Әһли Бејт -АБНА- хәбәр аҝентлији- ЈАП рәһбәрлијиндә тәмсил олунан шәхсләр партија үзвләринин сајы илә өјүнмәји адәт едиб. Партија үзвләринин сајынын јарым милјону өтдүјүнү дејән һаким партија функсионерләри бунунла ҹәмијјәтдә нүфузларынын олдуғуну нүмајиш етдирмәк истәјирләр.
ЈАП-ын ачыгладығы статистикаја ҝөрә, партија үзвләринин сајы 527 мин нәфәрә чатыб. Анҹаг һеч кимә сирр дејил ки, диҝәр авторитар өлкәләр кими, Азәрбајҹанда да мәҹбури партијалашдырма мөвҹуддур. Нәинки јүксәк вәзифәләрдә чалышанлар, һәтта сырави ичшиләр, мүәллимләр, һәкимләр, коммунал тәсәррүфатында чалышанлар да мәҹбури шәкилдә һаким партијаја үзв јаздырылыр. Бунунла белә, ЈАП рәһбәрлији мүхалифәт партијаларынын нүфузунун олмадығыны дејир вә бу партијалары ашағыламаға јөнәлән фикирләр сәсләндирирләр. Хүсусилә мүхалифәти гараламагла һәр заман ҝүндәмдә олан ЈАП иҹра катибинин мүавини Сијавуш Новрузов ҹәмијјәтдә кифајәт гәдәр нүфузу олан апарыҹы Мүсават вә АХҸ-ни партија сајмадығыны дејиб. Анҹаг тарих вә һазырда дүнјада баш верән просесләр ҝөстәрир ки, сыраларынын сүни шәкилдә артырылмасы чәтин анда партијанын дадына чатмыр. Буна ән бариз нүмунә кими Коммунист партијасыны ҝөстәрмәк олар. Совет һакимијјәти дөврүндә ССРИ әһалисинин 10 фаизи, тәхминән 19 млн адам Коммунист партијасынын үзвү олуб. Онлардан тәхминән 400 мини Азәрбајҹанын пајына дүшүрдү. Анҹаг совет республикаларында милли азадлыг һәрәкаты баш галдыранда 19 милјонлуг партија бунун гаршысында дајана билмәди. Ингилабларын баш вердији әрәб өлкәләринә нәзәр саланда да ејни мәнзәрәни ҝөрмәк олар. Өтән ил ингилаб нәтиҹәсиндә һакимијјәтдән деврилән Һүснү Мүбарәкин рәһбәрлик етдији Милли-Демократ Партијасынын сыраларында 2,5 млн үзв олуб. Бу да 80 милјонлуг Мисир әһалисинин 3 фаизини тәшкил едиб. Анҹаг ингилаб баш галдыранда 2,5 милјонлуг партија халг үсјаны гаршысында аҹиз галды. Үстәлик дә бу гәдәр үзвү олан партија мөвҹудлуғуну да горујуб сахлаја билмәди. 2011-ҹи илин апрелин 16-да Мисирин Али Инзибати Мәһкәмәси онун гејдијјатыны ләғв едиб.
Тунисдә дә деврилмиш президент Зејналабдин Бин Әлинин тәмсил олундуғу Конститусион Демократик Бирлик өз сыраларында 2 милјон адам ҹәмләшдирмишди. Бу да 10 милјонлуг Тунис әһалисинин бешдә бир һиссәсини тәшкил едирди. Анҹаг бу гәдәр үзвү олан партија да халг үсјаны гаршысында таб ҝәтирә билмәди. 2011-ҹи илин февралында бу партијанын да фәалијјәтинә гадаға гојулду.
Бунун үчүн бир нечә мисал да чәкмәк олар. Анҹаг тарих сүбут едиб ки, партија сыраларынын сүни шәкилдә артырылмасы һеч бир диктатора вә авторитар режимә көмәк етмәјиб.
Инзибати јолларла үзвләринин сајыны шиширтмәјин һеч бир партијаја фајдасы олмајыб. Чүнки партијаја рәғбәт онун партбилетләринин сајы илә өлчүлмүр. Һеч кәсә сирр дејил ки, Азәрбајҹанда минләрлә инсан иш јерини итирмәмәк үчүн ЈАП үзв олмаг мәҹбуријјәтиндә галыб. Өлкәдә күтләви наразылыг баш галдыраҹағы тәгдирдә исә бу шәхсләр һеч бир һалда ЈАП-а дајаг олмајаҹаг. ЈАП үзвләринин дә буну билмәси јахшы оларды.
Диггәт: Хәбәрдән истифадә етдикдә мәнбәјә истинад лазымдыр
