Әһлибејт (ә) Хәбәр Аҝентлијинин вердији мәлумата ҝөрә Нардаран иши үзрә кечырылән нөвбәти мәһкәмә просесиндә шаһидләр вә мүттәһимләр диндирилиб.
"Сәрдар Бүнјадова тәзјиг едилиб"
Һаким Әлөвсәт Аббасов билдириб ки, Талеһ Бағырзадәнин мүраҹиәт китабчасынын алынмасы үчүн истинтаг органына ҝөндәрдикләри сорғуја ҹаваб олараг һәмин китабча мәһкәмәјә тәгдим едилиб. О, вәкилләрин истәдикләри вахт онунла таныш ола биләҹәкләрини дејиб.
Иҹласда чыхыш едән Аббас Һүсејнов исә дејиб ки, депутат Ағаҹан Әбијев Ислам дини вә пејғәмбәр әлејһинә мүсаһибә вериб.
Талеһ Бағырзадә исә билдириб ки, А.Әбијев Нардаран һадисәләриндән данышыб: "Бу ҹүр адамларын тәфәккүрүнүн нәтиҹәсиндә Нардаран һадисәси баш верди. Мән ушаг вахты боксла мәшғул олмушам. О заман Ағаҹан Әбијев Бокс Федерасијанын сәдри иди. Јәгин ҹаванлығында башына чох зәрбә дәјиб". Һаким исә онларын чыхышыны дајандырараг билдириб ки, данышдыгларынын мәһкәмәјә дәхли јохдур.
Даһа сонра һаким билдириб ки, Сәрдар Бүнјадов вә диҝәр бир нечә шаһид мәһкәмәјә телеграм вурублар: "Онлар истинтага вердикләри ифадәни тәсдиг едибләр. Мәһкәмәјә ҝәлмәк истәмирләр".
Т.Бағырзадә исә дејиб ки, С.Бүнјадова тәзјиг едилиб. О, шаһидләрин диндирилмәсини истәјиб.
Ф.Гәһрәманлы исә просесин узадылмасына етираз едиб. Билдириб ки, шаһидләр мәҹбури ҝәтирилиб диндирилә биләр. Һаким исә дејиб ки, мәҹбури ҝәтирилмә үчүн полис идарәсинә мүраҹиәт едилмәлидир. Лакин бу, өтән дәфә проблем јаратдығы үчүн шаһидләри өзләри мәһкәмәјә чағырырлар.
Даһа сонра һаким билдириб ки, тәгсирләндирилән шәхсләрин истинтаг заманы полис әмәкдашларынын Меһрибан Әлијеваја гаршы налајиг ифадәләр ишләтмәләри һаггында билдирдикләри мәсәлә илә бағлы просесин сонунда мүвафиг гурумлара мәлумат ҝөндәриләҹәк.Т. Бағырзадә исә дејиб ки, онун адындан истинтаг органы тәрәфиндән јазылан мүраҹиәт китабчасында "Оғру Илһам" ифадәси јер алыб: "Бу Рамил Усубов ја башгасынын ҝөстәриши илә едилиб. Ҹәсарәтләри јохдур, һеч олмаса суссунлар. Мәним адымдан данышмасынлар. Мән лазым оланда Илһам Әлијевә сөзүмү демәји баҹарырам".
Просес нојабрын 16-да давам едәҹәк.
abna24.com-Диггәт! Хәбәрдән истифадә етдикдә мәнбәјә истинад лазымдыр!
