Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Ијулун 20-дә Мүсәлман Бирлији Һәрәкатынын сәдри Тале Бағырзадә, АХҸП сәдринин мүавини Фуад Гәһрәманлы вә диҝәр 16 нәфәрин барәсиндә олан һөкмдән верилмиш апеллјасија шикајәти үзрә нөвбәти мәһкәмә иҹласы кечирилиб.
Бакы Апеллјасија Мәһкәмәсиндә кечирилән просесә һаким Әмир Бајрамов сәдрлик едиб. Өтән иҹласда һаким Әфлатун Гасымов тәгсирләндирилән шәхсләрдән биринин чыхышына мүдахилә етмишди, тәгсирләндириләнләр бундан сонра Ә.Гасымову мәһкәмә просесләриндә ҝөрмәк истәмәдикләрини билдирмишдиләр. Бу ҝүн кечирилән проседә мәһкәмә етиразы гәбул етмәдијини ачыглајыб. Үмумиликдә просес галмагаллы кечиб, һакимләр мәһкәмә салонуну тәрк етмәјә мәҹбур олублар.
Иҹласын әввәлиндә Тале Бағырзадә чыхыш едиб. О, һакимијјәти мүхалиф дүшүнҹәли инсанларын бирлијинин горхутдуғуну, бу бирлијин горунмасынын ваҹиблијини вурғулајыб:
"Бизим гәләбәмиз бирликдән кечир. Һакимијјәти һазырда ән чох горхудан мүхалиф дүшүнҹәли инсанларын бирлијидир, биз бу бирлијин позулмасына имкан вермәмәлијик. Бизим шәхсән Милли Шура вә АХҸП рәһбәрлијинә виҹдан борҹумуз вар. Чүнки пис вәзијјәтдә олдуғумуз һалда онлар бизә јардым етди. Пејғәмбәр Мәккә мүшрикләринә гаршы мүбаризәдә јәһудиләрлә сазиш бағламышды. Мүхалифәтчиләр исә нә мүшрик дејил, нә дә кафир. Онлар да бу халгын инанҹлы инсанларыдыр. Биз онларла һеч сазиш дә бағламадыг. Онлар өзләри бизә јардым әлләрини узатдылар. Бу бирлији горумаг лазымдыр. Һеч бир авторитар һакимијјәт динҹ демократик сечкиләрлә һакимијјәтдән ҝетмәјиб. Әлијев режими дә демократик сечкиләрлә һакимијјәтдән ҝетмәјәҹәк, ингилабла девриләҹәкләр. Биз артыг јахынлашмагда олан ингилабын сәсләрини ешидирик. Белә бир сөз вар: "Залымлара мәрһәмәт етмәк, мәзлумлара зүлмдүр", биз дә буна ҝөрә, бу һакимијјәтә мәрһәмәт етмәмәлијик, бүтүн гәзәбимизи јөнәлтмәлијик"
Бундан сонра вәкилләр сон сөзлә чыхыш едибләр. Илк өнҹә вәкил Ҹавад Ҹавадов данышыб:
"Истинтаг материалларында ҝөстәрилир ки, Мүсәлман Бирлији Һәрәкаты гејри-гануни, террор груплашмасы олуб. Сизә хатырлатмаг истәјирәм ки, Тале Бағырзадә МБҺ-ы һәбсдә ола-ола тәсис едиб. МБҺ-нин тәсис конфрансы Азәрбајҹан дөвләт һимнинин охунмасы илә башлајыб, даһа сонра һәрәкат гејдијјата алынмаг үчүн бүтүн һүгуги јоллара баш вуруб. Һансы террор тәшкилаты белә едәр? Бунлар истинтагын нәтиҹәләрини алт-үст едир. Тале Бағырзадә 2011-ҹи илин мај ајындан һәбс һәјаты јашајыр. Бу адам 9 ај истисна олмагла, артыг 7 илдир ки, һәбсдәдир. Ҝөрдүләр ки, она тәзјиг ҝөстәрмәјин јери јохдур, Нардаранда әмәлијјат кечирдиләр. Әмәлијјат заманы һәлак олан полис ишчиси Вүгар Әјјубовун өлүмүнә сәбәб рәсми материаллара ҝөрә ајағындан ган итирмәсидир. 21-ҹи әсрдә бир инсанын ган итирмәдән өлмәси гәрибә һалдыр. Әмәлијјат кечирирләр, бәс өзләри илә нијә амбуланс ҝәтирмәјибләр? Диҝәр полис Исмајыл Тағыјевин өлүм сәбәби кими гарын бошлуғундан ҝүллә јарасы алмасы ҝөстәрилир. Зиреһли ҝөдәкчәдә олан шәхс гарын бошлуғундан неҹә јара ала биләр? Истинтагда олан бу гаранлыг мәгамлара ајдынлыг ҝәтирилмәлидир. Сахланылан шәхсләр ики ај Баш Мүтәшәккил Ҹинајәткарлыға Гаршы Мүбаризә Идарәсиндә ишҝәнҹәләрә мәруз галыб, бу ишҝәнҹәләр иш материалларында гисмән дә олса, өз әксини тапыр. Тибб експертизасында ҝөстәрилиб ки, Тале Бағырзадәнин бәдәниндә ишҝәнҹә изләри вар. Лакин биринҹи инстансија мәһкәмәсиндә әмәлијјатчы Елман Бајрамов деди ки, сахланылан заман Тале Бағырзадәјә һеч бир тәзјиг олунмајыб. Демәли, бу зәдәләр "Бандотдел"дә јараныб. Биз хаһиш едирик ки, ишә бәраәтвериҹи гәрарла хитам верилсин"
