Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән бу ҝүн (ијул ајынын 1-дә) Азәрбајҹан Ыслам Партијасынын нөвбәти Баш Мәҹлиси кечирилиб. Баш Мәҹлис там тәркибдә, јәни бүтүн рајон комитә сәдрләринин вә партијанын али органынын диҝәр үзвләринин иштиракы илә ишинә башлады.
Гуран тилавәтиндән сонра АИП сәдринин биринҹи мүавини Ингилаб Әһәдли сөз алараг топланты иштиракчыларыны саламлады вә кворомун јетәрли олдуғу мәлуматындан сонра мәҹлиси ачыг елан етди.
Топланты иштиракчылары илкин олараг Баш Мәҹлисин ҝүндәлијини мүзакирә етдиләр. Ҝүндәликдә әсасән ашағыдакы мәсәләләр гејд олунмушду:
“Өлкәдә иҹтимаи-сијаси вәзијјәт вә бејнәлхалг аләмдә баш верән һадисәләр, Өлкәмиздә бу илин октјабр ајында кечириләҹәк президент сечкиләринә партијада һазырлыг тәдбирләринин ҝедиши вә сечки илә бағлы АИП-ин диҝәр иҹтимаи, сијаси гурумларла әмәкдашлығы, ҝәләҹәк перспективләр, АИП-дән президент сечкиләриндә намизәдлијин ирәли сүрүлмәси, Исламчы мәһбүсларын азад олунмасы тәләбләри илә бағлы гаршыда дуран вәзифәләр, тәшкилати мәсәләләр вә ҹари мәсәләләр.”
Баш Мәҹлис үзвләри ҝүндәлијә дахил едилән мәсәләләри диггәтлә нәзәрдән кечирдикдән сонра ҝүндәлијин лајиһәсини гәбул етдиләр вә тәсдигләдиләр. Регламент мүәјјәнләшди. Исламчылар ҝүндәликдәки мәсәләләрин мүзакирәсинә башладылар.
Илк мәсәлә барәдә чыхыш едән Акиф Һејдәрли өлкәдә президент сечкиси или илә бағлы иҹтимаи ҝәрҝинлијин артмасы вә буна сәбәб олан амилләрдән данышды. Чыхышда инсанларын сосиал һәјат шәраитинин ағырлығы, ганунларын мәмурлар тәрәфиндән кобуд шәкилдә позулмасы, инсан һагларынын, хүсусән дә исламчы гүввәләрин мүхтәлиф бәһанәләр вә бөһтанларла иттиһам олунараг зинданлара долдурулмасы ачыг шәкилдә гејд олунду. “Дағлыг Гарабағ проблеминин һәллинин, демократик сечки кечирилмәсинә ирадә ҝөстәрилмәсинин, Азәрбајҹанда президент сечиминин јалныз Авропанын, АБШ-ын вә Русијанын дәстәји илә мүмкүнлүјүнүн халгымыза тәлгин олунмасы вә гәбул етдирилмәси бизи Ермәнистана даһа чох јахынлашдырыр, нәинки бизә, халгымыза милли истиглалијјәт газандырыр, әксинә олараг мүстәгиллијимизи, дөвләтчилијимизи мөһкәмләндирмәк әвәзинә зәифләдир.”- дејә, А. Һејдәрли президентлијә намизәдләрин диггәтинә чатдырды.
А.Һејдәрли сонра президент сечкиләринә гурумда һәјата кечирилән һазырлыг тәдбирләриндән, Мәшвәрәт Шурасынын фәалијјәтиндән, гаршыда дуран вәзифәләрдән данышды. О, өлкә әразисиндә- бүтүн бөлҝә вә рајонларда сечиҹи сәлаһијјәтинә малик вәтәндашларын, зијалы, алим вә бүтүн мөминләрин АИП сәдри Һаҹы Мөвсүм Сәмәдова президентлијә намизәдлик барәдә мүраҹиәтләриндән вә гурум гаршысында бу тәклифин ирәли сүрүлмәси тәләбләриндән чыхыш едәрәк вә јүксәк милли, мәнәви, инсани, әхлаги дәјәрләрә малик, сијаси ҹәһәтдән јеткин, јүксәк ирадәли, халга хидмәт бахымындан әвәзсиз тәвазөкар олмасыны нәзәрә алараг АИП сәдри Һаҹы Мөвсүм Сәмәдовун президентлијә намизәдлик тәклифини ирәли сүрдү.
А.Һејдәрлинин бу тәклифини Баш Мәҹлис үзвләр јекдилликлә дәстәкләдиләр. Беләликлә М. Сәмәдов АИП-ин президент сечкиләриндә јеҝанә намизәди олду...
Диггәт: Хәбәрдән истифадә етдикдә мәнбәјә истинад лазымдыр
