Әһлибејт (ә) Хәбәр Аҝентлијинин вердији мәлумата ҝөрә-һаким Әлөвсәт Аббасовун сәдрлик етдији иҹласда тәгсирләндирилән шәхсләр вә онларын аилә үзвләринин иштиракына иҹазә верилмәјиб.
Иҹласда Шамил Абдуләлијевин вәкили Зибејдә Садыгова дејиб ки, өтән просесдә мүдафиә етдији шәхслә ҝөрүшән заман конфеденсиаллыг позулуб:
"Биз конвојларын ичиндә ајагүстүндә ҝөрүшдүк вә нәсә даныша билмәдик. Чүнки һамы бизә бахырды. Хаһиш едирәм, буну нәзәрә алын вә нормал шәраит јарадын".
''Сиз һәмин полис әмәкдашларындан мәнәви ҹәһәтдән фәргләнмирсиниз''
Вәкил Јалчын Иманов исә дејиб ки, бу, сијаси ишдир. Һаким исә онун сөзүнү кәсәрәк "биздә сијаси иш јохдур" дејиб. Вәкил Ј. Иманов исә билдириб ки, Вәкилләр Коллеҝијасында онлары коллеҝијадан чыхармагла һәдәләјибләр:
"Бизә дедиләр ки, иҹласда иштирак етмәсәниз, сизи коллеҝијадан чыхардаҹағыг. Биз дә она ҝөрә ҝәлиб бурада отурмушуг. Һалбуки, тәгсирләндирилән шәхсләр биздән имтина едибләр. Әҝәр сијаси иш олмасајды, Дахили Ишләр Назирлији бизим дедикләримизә дәрһал ачыглама илә реаксија вермәзди".
Даһа сонра Ј. Иманов тәгсирләндириләнләрин мәһкәмәјә мүраҹиәтини охујуб. Онлар мүраҹиәтләриндә сојуг зирзәмидә сахланылмаларыны ишҝәнҹә адландырыблар:
"Бу ишҝәнҹә бизә бир Баш Мүтәшәккил Ҹинајәткарлыгла Мүбаризә Идарәсиндә, бир дә мәһкәмәдә верилиб. Бунунла сиз бизә гаршы едилән ишҝәнҹәни давам етдирирсиниз. Сиз һәмин полис әмәкдашларындан мәнәви ҹәһәтдән фәргләнмирсиниз. Бунунла сиз Азәрбајҹан тарихинә сијаси сифаришлә һөкм чыхаран һаким кими дүшәҹәксиниз. Бу әмәлә јол верәнләр Аллаһ гаршысында ҹәзаланадырылаҹаглар".
Һаким исә билдириб ки, һеч бир ишҝәнҹәдән сөһбәт ҝедә билмәз, чүнки бүтүн тәгсирләндириләнләр ејни шәраитдә сахланылыр.
Өлән полисләрин һүгуги варисләри мәһкәмәјә чағрылды
Даһа сонра вәкилләр өлән полисләрим һүгуги варисләринин мәһкәмәјә чағырылмалары барәдә вәсатәт верибләр. Билдирибләр ки, ҝәлмәјәҹәкләри тәгдирдә онларын барәләриндә мәҹбури ҝәтирилмә гәрары чыхарылмалыдыр. Вәкил Јалчын Иманов дејиб ки, һәмин шәхсләр тәгсирләндириләнләрә ән ағыр ҹәза тәләб едибләр:
"Онлар нә билир ки, полисләри ким өлдүрүб? Тәгсирләндирилән шәхсләрин онлара гаршы ифадә верәнләри диндирмәк һаггы вар". Мәһкәмә вәсатәти тәмин етмәјиб. Шамил Абдуләлујевин вәкили Зибејдә Садыгова исә мүдафиә етдији шәхсим анасынын јас мәрасиминдә иштиракына иҹазә верилмәсини истәјиб. Мәһкәмә бу вәсатәти дә тәмин етмәјиб. Һаким билдириб ки, Ш.Абдуләлијев ағыр маддәләрлә иттиһам олундуғу үчүн буна иҹазә верилмир.
Даһа сонра вәкилләр өлән полисләрин мејидләринин екскумасија олунмалары барәдә вәсатәт верибләр. Билдирибләр ки, онлар өләндән сонра мејитләри јарылмајыб. Мәһкәмә вәсатәти тәмин етмәјиб.
Мәһкәмә истинтагы јекунлашыр
Һаким мәһкәмә истинтагынын јекунлашмасы барәдә мәсәләни мүзакирәјә чыхарыб. Вәкилләр исә буна етираз едибләр. Онлар дүзҝүн мәһкәмә арашдырмасы апарылмадығыны дејибләр вә тәгсирләндирилән шәхсләрлә мәсләһәтләшмәк истәјибләр.
Тәгсирләндириләнләр зала гајытды
Мәһкәмәдә фасилә елан едилиб. Фасиләдән сонра тәгсирләндирилән шәхсләрин иҹласда иштиракына иҹазә верилиб.
Просесдә чыхыш едән Талеһ Бағырзадә дејиб ки, она мәхсус олдуғу иддиа едилән мүраҹиәт китабчасы арашдырылмалыдыр: "О китабчаны арашдырмамаг Рамил Усубова хидмәт, Илһам Әлијевә хәјанәтдир. Орада Илһам Әлијевә вә һакимијјәтинә тәһгирләр јазылыб. Сиз билирсиниз ки, мән һәр заман сөзүмү демишәм. Лакин киши кими дејирәм ки, о китабча мәним дејил. Бунунла бағлы Рамил Усубов өзү мәсулијјәт дашыјыр. О китабча арашдырылмалыдыр. Бунунла бағлы мәним Илһам Әлијевә мүраҹиәтим олаҹаг" .
Вәкил Ј. Иманов исә бунунла бағлы експертләрин чағырылыб диндирилмәсини истәјиб.
Фуад Гәһрәманлы исә билдириб ки, она јазылары илә бағлы иттиһам верилиб вә бу јазылар арашдырылмалыдыр:
"Иттиһам неҹә сүбут олунур? Експерт ҝәлмәли вә арашдырылмалыдыр. Бунлар арашдырылмадан неҹә һөкм чыхармаг олар? Сизин адыныз Азәрбајҹан тарихиндә тәгсирләндириләнләрә физики ишҝәнҹә верән һаким кими дүшәҹәк. Ән биабырчы мәһкәмәјә сиз имза атмыш олаҹагсыныз. Һеч бир ҹидди һадисә баш вермәдән бизи просесдән кәнарлашдырдыныз".
Бундан сонра һаким мәһкәмә истинтагынын јекунлашмасыны елан едиб. Чыхыш үчүн сөз прокурора верилиб. Лакин о, чыхыша һазырлашмаг үчүн вахт истәјиб. Иҹлас декабрын 26-да давам едәҹәк.
Диггәт! Хәбәрдән истифадә етдикдә мәнбәјә истинад лазымдыр!