Ҹавад Ҹавадовдан сонра диҝәр вәкил Фариз Намазлы чыхыш едиб. О, мәһкәмәјә һеч бир инамынын олмадығыны билдириб:
"Ачығы билмирәм, данышмағымда бир фајда вармы. Бу иш үзрә 17 нәфәрә 22 маддә үзрә иттиһам верилиб. Биринҹи инстансија мәһкәмәсиндә 60-дан чох вәсатәт вердик, һеч бири дә тәмин олунмады. Биз инди данышырыг, сиз гулаг асырсыз, сонра да чај ичиб, гәрар верәҹәксиниз. Һеч олмаса инандырыҹы иттиһамлар ирәли сүрүләјди. Иттиһамда ҝөстәрилир ки, Тале Бағырзадә мәсҹидләрдә, мәҹлисләрдә етдији чыхышларда ашкар шәкилдә халгы конститусион гурулушу дәјишмәјә чағырыб. Онларын белә нијјәти олсајды, буну ашкар шәкилдә билдирмәздиләр. "Нардаран иши" үзрә үмумиликдә 47 нәфәр һәбс олунуб. 47 нәфәрлә дөвләт чеврилиши етмәк олмаз. Һеч олмаса бир нечә мин инсаны тутардылар, ондан сонра бу иттиһам инандырыҹы ҝөрүнәрди. "Тале Бағырзадәнин мүраҹиәти" адланан китаб 6-7 сәһифәдән ибарәтдир. Орада Тале Бағырзадәнин мүавини Елчин Гасымова верилән ишҝәнҹәләрдән бәһс олунур. Елчин Гасымов 2015-ҹи ил нојабрын 5-дә һәбс олунуб. Мәһкәмәдә шаһидләрдән бири деди ки, она август ајында бу китабчадан верибләр. Август ајында нојабр ајында олан һадисәләр неҹә тәсвир олуна биләр? Бу адамлар демократик гурулуш уғрунда мүбаризә апарырлар. Онларын узунмүддәтли һәбс олунмасы о демәк дејил ки, бу јолдан чәкинәҹәкләр. Белә бир дејим вар ки, әдаләт топалды, ҝеҹ јерисә дә, ҝедәҹәји јерә ахыр-әввәл чатыр. Она ҝөрә гәрар верәндә виҹданлы вә әдаләтли олун"
Даһа сонра әлавәләр етмәк үчүн сөз дустаглара верилиб. Илк өнҹә тәгсирләндирилән Агил Исмајылов данышыб:
"Сиз бизим 26 нојабрда јашадыгларымызы јашамамысыныз. Адама ағыр ҝәлән одур ки, гардашыны ҝөзүнүн габағында өлдүрәләр, адам да чарәсизҹә баха. 25 нојабрда инсанлары машында дөјә-дөјә өлдүрдүләр. Мејитләрин үзәринә чыхыб, әл-голуну сындырырдылар. Бизә верилән 22 маддәдә иттиһам өзләрини аиддир. Террорла мәшғул оланлар бизи террорда иттиһам едир. МБҺ јеҝанә һәрәкатдыр ки, өлкәдә бирлик јаратмаға чалышыб. Һакимләр тохунулмаз шәхсләрдир, амма "Бандотдел"дән горхурлар. Һаким шаһидә зәнҝ вуруб, мәһкәмәјә ҝәлмәмәјини истәјирсә, бу, горхунун әламәтидир"
Бу заман һаким онун маһијјәтдән кәнар данышдығыны билдирәрәк, чыхышыны давам етдирмәсинә иҹазә вермәјиб. Бундан сонра диҝәр тәгсирләндирилән Ибраһим Худавердијев чыхыш едиб:
"Мәһкәмәјә кими бурада һәбс олунан шәхсләр бир-бирини танымырды. Истәјирсинизсә, онларын телефон зәнҝләрини јохлатдырыб, буна әмин ола биләрсиниз. Биз һеч бир-биримизә зәнҝ вурмамышыг. Мән савадсыз адамам, јазыб-охумағы баҹармырам, амма ҝөрүн неҹә биријәм ки, Илһам Әлијев мәни өзүнә рәгиб билиб, һәбс етдирди"
