Әһли Бејт -АБНА- хәбәр аҝентлијинин вердији хәбәрә әсасән Дүнјанын мүхтәлиф өлкәләриндә чалышан америкалы дипломатларын Вашингтона ҝөндәрдији мәхфи телеграмлары фаш едән “WikiLeaks” сајтынын өлкәмизлә бағлы јајымладығы сәнәдләри дәрҹ едирик. АБШ кәшфијјатынын Азәрбајҹандакы сәфирлијинин мүвәггәти ишләр вәкили Доналд Лу Вашингтона үнванладығы 25 феврал 2010-ҹу ил тарихли мәктубунда өлкәмиздә инсан алверинин сәвијјәси вә буна гаршы апарылан мүбаризәдән бәһс едир. Америкалы кәшфијјатчы јазыр ки, Азәрбајҹанда инсан алвери ҝениш јајылыб вә минләрлә инсан ҹинајәткар шәбәкәнин гурбаныдыр.
Коррупсија вә вәзифәдән суи-истифадә Азәрбајҹаны бүрүмүш ҹидди проблемдир
Доналд Лу Азәрбајҹан һакимијјәтинин инсан алверинә гаршы мүбаризәсинә тохунараг јазыб ки, бу истигамәтдә атылан аддымлар јетәрли дејил. Дипломат инсан алверинә гаршы мүбаризә саһәсиндә дә коррупсија һалларынын ҝениш јајылдығыны гејд едиб: “Коррупсија һалларынын ҝениш јајылмасы вә сијаси ирадә чатышмазлығы Азәрбајҹан һөкумәтинин инсан алверинә гаршы мүбаризәсиндә ҹидди проблем олараг галыр. Коррупсија вә мәмурларын вәзифә сәлаһијјәтләриндән суи-истифадә һаллары бүтүн Азәрбајҹаны бүрүмүш ҹидди проблемләрдән биридир. Дәгиг сөјләмәк олар ки, өлкәдә коррупсијанын јүксәк сәвијјәдә олмасы, сијаси ирадә ортаја гојулмамасы, инсан алвери гурбанларынын ашкарланмасы вә һәмин шәхсләрин һүгугларынын бәрпасы үчүн мүраҹиәтләрә мәһкәмәләрдә әдаләтли бахылмамасы һаллары инсан алверинә гаршы мүбаризәјә ҹидди манеәләр төрәдир”.
Коррупсијалашмыш гурумларын сијаһысында Дөвләт Ҝөмрүк Комитәси «лидердир»
АБШ сәфирлијинин бир груп кәшфијјатчыларынын һазырладығы һесабат мәктубунда өлкәмизин игтисади-бизнес мүһити, о ҹүмләдән бу саһәдәки проблемләр ҝөстәрилиб. Дипломатлар өлкәмиздә ән ҹидди проблем олараг коррупсијанын ҝениш јајылмасыны вә дөвләт гурумларынын коррупсија апаратынын башында дурмасыны ҝөстәрибләр.
Мәктубда һөкумәтин коррупсијаја гаршы апардығы мүбаризәнин сәмәрәсиз олдуғу да гејд едилир: “Азәрбајҹанда гејри-нефт секторуна инвестисијаларын гојулмасына коррупсијанын јүксәк сәвијјәдә олмасы ҹидди проблем јарадыр. Коррупсијаја гаршы гәбул едилмиш ганун еффектли олмамагла јанашы, ганундан ирәли ҝәлән тәдбирләрин һәјата кечирилмәсиндә вә гәрарларын иҹрасында да еффектив аддымлар атылмыр. Азәрбајҹан һөкумәти ҝениш јајылмыш коррупсија һалларынын мөвҹудлуғуну етираф етсә дә, ”Transparency International” кими бејнәлхалг тәшкилатларын өлкәдә коррупсијанын сәвијјәсинә ҝөрә тәнгид вә һесабатларыјла разылашмыр”.
Дипломатлар Азәрбајҹанда коррупсијалашмыш гурумларын сијаһысына Дөвләт Ҝөмрүк Комитәсинин “лидерлик” етдијини јазыблар: “Коррупсијалашмыш дөвләт гурумлары арасында Ҝөмрүк Комитәсинин ады даһа чох һалланыб.
Сијаһыда икинҹи јери Верҝиләр Назирлији тутур. Бүтүн өлкә сәвијјәсиндә јајылмыш коррупсија илә јанашы, мәмур өзбашыналығы, вәзифәдән суи-истифадә һаллары да Азәрбајҹанда мөвҹуд олан ҹидди проблемләр сырасындадыр. Мәһз бу сәбәбләрдән хариҹи ширкәтләр Азәрбајҹана инвестисија гојмагда бир о гәдәр мараглы дејилләр”.
Диггәт: Хәбәрдән истифадә етдикдә мәнбәјә истинад лазымдыр
