Әһлибејт(ә) Хәбәр Аҝентлији-АПА-нын хәбәринә ҝөрә, һаким Әлөвсәт Аббасовун сәдрлији илә кечирилән просесдә шаһид Балабаба Аллаһнәзәров ифадә вериб. О, ибтидаи истинтага вердији ифадәсиндән имтина едиб. Б. Аллаһнәзәров дејиб ки, Фуад Гәһрәманлынын јаздығы статуса шәрһ јазыб вә бурада һәр һансы ҹинајәт јохдур.
Даһа сонра иҹласда шаһид Елхан Мәммәдов ифадә вериб. О да дејиб ки, Фуад Гәһрәманлынын статусуна шәрһ јазыб, буна ҝөрә истинтага ифадә вериб. О, Ф. Гәһрәманлынын фикирләрини гәбул етмәдијини билдириб.
Вәкилләр исә ондан фикирләрини гәбул етмәдији адамын статусуна нијә дәстәкләјиҹи шәрһ јаздығыны сорушублар. О, сосиал шәбәкәни ҹидди һесаб етмәдијини, буну фикирләшмәдән етдијини дејиб. Даһа сонра онун истинтага ифадәси елан едилиб.
О, ифадәсинин бир һиссәсини тәсдиг етмәјиб.
Просес ҝүнүн икинҹи јарысында давам едәҹәк.
Т. Бағырзадә гәсдән адам өлдүрмәкдә, ганунсуз олараг одлу силаһ әлдә етмәкдә вә ҸМ-нин диҝәр ағыр маддәләри илә иттиһам олунур. Өтән ил нојабрын 26-да һүгуг-мүһафизә органларынын әмәкдашларынын Бакынын Нардаран гәсәбәсиндә кечирдикләри хүсуси әмәлијјат заманы Т. Бағырзадә да дахил олмагла 60-дан чох шәхс сахланылыб. Һәмин шәхсләрдән бир нечәсинин ҹинајәт иши диҝәрләриндән ајрылараг Сабунчу рајон Мәһкәмәсинә ҝөндәрилиб, барәләриндә мүвафиг һөкмләр чыхарылыб.
АХҸП сәдринин мүавини Ф. Гәһрәманлы исә өтән ил декабрын 8-дә һәбс едилиб. О, Ҹинајәт Мәҹәлләсинин 281-ҹи (дөвләт әлејһинә ачыг чағырышлар), 283-ҹү ( милли, ирги, сосиал вә ја дини нифрәт вә дүшмәнчилијин салынмасы) вә 220.2-ҹи (һакимијјәт нүмајәндәсинин гануни тәләбләринә фәал шәкилдә табе олмамаға вә күтләви иғтишашлара, һабелә вәтәндашлара гаршы зоракылыг етмәјә чағырышлар етмә) маддәләри илә иттиһам олунур.
