Әһли Бејт -АБНА- хәбәр аҝентлији- Инҝилтәрәнин “The Guardian” гәзетиндә “Олимпијада үчүн билет” мәгаләсиндә нүфузлу идман вә мәдәни јарышлара инсан һагларыны позан авторитар өлкә башчыларынын гатылмасы мәсәләсиндән бәһс олунур. Мәгаләдә гејд олунур ки, бәзи авторитар лидерләр мәдәни вә идман тәдбирләриндә иштирак етмәјә даһа чох ҹан атыр. Бу ҹүр јарышларын ачылыш мәрасимләринә диктаторларын дәвәт олунмасы исә һәмин тәдбирләрин сијасиләшмәмәсинә ҝөстәрилән ҹәһдләри алт-үст едир. Мүәллиф ону да гејд едир ки, авторитар өлкә башчылары бу тип тәдбирләрдән өзләринин һакимијјәт мараглары үчүн истифадә едир.
“Бу јај Украјна футбол үзрә Авропа чемпионатына ев саһиблији едәҹәк. Өлкә совет стилли авторитаризм идарәчилијинә ҝери дөнүб. Бунунла јанашы, гоншу Беларусда да Авропанын сонунҹу диктатору Александр Лукашенко 2014-ҹү илдә кечириләҹәк һоккеј үзрә дүнја чемпионатына ев саһиблији етмәклә антидемократик режими үзәриндә парылты јаратмаг истәјир. Нөвбәти һәфтә исә бүтүн диггәтләр журналистләрин һәбс олундуғу, сијаси фәалларын тәзјигләрлә үзләшдији Азәрбајҹана јөнәләҹәк. Өлкә ”Еуровисион" јарышмасынын буилки ев саһибидир. Инҝилтәрәли журналистләр јарышмаја тамашачы мөвгејиндән јанашмамалыдыр. Онлар азәрбајҹанлы һәмкарларынын үзләшдији проблемләрә дә диггәт јетирмәлидирләр", - дејә “The Guardian”дакы мәгаләдә вурғуланыб.
Диггәт: Хәбәрдән истифадә етдикдә мәнбәјә истинад лазымдыp
