Әһли Бејт (әлејһис сәлам) - АБНА - Хәбәр Аҝентлијинин вердији хәбәрә әсасән АХҸП сәдри Әли Кәримли “Азәрбајҹан сааты” ТВ програмынын сон бурахылышына өлкә ҝүндәми илә бағлы мүсаһибә вериб. Ә.Кәримли әввәлҹә Дашкәсәндә әсҝәр Ҹејһун Губадовун өлдүрүлмәси вә бу хүсусда Азәрбајҹан орудусундакы әсҝәр өлүмләри илә бағлы суаллара ҹаваб вериб.
АХҸП сәдри үмумиликдә ордудакы әсҝәр өлүмләринин мигјасына тохунараг дејиб: “Тәкҹә јола салдығымыз илдә 97 әсҝәримиз ордуда вәфат едиб, онлардан јалныз 16-ы дөјүш шәраитиндә өлүб. 81 әсҝәримиз гејри-дөјүш шәраитиндә ја өлүб, ја да өлдүрүлүб.
Ордуда баш вермиш бу ҹинајәтләрин үстү бир гајда олараг ачылмыр, просес давамлы шәкилдә ҝедир, һәр 3-4 ҝүндән бир һансыа тәгсирсиз ҝәнҹ өвладымыз ја өзбашыналығын, ја ганунсуз мүнасибәтин, ја дөзүлмәз шәраитин – бүтөвлүкдә бу ҹинајәткар ситуасијанын гурбаны олур.
Илһам Әлијев дөвләт башчысы вәзифәсини јеринә јетирдији 9 илдә 700-дән артыг әсҝәримиз беләҹә мүәммалы шәраитдә өлдүрүлүб, өлүб. Бу рәгәми ҝәлин реал мүһарибә вәзијјәтләри илә мүгајисә едәк. Артыг 12-ҹи илдир, Американын рәһбәрлији илә бөјүк бир коалисија Әфганыстанда мүһарибә апарыр. Бу мүһарибәдә һәмин о коалисија гүввәләри 2174 нәфәр итириб. Јәни һәр илдә 100 нәфәрдән ашағы.
Јахуд Ираг мүһарибәсини ҝөтүрәк. Бөјүк Британијанын орда 45-50 минлик гошун континҝенти варды. 10 илдән артыг мүддәтдә Британија ордусу орда 179 нәфәр итки верди.
Бизим бу ҝәнҹ, бәдбәхт едилмиш өвладларымызын гатили ҹинајәткар режимдир. Ҹәзасызлыг мүһити јарадыблар, бүтүн өлкәдә олдуғу кими ордуда да ганунчулуг, низам-интизам јохдур, рүшвәтхорлуг вар вә ән асасы ордунун проблемләринә диггәтсизлик вар.
Азәрбајҹан ордусу өлүм конвејринә чевриллиб, вәтәни мүдафиә етмәк үчүн бөјүтдүјүмүз өвладларымыз мәсулијјәтсизлијин, сахтакарлығын, аҹҝөзлүјүн гурбанлары олурлар”.
Әли Кәримли бу иткиләрә ҝөрә мәсулијјәт мәсәләсиндән данышаркән дејиб ки, ордуда бу гәдәр һадисәләр баш верирсә, она бирбаша рәһбәрлији һәјата кечирән мүдафиә назиринин, онун мүавинләринин, гәрарҝаһ рәисинин, бүтүн орду рәһбәрлијинин мәсулијјәти дашыдығы шәксиздир. Амма орду бүтөвлүкдә ҹәмијјәтимиздән тәҹрид олунмуш гурум дејил. Ордудакы вәзијјәт бүтөвлүкдә өлкәдәки вәзијјәтин бир парчасыдыр. Бу бахымдан АХҸП сәдри һесаб едир ки, јаранмыш вәзијјәтә ҝөрә өлкә башчысы Илһам Әлијев бирбаша мәсулијјәт дашыјыр.
Ә.Кәримли режимин вә ҹинајәтин конкрет иҹрачыларынын мәсулијјәти илә јанашы ҹәмијјәтин, о ҹүмләдән мүхалифәтин мәсулијјәтиндән дә бәһс едиб. Онун фикринҹә, ҹәмијјәтин мәсулијјәти һәддән артыг дөзүмлү, биҝанә олмағы, индијә гәдәр баш верәнләрә ҝөрә һөкумәти мәсулијјәтә дәвәт едә билмәмәсидир. “Индијә гәдәр 700 белә һадисә баш вериб. Анҹаг сон һадисә илә бағлы јаранан вәзијјәт ҝөстәрди ки, ҹәмијјәт азаҹыг сәфәрбәр олунан, нараһатлығыны бирузә верән кими һөкумәт өзүнү јығышдырмаға башлады. Демәли бизим биҝанәлијимиз, һәрәкәтсизлијимиз бунлары тамамилә мәсулијјәтсиз едир. Биз топлум олараг имкан вермәсәк, онлар бу гәдәр өзбашыналыг едә билмәзләр” , - дејә АХҸП сәдри гејд едиб.
Мүхалифәтин мәсулијјәтинә ҝәлинҹә, АХҸП лидери дејиб: “О вахта гәдәр ки, халгы сәфәрбәр едиб Азәрбајҹаны бу режимдән хилас едә билмәмишик, бизим мәсулијјәтимиз вар. Демәли, бизим ҝөрдүјүмүз ишләр јетәрли дејил. Биз мүмкүн оланы да, олмајаны да етмәлијик ки, Азәрбајҹан халгынын гатилиинә чеврилмиш бу машын сырадан чыхарылсын, Азәрбајҹан хилас олсун”.
АХҸП сәдри мүсаһибәнин давамында өлкә башчысы Илһам Әлијевин бејнәлхалг тәшкилат тәрәфиндән “Илин коррупсионери” елан едилмәсинә, АБУ-нун ректору Елшад Абдуллајевин јајдығы видеоларла бағлы мәсәләјә мүнасибәт билдириб.
Диггәт: Хәбәрдән истифадә етдикдә мәнбәјә истинад лазымдыр
