Әһли Бејт -АБНА- хәбәр аҝентлијинин вердији хәбәрә әсасән Ады Штрассерин “Сијаси мәһбус” сијаһысында олан, Исламчы мәһбус Руфулла Ахундзадәнин аиләси өлкә рәһбәрлијинә мүраҹиәт едиб. Азәрбајҹан Республикасынын Президенти Илһам Әлијевә, дахили ишләр назири Рамил Усубова, баш прокурору Закир Гаралова, Милли Мәҹлис үзвләринә вә һүгуг мүдафиәчиләринә үнванланан мүраҹиәтдә билдирилир ки, аилә башчысы һәбс едилдикдән сонра онлара тәзјигләр едилир. Мүраҹиәтдә дејилир: “Јазыб Сизә билдирмәк истәјирик ки, аиләмизин башчысы Руфулла Ахундзадә 21 јанвар 2011-ҹи ил тарихдә ҝуја ки, шүбһәли шәхс гисминдә полис тәрәфиндән сахланылыб. Һәмин ҝүн Астара шәһәр, Н.Нәриманов күчәси, ев 170-дә јерләшән евимиздә полис вә прокурорлуг әмәкдашлары ахтарыш апарыблар. Евимиздән дини атрибутлардан башга һеч нә тапа билмәјибләр. Бундан сонра бизә мәхсус олмајан гоншумуза мәхсус јарымтикилидән силаһ-сурсат ашкарлајыблар. Һәмин андан аиләмизин башчысы Руфулла Ахундзадә шүбһәли шәхс гисминдә сахланылыб. Һәмин силаһ-сурсатдан, онун јерләшдији јердән әл вә ајаг изләринин ҝөтүрүлмәсинә ҝөрә експерт чағырылмасы үчүн етдијимиз тәкидләрә бахмајараг, буна мәһәл гојулмајыб. Аиләмизин башчысынын һәбс олундуғу ҝүндән 6 ај ибтидаи истинтагы апарылыб, бу мүддәтдә әлавә маддәләр дә ирәли сүрүлүб. Һәм ибтидаи истинтаг заманында, һәм дә Бакы шәһәр Ағыр Ҹинајәтләр үзрә Мәһкәмәдә кечирилән мәһкәмә истинтагы дөврүндә аиләмизин башчысына гаршы ирәли сүрүлмүш иттиһамлар сүбута јетирилмәјиб. Буна бахмајараг, аиләмизин башчысы һаким Елдар Исмајыловун әдаләтсиз, гәрәзли, сифаришлә чыхардығы һөкмлә 11 ил 6 ај азадлыгдан мәһрум едилиб. Һал-һазырда аиләмизин башчысы һеч бир ҝүнаһы олмадан, һеч бир ҹинајәт ишләтмәдән 2 илә јахындыр ки, һәбсдәдир. Биз буну аиләмизә гаршы ән бөјүк тәзјиг һесаб едирик.Буна бахмајараг аиләмизин башчысы һәбс олундуғу ҝүндән јенә дә аиләмизә гаршы тәзјигләр вар. Һәр ил аиләмизә ајрылмыш үнванлы сосиал јардым 6 ај һәр дәфә ајры-ајры бәһанәләрлә Үнванлы Сосиал Јардым идарәсинин рәһбәри Хәјјам адлы биринин башчылығы илә верилмир. Бунун нәтиҹәсиндә аиләмизин тәбии газа ҝөрә Газ Истисмар Идарәсинә борҹу јараныр. Вә Астара Газ Истисмар Идарәсинин рәисинин ҝөстәриши илә гышын оғлан чағында вә ја һава бир аз сојуглашмаға доғру ҝетдикдә кәсилир. Иҹра Һакимијјәти вә башга идарәләрә мүраҹиәт етдикдә, "аиләнизин башчысы дөвләт әлејһинә данышыб дејә, сизләрә һеч нә дүшмүр" вә саир сөзләрлә гаршылашырыг. Амма аиләмизин башчысы һеч вахт дөвләт әлејһинә данышмајыб. Һәр заман мәмур өзбашыналығындан, дөвләт ишчиләринин гануназидд әмәлләриндән данышыб. Ислам динини тәблиғ едиб, Ислам дининә, Гурана, Аллаһын әмрләринә гаршы чыханларла мүбаризә апарыб.
Сизләрдән истәјимиз тезликлә бу әдаләтсизлијә сон гојулмасы, аиләмизин башчысынын азад олунмасы, аиләмизә гаршы тәзјиг вә тәгибләрә сон гојулмасыдыр. Сон гојулмадығы тәгдирдә, бизи бу өлкәнин вәтәндашлығындан хариҹ един!!!
Имза: Ахундзадә Тамара Талыб гызы
Ахундзадә Мәһәммәдәли Руфулла оғлу
Ахундзадә Фатимә Руфулла гызы
Ахундзадә Үммүлҝүлсүм Руфулла гызы
Ахундзадә Зејнәб Руфулла гызы
Ахундзадә Мәрјәм Руфулла гызы
Ахундзадә Әлимүрсәл Руфулла оғлу”
Диггәт: Хәбәрдән истифадә етдикдә мәнбәјә истинад лазымдыр
