә даһа 17 нәфәрин мәһкәмәси јекунлашыб. Тале Бағырзадә вә Аббас Һүсејновун һәр биринә 20 ил, диҝәрләринә 10 илдән 19 иләдәк һәбс ҹәзасы верилиб. Һәрәси 12 нәфәрдән ибарәт даһа ики групун мәһкәмәси давам едир.
Диггәт: Хәбәрдән истифадә етдикдә мәнбәјә истинад лазымдыр
