Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, бу ил мајын 11-дән 12-нә кечән ҝеҹә, јәни мајын 11-и мәғриб азанындан сонра Шабан ајынын 15-ҹи ҝеҹәси дахил олур. Мајын 12-си исә, Шабан ајынын 15-ҹи ҝүнүдүр.
“Нимеји Шәбан” Шабанын ајынын ортасы анламындадыр. Бу ҝеҹә Гәдр ҝеҹәләриндән сонра ән фәзиләтли ҝеҹәдир. “Тәмизләнмә ҝеҹәси” анламында олан “Лејләтүл-бәрат” адлы бу ҝеҹә Аллаһ Таала илә раз-нијаз етмәк, һаҹәтләри диләмәк, руһән дәјишмәк үчүн јахшы фүрсәтдир. Рәвајәтләрә ҝөрә, бу ҝеҹә Аллаһ (ҹәллә ҹәлалуһ) сонсуз рәһмәтини бәндәләринин үзүнә ачыр. Һәм дә онлар үчүн бәзи һадисәләри тәгдир едир. Һесаб олунур ки, бәндәјә Һәҹҹ зијарәтинин нәсиб олуб-олмајаҹағы бу ҝеҹә мүәјјән олур.
Шабан ајынын 15-ҹи ҝүнү исә, бәшәријјәтин хиласкары һәзрәт Мәһди Саһиб әз-заманын (Аллаһ Онун шәрәфли зүһуруну тезләшдирсин) мөвлуд ҝүнүдүр. Имам Мәһди (Аллаһ Онун шәрәфли зүһуруну тезләшдирсин) Һиҹри Гәмәри тарихи илә, 225- ҹи (милади 840-ҹы) илдә Самирра шәһәриндә дүнјаја ҝөз ачыб. Онун дәјәрли атасы 11-ҹи Имам һәзрәт Һәсән Әсҝәри (әлејһи сәлам) анасы исә, Рома иператорунун гызы һәзрәт Нәрҝиз хатундур (сәламуллаһи әлејһа) .
Бу Ҝеҹәнин Әмәлләри
1- Әһја сахламаг (ҝеҹәнин там јарысындан сүбһ азанына гәдәр ајыг галмаг),
2- Гүсл алмаг (нијјәти беләдир: Нимеји Шәбан гүслу верирәм гүрбәтән иләллаһ),
3- Имкан дахилиндә Гуран охујуб, намазлар гылыб, дуа етмәк төвсијә олунур.
4- Имам Һүсејни (әлејһи сәлам) бу ҝеҹә мәхсус тәрздә зијарәт етмәк. Белә ки, һүндүр вә үстү ачыг бир јерә чыхмалы вә үзү гибләјә дурмалыдыр. Даһа сонра саға вә сола бахмалы, үзүнү ҝөјә галдырыб Имама белә хитаб етмәлисиз: “Әссәламу әлејкә, ја Әба Әбдиллаһ! Әссәламу әлејкә вә рәһмәтуллаһи вә бәрәкәтуһ” (Салам олсун сәнә, еј Әба Әбдиллаһ! Аллаһын саламы, рәһмәти вә бәрәкәти үзәринә олсун).
5- Кумејл дуасыны охумаг,
6- 100 дәфә тәсбиһати-әрбәә (“сүбһанәллаһи, вәлһәмду лиллаһи, вә ла илаһә илләллаһу вәллаһу әкбәр”) вә истиғфар (“әстәғфируллаһ”) сөјләмәк.
7- Сүбһ азанындан өнҹә обашдан јејиб сабаһысы ҝүнү оруҹ тутмаг мүстәһәбдир. Әҝәр киминсә бојнунда гәза оруҹу вә јахуд нәзир кими диҝәр ваҹиби оруҹ вардырса мүтләг бу ҝүн оруҹ тутдугда ваҹиб оруҹуну тутмалыдыр.
Аллаһ Таала етдијиниз бүтүн ибадәтләринизи гәбул етсин! Бизләрә дә дуа един!
Диггәт: Хәбәрдән истифадә етдикдә мәнбәјә истинад лазымдыр
