Әһли Бејт -АБНА- хәбәр аҝентлијинин вердији хәбәрә әсасән Вәкил Немәт Кәримли һәбсдә олан ҝәнҹәли диндарлар Һөҹҹәтүл Ислам Һаҹы Асәф Зејналов вә Илһам Әкбәровла ҝөрүшә билмәјиб. “Медиа форум” сајтына данышан вәкил дејиб ки, мартын 1-дә һүгугларыны мүдафиә етдији шәхсләрлә ҝөрүшмәк үчүн Ҝәнҹә Шәһәр Баш Полис Идарәсиндә олуб: “Мәни идарәнин мүстәнтиги Фүзули Шыхыјев гаршылады. О, ҝөрүшүн мүмкүн олмајаҹағыны деди вә билдирди ки, ҝөрүшмәк үчүн разылығы ҝенерал вермәлидир.
Бундан сонра идарәнин рәиси илә ҝөрүшдүм. Рәис, ҝенерал-мајор Расим Мусајев вәкил олдуғуму билән кими аҹыгланды ки, нә вәкил, нә ҝөрүш, бу нә демәкдир? Мән јалныз ордерими тәгдим етмишдим. Расим Мусајевин јанындакы полковник-лејтенант да үстүмә һүҹум едиб деди ки, сән нә данышырсан, бу һәрәкәтинлә ҝенералы тәһгир едирсән? Полисә мүгавимәт ҝөстәрәнләрә нә вәкиллик едирсән?”
Вәкил бундан сонра диҝәр мүстәнтиг Елчин Әзизовла ҝөрүшдүјүнү дејиб: “Мәнә мәктуб верди ки, һәр ики диндары мүдафиә етмәјә әлавә вәкилә еһтијаҹ јохдур. Мәндән Вәкилләр Коллеҝијасындан вәкил кими ишә чыхмаг үчүн әлавә арајыш ҝәтирмәји тәләб етдиләр. Һалбуки Ҹинајәт Просессуал Мәҹәлләнин 97.2-ҹи маддәсинин тәләбләринә ҝөрә, ишә чыхан вәкилин ордер, шәхсијјәт вәсигәси вә вәкиллик вәсигәсини ҝөстәрмәси кифајәтдир”.
Немәт Кәримли мартын 1-дә Ҝәнҹә Шәһәр Прокурорлуғунда олдуғуну дејиб: "Прокурорун биринҹи мүавининә Ҝәнҹә Шәһәр Баш Полис Идарәсиндә ганунсузлугларла гаршылашдығымы билдирдим".
Һөҹҹәтүл Ислам Һаҹы Асәф Зејналов вә Илһам Әкбәров февралын 26-да һәбс едилибләр. Онлар әлијевләр режими тәрәфиндән ШӘРЛӘНИЛӘРӘК хулиганлыгда иттиһам олунур.
Диггәт: Хәбәрдән истифадә етдикдә мәнбәјә истинад лазымдыр
