Әһли Бејт -АБНА- хәбәр аҝентлијинин вердији хәбәрә әсасән Австријанын нүфузлу “Дер Стандарт” гәзетиндә Азәрбајҹанла бағлы нөвбәти мәгалә дәрҹ олунуб. “Диссонанслы Еуровисион” адлы мәгаләдә Бакынын “Еуровисион”а һазырлығы фонунда өлкәдә инсан һаглары вә демократијанын бәрбад һалда олдуғу вурғуланыр. Мәгаләдә “Еуровисион” јарышмасына ев саһиблији едән Азәрбајҹанын өзүнү Авропа өлкәси кими тәгдим етмәсиндән, анҹаг бунун там белә олмадығындан сөһбәт ачылыр.
“Сон ијирми илдә нефт буму Бакынын ҝөркәмини хејли дәјишиб, Чохлу сајда тикилиләрә, әјләнҹә мәркәзләринә раст ҝәлмәк олар. Шәһәрдә гадынлар даһа чох Авропа үслубунда ҝејинир, тыхаҹлы күчәләри олан пајтахтын мәркәзиндә ҝеҹә јарыјадәк кичик јашлы ушагларла ҝәзән аиләләри ҝөрмәк олар. Өтән ил ҝөзләнилмәдән “Еуровисион” јашымасында гәләбә газанан Азәрбајҹанда шәнбә ҝүнү јени тикилән “Kристал Һалл”да бу јарышманын финалы кечириләҹәк. Бунунла Илһам Әлијевин рәһбәрлији илә Азәрбајҹан һакимијјәти өлкәни азад, плүралист ҹәмијјәтли Авропа дөвләти кими тәгдим етмәк шансы газаныб. Мүхалифәт, ГҺТ-ләр вә Гәрб тәшкилатлары өлкәдә репрессијаларын олдуғуну вә сөз азадлығынын боғулдуғуну дејир. “Сәрһәдсиз репортјорлар” тәшкилатынын һесабатында сөз азадлығынын вәзијјәтинә ҝөрә Азәрбајҹан 152-ҹи јердә дајаныр. О бу мәсәләдә һәтта Ираг вә Әфганистаны да ҝеридә гојуб”, - дејә Австрија гәзетидәки мәгаләдә билдирилир.
“Дер Стандарт” даһа сонра јазыр ки, Азәрбајҹанын Авропа стандартларына ујғун ҝәлмәмәсини сүбут едән Һејдәр вә Илһам Әлијевләрин шәхсијјәтинә олан пәрәстишдир. Гәзет јазыр ки, өтән әсрин 70-ҹи илләриндә ДТК-нин рәһбәри олан шәхсин сонрадан мүстәгил Азәрбајҹан дөвләтинин баниси елан едилмәси тарихин иронијасыдыр:“Һејдәр Әлијевин шәкилләринә һәр јердә раст ҝәлмәк олар. Бүтүн дөвләт мүәссисәләриндә исә шәкиллә барәбәр онун ҝүлләрлә бәзәдилмиш бүстләри дә вар”. Гәзет Һејдәр Әлијевин 2003-ҹү илдә ағыр хәстә оларкән Илһам Әлијеви варис тәјин етмәсиндән дә бәһс едир.
Гәзет мәгаләнин сонунда Азәрбајҹанда сөз азадлығынын бәрбад һалда олмасына да диггәт јөнәлдиб. “Дер Стандарт” јазыр ки, өлкәдә мүхалифәтчиләрлә јанашы 6 журналист дә һәбсдәдир. Анҹаг Президент Администрасијанын рәсмиси Елнур Асланов һеч бир журналистин јазысына ҝөрә һәбс олунмадығыны дејир. Онун дедијинә ҝөрә, һәмин журналистләр “ганунсуз әмәлләр”, бөһтан вә тәһгирә ҝөрә һәбс олунуб.
Диггәт: Хәбәрдән истифадә етдикдә мәнбәјә истинад лазымдыр
