Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Астаранын Шиәкәран кәнд мәктәбиндә тәһсил алан бир нечә шаҝирдин валидејни билдириб: “Өтән ҝүн сәһәр Астаранын мәктәбләриндә шаҝирдләрә вә мүәллимләрә хәбәрдарлыг олунуб ки, нөвбәти һәфтәдән мәктәбә һиҹабла бурахылмајаҹаглар”.
Валидејнләр мәктәбдә тәһсил алан өвладларына мүнасибәтин дәјишә биләҹәјиндән еһтијатланараг адларынын ачыгланмасыны истәмәјибләр. Онлар билдирирләр ки, мүәллимләрә вә шаҝирдләрә мәктәб директорлары хәбәрдарлыг едиб:
“Индијәдәк дә белә хәбәрдарлыг олурду. Анҹаг бу дәфә дејирләр ки, вәзијјәт ҹиддидир. Һиҹабы чыхармајан мәктәбин гапысындан ичәри бурахылмајаҹаг. Биз буну тәзјиг кими гәбул едирик. Дејирләр, ‘шарф бағлајын, папаг гојун, анҹаг һиҹаб гәти олмаз’”.
“БИР ҺӘФТӘ ҺИҸАБСЫЗ ҜӘЛИН”
Ҝүн әрзиндә Астаранын нә иҹра һакимијјәтиндән, нә дә тәһсил шөбәсиндән мәсәләјә мүнасибәт өјрәнмәк мүмкүн олмаса да, кәнд мәктәбинин мүәллимләри ҝөстәриш ҝәлдијини тәсдигләјибләр. Шиәкиран кәнд мәктәбинин биолоҝија мүәллими Јунус Гуламов дејир, һәгигәтән дә иҹра нүмајәндәләри мәктәбләрә хәбәр ҝөндәриб ки, јахын ҝүнләрдә комиссија ҝәләҹәк, һиҹаблар чыхарылмалыдыр:
“Анҹаг билдирилиб ки, комиссија ҝәлән мүддәтдә – тутаг ки, бир һәфтә һиҹабсыз ҝәлин, комиссија ҝедәр, јенә гәрар өзүнүздүр”.
Јунус мүәллим рәсми гурумларын белә гәрарларына мүнасибәтини дә ҝизләтмир:
“Әлбәттә ки, һиҹаблы мүәллимәләр вә шаҝирдләрин валидејнләри арасында наразылыг јараныб. Бурда һеч кәс өвладына зорла һиҹаб ҝејиндирмир. Ушағын өз сечимидир. Ушаг башыны бағламаг истәјирсә, нијә әлиндән алынмалыдыр, дејилмәлидир ки, олмаз, ҝет папаг гој, јахуд шарф бағла? Совети буна ҝөрә писләјирдик. Ганымыз баһасына мүстәгиллик әлдә етдик, јенә һәмин проблем галмагдадыр. Һалбуки, Түркијәдә бу гадаға чохдан галхыб. Һәтта Канадада һиҹаблылар апарыҹы ролунда чыхыш едә билирләр, Франсада һиҹаблы полисдә дә ишләјә биләр. Азәрбајҹандаса һәр шејә гадаға гојмаг вәрдиш һалыны алыб. Кимсә башыны өртүрсә, диҝәри нијә бундан нараһат олмалыдыр, мәнтиг ҝөрмүрәм”.
Диггәт: Хәбәрдән истифадә етдикдә мәнбәјә истинад лазымдыр
