Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Хәтаи рајону, НЗС гәсәбәси, Илһам Мәммәдов күчәсинин сакинләри евләринин Дөвләт Нефт Ширкәти (АРДНШ) тәрәфиндән сөкүлмәсинә ҝөрә јенидән күчәләрә чыхды. Мүхалифәтин издиһамлы митингләриндән һеч дә фәргләнмәјән вә тәхминән 300 нәфәрин иштирак етдији аксијанын гаршысыны алмаг һеч ҹүр мүмкүн олмады.
Сакинләр әввәлҹә АРДНШ-ин И.Мәммәдов күчәсиндә сонрадан тикдији һасарын гаршысына јығышараг бу гурумун рәһбәрлијинә ләнәт охудулар. Сонра издиһамлы митинг далғасы И.Мәммәдов күчәсинә доғру јөнәлди. Бурада да зәрәрчәкәнләр дөвләт башчысыны АРДНШ рәһбәрлијинин ганунсуз әмәлләринә “дур” демәјә чағырды.
Јерли сакинләр “Јени Мүсават”а ачыгламаларында билдирдиләр ки, сон бир һәфтәдә АРДНШ рәһбәрлији тәрәфиндән мүхтәлиф тәзјигләрә мәруз галыблар. Дөвләт Нефт Ширкәти сакинләрин евләринин сәнәдләрини ганунсуз һесаб едәрәк онлары бир-бир мәһкәмәјә вериб. И.Мәммәдов күчәсиндә јашајан Васиф Шыхалыјев дејир ки, бүтүн мәһкәмә просесләри онларын иштиракы олмадан кечирилиб: “Мәһкәмә вахтилә бәләдијјәдән вә “ЖЕК”дән алдығым сәнәди сахта елан етди. Билирик ки, бунлар АРДНШ рәһбәрлијинин сифариши әсасында едилир. Хәтаи Рајон Мәһкәмәсинин һакими Һабил Мәммәдова тәзјиг едилир. О да бизим әлејһимизә гәтнамә гәбул едир”.
Сакинләр дејир ки, өтән илин декабрында Хәтаи Рајон Иҹра Һакимијјәтинин гәбулунда олублар. Иҹра башчысы исә сакинләрә проблемләри илә марагланаҹағы вәдини вериб: “Инди мәһкәмә дејир ки, евини сөк, торпағы АРДНШ-ә вер, 103 манат ҹәримә өдә. Ахы нијә? Биз ки, бурда ганунсуз мәскунлашмамышыг. Бүтүн сәнәдләримиз гајдасындадыр. Вәзијјәт о һәддә чатыб ки, бунлар Дахили Ишләр Назирлијинин вердији шәхсијјәт вәсигәсини дә сахта сәнәд кими гејдә алыр”.
Нахчыванын Неһрәм кәндиндән ҝәлиб НЗС-дә мин бир әзијјәтлә тикдији евинин һалына јанан 75 јашлы Нәрҝиз Вәлијева исә дејир ки, АРДНШ президенти Рөвнәг Абдуллајев онун гуҹағында бөјүјүб: “Ушаглығы бизим һәјәтдә кечиб. Инди дә евими башыма јыхыр. Биз гәсәбә сакинләри горхмуруг, чәкинмирик. Сонадәк мүбаризә апараҹағыг. Лазым ҝәлсә, Президент Администрасијасынын гаршысында чадыр гуруб отураг аксија едәҹәјик. О ҝүнә кими ки, һагг сәсимизи ешидәҹәкләр”.
Бәзи сакинләр исә дејир ки, бу күчә ҹәбһәјә 13 әсҝәр јола салыб: “Өвладларымыз ермәни илә она ҝөрә үз-үзә дајаныб ки, евләрини башына учурсунлар. О ушагларда һансы вәтәнпәрвәрлик руһу олаҹаг? Һеч олмаса буну дүшүнсүнләр. Ахы президент дә деди вәтәндашлара имкан јарадылсын ки, сәнәдсиз евләрини сәнәдләшдирсинләр”.
Гәсәбә сакини Һөрмәт Вәлијев исә дејир ки, өзү Русијада ола-ола мәһкәмәси кечирилиб вә онун әлејһинә гәрар гәбул олунуб: “Русијада олдуғуму тәјјарә билети вә паспортума вурулан мөһүрлә сүбут едә биләрәм. АРДНШ сакинләри бир-бир мәһкәмәјә вериб. Хәбәримиз олмадан мәһкәмәмиз кечирилиб вә өзүмүзү мүдафиә етмәк һүгугумуз тапдаланыб. Бу ганунсузлуглар барәдә бүтүн инстансијалара мүраҹиәт үнванламышыг. Лакин бу ҝүнә кими сорғумуза ҹаваб верән олмајыб”.
Гејд едәк ки, аксија баш верән саатларда Инсан Һүгуглары үзрә Маарифләндирмә Иҹтимаи Бирлијинин рәһбәри Ирадә Ҹавадова әразијә ҝәлди. Сакинләрин шикајәтини динләјән һүгуг мүдафиәчиси проблемлә бағлы лазыми јерләрә мүраҹиәт үнванладығыны сөјләди. О, гәзетимизә ачыгламасында деди ки, евләри сөкүләҹәк аиләләрин мүраҹиәти илә јахындан марагланыр: “Бизә мүраҹиәт етдиләр ки, бизи мәһкәмә вериб күчәјә төкмәк истәјирләр. Сәнәдләрлә таныш оланда дәһшәтә ҝәлдим. БМТ-нин Игтисади вә Сосиал Шурасында динләмәләр олан әрәфәдә бу хошаҝәлмәз һадисәнин олмасы өлкәмиз үчүн пис нәтиҹәләнә биләр. Бизим тәшкилат һүгуги бир сәнәд кими мүраҹиәт һазырлајыб. 145 аиләдән ики нәфәр президентә мәктуб јазды. Биз буну кампанија кими давам етдирдик. Чүнки онларын адындан бир мәктуб ҝетсәјди, бәлкә дә сәмәрәсиз оларды. Артыг үнванладығымыз мәктубларын чатмасы һагда ҹаваб алмышыг. Президентин ганунсуз тикилиләр һагда гәрарына үмид едән инсанлары бу һала ҝәтирмәк ганунсузлугдур. Һазырда исә апелјасија шикајәтләрини һазырлајырыг”.
НЗС гәсәбәси И.Мәммәдов күчәсиндә јашајанлар нөвбәти аксијаны Президент Администрасијасы өнүндә етмәк үзрә дағылышдылар.
Диггәт: Хәбәрдән истифадә етдикдә мәнбәјә истинад лазымдыр