Һаким Ибраһим Худавердијевин дә сөзләрини кәсәрәк, маһијјәтдән кәнар данышдығыны билдириб. Бу, тәгсирләндириләнләрин наразылығына сәбәб олуб. Онлар һакимә ирадларыны билдирибләр. Тәгсирләндирилән Фуад Гәһрәманлы һакимә дејиб ки, о, бурада инкивизисија мәһкәмәси гурмаға чалышыр:
"Сиз бурада инкивизисија мәһкәмәси гурмаға чалышырсыныз. Амма сизин истәдијиниз олмајаҹаг. Бу адамлар дөвләт чеврилишиндә иттиһам едилирләр, нәдән данышмалыдырлар? Картофдан данышасы дејилләр ки. Горхмајын, бизим сөзүмүзә ҝөрә, сиз мәсулијјәт дашымырсыныз, биз дашыјырыг, биз ҹаваб верәҹәјик. Һеч Әлөвсәт Аббасов белә етмирди"
Бундан сонра мәһкәмә коллеҝијасы мүшавирәјә ҝедиб. Фасилә заманы тәгсирләндириләнләрдән Закир Мустафајев мәһкәмә салонундакы шәхсләрә мүраҹиәт едиб:
"Мәсҹидләрдә намаз гылмагла иш битмир. Өзүнә мөмин дејән шәхсин вәзифәсидир ки, ҝәлиб бура, бизләрә дәстәк олсун. Анд олсун, биз һеч нәдән горхмуруг, мәним 85 јашлы анам вар, ону да гурбан вермәјә һазырам. Биз галиб ҝәләҹәјик, һеч нараһат олмаға дәјмәз"
Һакимләр фасиләдән гајытдыгдан сонра тәгсирләндириләнләрә сөз верилмәјәҹәјини, дөвләт иттиһамчысынын чыхыш етмәли олдуғуну билдирибләр. Бу, залда отуран вә тәгсирләндирилән шәхсләрин наразылығына сәбәб олуб. Онлар билдирибләр ки, тәгсирләндириләнләрин чоху һәлә өз әлавәләрини етмәјиб. Бу заман мүбаһисә јараныб. Тәгсирләндириләнләр әлләриндәки су бутулкаларыны вә ајаггабыларыны һакимә атыблар, јаранан галмагал заманы һакимләр залдан чыхыб. Просеси изләмәјә ҝәлән шәхсләр исә салондан чыхарылыб. Вәкилләр дә мәһкәмәни тәрк едибләр. Тәхминән 15-20 дәгигә фасиләдән сонра һакимләр зала гајыдараг, вәкилләр олмадан гәрары елан едибләр. Онлар Бакы Ағыр Ҹинајәтләр Мәһкәмәсинин вердији һөкмү гүввәдә сахлајыблар. Вәкилләр баш верән инсидентдән сонра тәгсирләндириләнләрә "карсер" ҹәзасынын верилә биләҹәјини дејирләр.
Бакы Ағыр Ҹинајәтләр Мәһкәмәсинин һөкмү илә Тале Бағырзадә 20, Аббас Һүсејнов 20, Фуад Гәһрәманлы 10, Ҹаббар Ҹаббаров 19, Расим Ҹәбрајылов 17, Шамил Абдуләлијев, Закир Мустафајев, Ҹаһад Бабакишизадә, Аббас Гулијев, Ибраһим Худавердијев, Етибар Исмајылов, Бәһруз Гулијев, Әли Нуријев, Әлибала Вәлијев, Фәрһад Балајев вә Аббас Тағыјевин һәр бири 14 ил 6 ај, Рамин Јарыјев вә Агил Гулијев исә 10 мүддәтинә азадлыгдан мәһрум едилибләр. Талеһ Бағырзадә вә Аббас Һүсејнов ҹәзаларынын 7 илини гапалы режимдә чәкәҹәкләр. Һәмин шәхсләрин барәләриндә олан һөкмдән верилән апелјасија шикајәтләриндә онларын барәләриндә бәраәт һөкмүнүн чыхарылмасы истәнилиб.
2015-ҹи ил нојабрын 26-да Нардаран гәсәбәсиндә кечирилән әмәлијјат заманы адлары гејд едилән шәхсләр һәбс едилиб. Онлар Ҹинајәт Мәҹәлләсинин бир сыра маддәләри илә иттиһам олунурлар. Әмәлијјат заманы 2 полис, 4 кәнд сакини һәлак олуб.
Т. Бағырзадә вә диҝәрләри иттиһамы гәбул етмирләр. Онлар ишҝәнҹәјә мәруз галдыгларыны, иттиһам сахта олдуғуну билдирирләр. Т. Бағырзадә бундан әввәл бир нечә дәфә һәбс едилиб. О, һакимијјәти сәрт тәнгид етмәси илә таныныб. Т. Бағырзадә чыхышларына ҝөрә, һәбс едилдијини дејир.
Диггәт: Хәбәрдән истифадә етдикдә мәнбәјә истинад лазымдыр
