Әһли Бејт -АБНА- хәбәр аҝентлијинин вердији хәбәрә әсасән: Декабрын 17-дә “Толыши сәдо” гәзетинин мәрһум баш редактору, профессор Новрузәли Мәммәдовун мал вә әшјалары мүсадирә олунуб. Әшјалары Јасамал рајонунун мәһкәмә иҹрачыларына вәкил Рамиз Мәммәдов вә һүгуг мүдафиәчиси Һилал Мәммәдов тәгдим едиб.
Һилал Мәммәдов “Азадлыг” радиосуна дејиб ки, бир һәфтә әввәл онлара Јасамал Рајон Мәһкәмәсиндән һәмин әшјаларын тәһвил верилмәси һагда хәбәрдарлыг едилиб: “Хәбәрдарлыг едилди ки, 2008-ҹи ил Ағыр Ҹинајәтләрә Даир Ишләр үзрә Мәһкәмәнин һөкмүндә ҝөстәрилдији, үмуми дәјәри 600 манат һесабланан 1 компүтер столу, 1 стол, 5 стул, Иранда тохунмуш 1 халча, 1 телевизор вә 1 фотоапарат дөвләтә тәһвил верилмәлидир. Әкс тәгдирдә Новрузәли Мәммәдовун һәјат јолдашы ахтарыша вериләҹәк. Бу хәбәрдарлыгдан сонра онун Москвада мүалиҹә олунан 72 јашлы јолдашы бизә мүраҹиәт етди ки, аваданлыглары тапыб тәһвил верәк. Биз вахтилә Новрузәли Мәммәдовун Ирандан 40 маната алдығы халчаны, 4 көһнә стулу вә 1 компүтер столуну вердик. Амма стол, 1 стул, телевизор вә фотоапараты тапа билмәдик.
2008-ҹи илдә чыхарылан мәһкәмә һөкмүндә гејд едилиб ки, мүсадирә олунан бу әшјалары Новрузәли Мәммәдов Иран хүсуси хидмәт органларынын вердији вәсаит һесабына алыб. Һөкмдән сонра бу мәсәлә индијә гәдәр галдырылмамышды. Бу адам һәбсханада вәфат едиб. Бундан сонра онун ики оғлу дүнјасыны дәјишиб. 72 јашлы јолдашы Мәрјәм Мәммәдова БМТ-јә мүраҹиәт едәндән сонра Русијаја көчүб вә һазырда мүалиҹә олунмагдадыр. Бу гәдәр мүсибәт, фаҹиәдән сонра 2 ил әввәл вәфат етмиш адамдан стол, стул, фотоапарат, халча тәләб етмәк чох ҝүлмәли ҝөрүнүр”.
Профессор Новрузәли Мәммәдов Республика Талыш Мәдәнијјәт Мәркәзинин рәһбәри, “Толыши сәдо“(”Талышын сәси”) гәзетинин баш редактору, Азәрбајҹан Милли Елмләр Академијасынын Дилчилик Институтунун сектор мүдири олуб. 2007-ҹи илдә әлијевләр режими тәрәфиндән шәрләнәрәк, дөвләтә хәјанәтдә иттиһам олунараг 10 ил һәбс ҹәзасы алыб. 2009-ҹу ил августун 17-дә Пенитенсиар Хидмәтин Мәркәзи Хәстәханасында мүәммалы тәрздә вәфат едиб. Пенитенсиар Хидмәтин Тибб Баш Идарәси онун баш-бејин ишемик инфарктындан өлдүјүнү ачыглајыб.
Новрузәли Мәммәдов һәбсдә олан заман, 2007-ҹи ил сентјабрын 8-дә аиләнин илк өвлады - 36 јашлы Камран Мәммәдов Бакыда, аиләнин икинҹи - ахырынҹы өвлады олан 37 јашлы Емил Мәммәдов исә 2011-ҹи ил апрелин 16-да Русија пајтахты Москвада шүбһәли формада вәфат едибләр.
Диггәт: Хәбәрдән истифадә етдикдә мәнбәјә истинад лазымдыр
