Әһли Бејт -АБНА- хәбәр аҝентлијинин вердији хәбәрә әсасән: Декабрын 30-да Нахчыван Мухтар Республикасынын Бакыдакы нүмајәндәлијинин бинасы гаршысында аксија кечирилиб.
Аксијада АХҸП үзвү Зејнал Бағырзадәнин Нахчыванда ишҝәнҹәјә мәруз галмасына вә һәбс олунмасына етираз билдирилиб.
“Гафгазинфо” сајтынын мәлуматына ҝөрә, әразини нәзарәтә ҝөтүрән полисләр аксија башланан андан етиразчылара мане олмаға чалышыблар.
Анҹаг етиразчылар аксијаны кечирмәкдә исрар ҝөстәрибләр вә “Васиф Талыбова истефа” (Васиф Талыбов Нахчыван МР Али Мәҹлисинин сәдридир – ред.), “Биз азадлыг истәјирик” шүарларыны сәсләндирибләр. Полис зор тәтбиг едиб, бир нечә нәфәр аксијачы сахланылараг полис бөлмәсинә апарылыб. Сахланыланлар арасында АХҸП сәдринин мүавини Асәф Гулијев дә вар.
“Мусават” сајты 6 нәфәрин сахланылдығыны, аксија гәтнамәсинин охунмасына имкан верилмәдијини хәбәр верир.
Зејнал Бағырзадәјә 2 ај әввәл Бабәк Рајон Полис Шөбәсиндә чох ағыр ишҝәнҹә верилдији билдирилир. Ҹинајәт Мәҹәлләсинин 310 (вәзифәли шәхсин сәлаһијјәтләрини мәнимсәмә), 320.2 (билә-билә сахта сәнәдләрдән истифадә етмә) вә 178.3.2-ҹи (күлли мигдарда зијан вурмагла дәләдузлуг) маддәләри илә иттиһам олунан Зејнал Бағырзадә барәсиндә декабрын 26-да Нахчыван Шәһәр Мәһкәмәси 3 ајлыг һәбс гәрары чыхарыб.
Диггәт: Хәбәрдән истифадә етдикдә мәнбәјә истинад лазымдыр
