Әһли Бејт -АБНА- хәбәр аҝентлијинин вердији хәбәрә әсасән Бәрдәнин иҹра һакимијјәтиндә дава дүшүб. Бу барәдә һадисә мартын 28-дә ахшам саатларында иҹра башчысы Видади Исајевин рајон рәһбәрлији илә кечирдији мүшавирәдән сонра баш вериб.
Мәлуматларда дејилир ки, Видади Исајев мүшавирәдә 4 кәндин алагапысыны тәмир етмәји рајонун мәдәнијјәт вә туризм идарәсинин мүдири Солтан Һәсәнова тапшырыб. Солтан Һәсәнов иҹра башчысынын бу тапшырығына етираз едиб. Идарә мүдири билдириб ки, тәмир ишләрини апармаг үчүн онда вәсаит јохдур. Видади Исајев она “Идарә мүдирисән, евин вар, мағазаларын вар” дејәрәк вәсаитин олмамасы барәдә онун дедикләринә инанмадығына ејһам едиб. Идарә мүдиринин ҹавабы белә олуб: “Мағазалар ишләмир, ев исә һамыда вар. Бундан әввәл дә Ленин адына паркы мәнә тәмир еләтдирдиниз. Инди дә бу иши тапшырырсыныз. Мән өз үзәримә дүшән иши етмишәм”.
Бу заман Видади Исајев ондан әризәсини јазыб ишдән чыхмағы тәләб едиб. Солтан Һәсәновун ҹавабы сәрт олуб: “Мәним назирим вар, сиз кимсиниз ки, сөзүнүзлә әризә јазым?! Бир дә ки, мән абадлыг ишләри үчүн сизә 200 мин манат пул вермишәм, һәмин пулу гајтарын әризәми јазым”.
Бундан сонра тәһсил шөбәсинин мүдири Рәһилә Исмајылова вә Бәрдәнин Әли адлы иҹра нүмајәндәси чыхыш едәрәк Видади Исајеви мүдафиә едиб. Иҹра нүмајәндәсинин чыхышы Солтан Һәсәнову лап һиддәтләндириб. Идарә мүдири иҹра нүмајәндәсинә билдириб ки, о да иҹра башчысынын тајыдыр. Мүшавирә ҝәрҝин атмосфердә баша чатыб. Мүшавирәдән сонра дәһлиздә Видади Исајевин тикинти мәсәләләри үзрә мүавини Видади Имангулијев Солтан Һәсәнова јахынлашараг онун иҹра башчысы илә бу сајаг данышмасына етираз едиб. Бу идарә мүдири илә башчынын мүавини арасында мүбаһисәјә сәбәб олуб. Мүбаһисә даваја чеврилиб. Видади Имагулијев башы илә Солтан Һәсәновун сифәтинә зәрбә ендириб. Әтрафда олан мәмурлар онлары ҝүҹлә ајырыб.
Видади Исајевлә бағлы башга бир мараглы мәлумат да алмышыг. Һәмин мәлуматда дејилир ки, иҹра башчысынын рајонда уҹалтдығы бајраг артыг 7-ҹи дәфәдир ки, сырадан чыхыр. Һәр дәфә дә бајрағын јенидән уҹалдылмасы үчүн исә һансыса јерли мәмур 1800 манатындан кечмәли олуб.
Диггәт: Хәбәрдән истифадә етдикдә мәнбәјә истинад лазымдыр
