Ағалар Мәммәдовун адыны чәкмәдән 2 дәфә онун јазысына мүнасибәт билдирмишәм. Ачығы, онун вә диҝәр атеистләрин игтибас етдији мәнбәләри (һәмин мәнбәләр әсасән атеистик сајтлардыр) орижиналындан охудуғум үчүн “философ” иддиасында олан Мәммәдова ҹаваб јазаркән о гәдәр дә чәтинлик чәкмәдим. Затән атеизмин хиртдәјиндән бир балаҹа сых јапышдыгда гаршы тәрәф, “атеизм садәҹә Танрыны гәбул етмәјән бир доғмадыр” ифадәсини ишләдәрәк арадан сывышыб чыхмаг истәјир. Лакин бу идеолоҝија зәһәрли ијнәсини о заман санҹыр ки, торуна Ислам динини јахшы билмәјән мүсәлман дүшүр. Гысаҹасы, атеизмин шикары Ислам дини һаггында мәлуматы мәһдуд олан мүсәлмандыр.
Әҝәр диггәт едирсинизсә, Ағалар Мәммәдовун Ислама һүҹуму Гәрб атеистләринин мәһсулу олан 101 мөвзудан о јана кечмир . Бу мөвзулар әсасән Аләмләрә рәһмәт олараг ҝөндәрилән Һз. Муһаммәд (с.а.с.)-ин 9 јашлы Һз. Аишә (р.а.) илә евләнмәси, һәмчинин һәјаты боју 9 ханымла аилә гурмасы, Исламын демократијанын әлејһинә олмасы иддиасы, Пејғәмбәр (с.а.с.) шаирләри өлдүртмәси ифтирасы вә саирәләрдән ибарәтдир. Ән мараглысы исә одур ки, сон 200 илдә һәмин мөвзуларын сајыны һеч ҹүр 102-јә галдырмаға мүвәффәг олмајыблар.
Фазил Мустафанын “Фәтва” мәгаләсинә ҹаваб јазан “философ” јенә әнәнәви мөвзулардан истифадә едир: дини бахыш, елми јанашма, Ислам дининин “әрәб дини” олмасы, Һз. Муһаммәд (с.а.с.)-ин бүтпәрәстликдән чыхмасы вә нәһајәт сахта һәдис иддиасы. Ону да гејд етмәлијәм ки, Ағалар Мәммәдовун бу бајағы мөвзулары әлиндә бајраг едәрәк мејдан суламасынын сәбәби биз мүсәлманларын аҹизлијидир. Рафиг Тағынын өлүмү мәсәләсинә Азәрбајҹан ҹәмијјәтиндә мәмә јејәндән пәпә дејәнә гәдәр һәр кәс мүнасибәт билдирди. Һиҹаблы-һиҹабсыз, диндар-динсиз ајрымы олмадан бөјүк әксәријјәт бу өлүмү писләди. Шәхсән мән ҹәмијјәтин белә бир мөвгеји илә разылашмасам да, ортада бу ҹүр мүнасибәт олдуғу һалда 53 нәфәр чыхыб Рафиг Тағынын адындан истифадә едәрәк Ислам динини ашағылајан бәјанат јајдылар. Мәммәдовун ады һәмин сијаһыда биринҹиләр арасында олмасы азмыш кими, инди дә Фазил Мустафаны васитә едәрәк Исламы вә онун пејғәмбәри олан Һз.Муһаммәд (с.а.с.)-и кичилтмәк ҹәһди ҝөстәрир.
Мән Азәрбајҹандан минләрлә километр узагда јашадығым һалда Ағалар Мәммәдову әлимин ичи кими таныјаркән, Азәрбајҹанда јашајан мүсәлманларын ону танымамалары чох тәәҹҹүблүдүр. Журналистин илләр өнҹә “Нијә саггал сахлајырсыныз?” суалына Мәммәдов “Күтләдән фәргләнмәк үчүн” ҹавабы вердикдә ҹәмијјәт һамылыгла “күтлә” кими сусараг “философ”-а мәғлуб олду. Мәммәдов ҹәмијјәт үзәриндә о зәфәриндән сонра мәғлубедилмәзлик титулуну бу ҝүнә гәдәр горумағы баҹармышдыр.
Бу сәтирләри охујаркән елә дүшүнмәјин ки, һәдәфим Ағалар Мәммәдовдур. Әсла вә әсла бу белә дејилдир. Ағалар Мәммәдов һансы идеолоҝијадан олур олсун, нәјә гуллуг едир етсин, о да ҹәмијјәтимизин бир үзвүдүр вә Азәрбајҹанын ҝөзәл-сәфалы торпағындан су ичир. Мәним мүбаризәм шарлатанизмләдир. Бу дүнән дә белә олуб, бу ҝүн дә беләдир, ИншАллаһ руһуму тәслим едәнә гәдәр дә белә олаҹагдыр.
