Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Инҝилис дилиндә верилишләр јајымлајан Пресс.ТВ телеканалынын мүдири Мәһәммәд Сәрәфраз ачыг бир мәктубда Еутелсат пејк ширкәтинин франсыз-исраилли мүдири тәрәфиндән Иран медиаларына гаршы башладылмыш дүшмәнчилик һәрәкәтләрини гынајыб.
Мәктубда дејилир:
Әзиз ханымлар вә ағалар!
Бу мәктубу Еутелсат-ин мүдири ҹәнаб Мишел До Розенин Ирана гаршы башлатдығы медиа мүһарибәси илә әлагәдар јазырам. О, пејк хидмәтләри һәјата кечирән ширкәтләрә мүхтәлиф мәктублар ҝөндәрәрәк, онлардан истәјиб ки, Иран телеканаллары илә әмәкдашлыгларыны дајандырсынлар. Ҹәнаб Розен өз мәктубларында ПрессТВ вә Иранын диҝәр телеканалларынын јајымларынын дајандырылмасына сәбәб олараг бу санксијалары өнә чәкир:
• 1 – Авропа Бирлијинин Иранын Радио вә Телевизија Тәшкилатынын сәдри ҹәнаб Иззәтулла Зәрғамијә гаршы санксијалары
•2 – АБШ һөкумәти тәрәфиндән Иранын Радио вә Телевизија Тәшкилатына вә онун сәдринә гаршы тәтбиг едилмиш санксијалар
Гејд етмәк јеринә дүшәрди ки, Авропа Бирлији вә Американын Ирана гаршы санксијаларынын сәбәбләри бу өлкә телеканаллары васитәсилә Иранын милли тәһлүкәсизлијинә зәрбә вурмагда иттиһам едилән шәхсләрин етирафларынын јајылмасы олуб. Һалбуки, онларын вәкилләри бу етирафларын иҹтимаиләшдирилмәси илә һеч вахт мүхалифәт етмәјиб вә һәтта, бу етирафларын ганунилијини дә шүбһә алтына апармаг истәмәјибләр. Буна бахмајараг, АБШ вә Авропа Бирлији һәтта, Иранын Радио вә Телевизија Тәшкилатындан һеч бир изаһат истәмәдән вә ја бу мәсәләни гануни вә һүгуги мүстәвидә арашдырмадан, Иран медиасына гаршы гејри-гануни санксијалар тәтбиг едибләр. Иранын Радио вә Телевизија Тәшкилаты бир анда өзүнү јаранмыш вәзијјәтлә бағлы һәр һансы бир изаһат вермәк вә ја өзүнү мүдафиә етмәк имканы верилмәдән, санксијаларла үзләшмиш ҝөрдү. Ҝуја төвсијә едилир ки, пејк ширкәтләри һансыса гәрар гәбул етмәздән өнҹә ҹәнаб Розенин иддиалары һагда арашдырма апарсынлар.
Ашағыда ПрессТВ бәзи мәсәләләри диггәтә чатдырмаг истәјир:
Авропа Бирлијинин хариҹи сијасәт үзрә мәсул шәхси Катрин Ештонун сөзчүсү Мајкл Ман бизим јазылы сурәтдә мүраҹиәтимизин ардынҹа јазылы формада бизә ҹаваб верди ки, бу бирлијин санксијалары һеч бир вәҹһлә Иран медиаларына шамил едилмир вә бу о демәкдир ки, Иран телеканалларынын јајымынын дајандырылмасы үчүн һеч бир сәбәб јохдур.
Гејд олунан мәсәләләрдән белә бир мүһүм вә ҹидди суал јаранмыш олур ки, нә үчүн ҹәнаб Розен Америка вә АБ тәрәфиндән Иран телеканалларына гаршы санксијаларын тәтбиг едилмәдији бир шәраитдә Иран телеканалларынын јајымларынын дајандырылмасында бу гәдәр исрарлыдыр? Ҹәнаб Розенин Иран медиалары илә дүшмәнчилији сөз азадлығы принсипләри илә дә дабан-дабана зиддир. ПрессТВ вә диҝәр Иран телеканаллары Гәрбин сөз азадлығына гаршы бу ҝөрүнмәмиш дүшмәнчилијинә гаршы шикајәт етсин.
Бундан башга Иран медиалары чалышаҹаглар ки, дүнјанын үмуми фикрини Гәрбин Интибаһ Дөврүндән(Ренесанс) бәри һуманизм вә сөз азадлығына дәјәрин верилмәси илә бағлы јалан иддиалары вә ријакарлыглары һагда ајдынлатсынлар.
Шүбһәсиз баш верәнләр Еутелсат вә онун мүдиринин алнына вурулмуш рүсвајчылыг дамғасындан башга бир шеј дејил. Бу шәхс бир исраилли олараг јалныз АБШ вә АБ-дә олан сионист лоббиләринин ҝөстәришләринә әмәл етмәклә мәшғулдур.
Һөрмәтлә: Мәһәммәд Сәрәфраз
ПрессТВ-нин мүдири
Диггәт: Хәбәрдән истифадә етдикдә мәнбәјә истинад лазымдыр