Бу јазыда нә елм вә нә дә дин һаггында јазмаг истәмирәм. Јазаҹагларым шарлатанизмин иддиалары барәсиндә олаҹагдыр.
Шарлатанизм Ислам дининин 1400 ил бундан әввәл мејдана ҝәлдијиндән мүасир тәфәккүрлә ујғунлашмадығыны иддиа едир. Диҝәр јандан исә шарлатанизм ерамыздан 3-4 мин ил әввәл мөвҹуд олмуш гәдим јунан фәлсәфәсини өзүнә рәһбәр тутур. Ҝөрәсән, биз мүсәлманлар нијә шарлатанизмдән сорушмуруг ки, заман бахымдан биздән 1400 ил узагдадыр, јохса ерамыздан 3-4 мин ил әввәл?
Шарлатанизм танрысыз әхлаг нәзәријјәсини һәр ан өнә чыхарыр. Лакин тәҹрүбә бахымдан нүмунә олараг бир әдәд белә динсиз ҹәмијјәт ҝөстәр билмир. Масонларда белә танрыја итаәт фәлсәфәси вардир. Ҝөрәсән, биз мүсәлманлар нијә шарлатанизмдән сорушмуруг ки, танрысыз әхлаг нәзәријјәсиндән данышырсынызса, бизә танрысыз әхлаг тәҹрүбәсини дә ҝөстәрин.
Шарлатанизм елмин инкишафы илә динин ҹәмијјәтдә зәифләјәҹәјини иддиа едир вә һәр шејә елмин ҝөзү илә јанашылмасыны истәјир. Ҝөрәсән, биз мүсәлманлар нијә шарлатанизмдән сорушмуруг ки, оғулун өз анасы вә јахуд баҹысы илә ҹинси әлагәјә ҝирмәсинә елми бахымдан јанашылмалыдыр, јохса дини?
Шарлатанизм инсанын тәкамүл васитәси илә маддәдән (бактеријадан) әмәлә ҝәлдијини вә маддәнин дә мәнәвијјаты олмадығыны иддиа едир. Ҝөрәсән, биз мүсәлманлар нијә шарлатанизмдән сорушмуруг ки, инсанын данышдығы дил онун зооложи тәрәфидир, јохса мәнәви?
Шарлатанизм Ислам дининдә инсан һагларынын олмамасыны иддиа едир. Диҝәр јандан исә Исламын инсана дедији “әшрәфи мәхлуг”, јәни мәхлугатын ән шәрәфлиси фикринә гаршы чыхараг, инсанын инсан дејил, “камил һејван” олдуғуну ирәли сүрүр. Ҝөрәсән, биз мүсәлманлар нијә шарлатанизмдән сорушмуруг ки, инсан әҝәр инсан јох, “камил һејван”-дырса, “камил һејван”-да инсан һагглары һарадан олмалыдыр?
Шарлатанизм мүасирлијин вә инкишафын атеизмә аид олдуғуну иддиа едир. Атеизм исә инсанын руһунун олмасыны рәдд едәр. Диҝәр јандан исә каинатда мүмкүн олан вә билинән үч һәгигәт дәрәҹәсини тәшкил едән маддә, һәјат вә шәхсијјәтдән садәҹә маддә, атеизмә вә онун иддиа етдији руһсуз инсана јахындыр. Ҝөрәсән, биз мүсәлманлар нијә шарлатанизмдән сорушмуруг ки, атеизмин иддиа етдији руһсуз инсан һәјат вә шәхсијјәт олмадан јалныз маддә илә мүасирлијә вә инкишафа неҹә наил ола биләр?
Сонда, һәр заман олдуғу кими сөзүм јенә сәнәдир, еј мәним мүсәлман гардашым. Ики ҝәнҹ балыг јашлы балыгдан “Һәр кәс судан данышыр. Бу су нә олан шејдир? Ону бизә ҝөстәрә биләрсәнми?”-дејә сорушур. Јашлы балыг исә өз нөвбәсиндә: “Судан башга мәнә бир шеј ҝөстәрин, мән дә сизә сују ҝөстәрим” дејәрәк ҹаваб верир. Инди әтрафда һәр шеј Аллаһы хатырлатдығы һалда, биз һәлә дә Аллаһы ҝөрмүрүксә, нә Мәммәдову, нә дә диҝәрләрини гынамаг лазымдыр. Һеч унутмајын ки, шарлатанизми гапыдан говмаг да зилләтдир, шарлатанизмә мәғлуб олмаг да!
Гејд: Әҝәр 2010-ҹу илин јај ајларында достум вә гардашым Гурбан Јагубоғлу мәним Ағалар Мәммәдов илә мәтбуат гаршысында дебатымы тәшкил етсә иди, инди бу ат ојнатмалар да әминәм ки, олмазды.
Руслан Фәрзәлијев
Диггәт: Хәбәрдән истифадә етдикдә мәнбәјә истинад лазымдыр
