Әһли Бејт -АБНА- хәбәр аҝентлијинин вердији хәбәрә әсасән: Октјабрын 10-да Азәрбајҹан Ислам Партијасы Идарә Һејәтинин вә һәбс олунан исламчыларын һүгугларыны мүдафиә едән комитәнин бирҝә мәтбуат конфрансы кечирилиб. Конфрансда партија сәдри Елчин Манафов, партија сәдринин биринҹи мүавини Ингилаб Әһәдли, сијаси мәсәләләр үзрә мүавини Акиф Һејдәрли, иҹтимаи мәсәләләр үзрә мүавини Рөвшән Әһмәдли вә башга шәхсләр иштирак едибләр.
Мәтбуат конфрансынын тәшкилатчылары Бакы Ағыр Ҹинајәтләр Мәһкәмәсинин октјабрын 7-дә партијанын һәбсдә олан лидери Мөвсүм Сәмәдов вә диҝәр исламчылар барәсиндә чыхардығы һөкмү әдаләтсиз, ганунсуз вә мәнтигсиз һал кими гијмәтләндирибләр.
Тәдбирдә билдирилиб ки, истәр ибтидаи истинтагда, истәрсә дә мәһкәмә истинтагында гондарма шаһид ифадәләри тәшкил олунуб вә һәмин ифадәләрә әсасланмагла ағыр иттиһамлар ирәли сүрүлүб, нәтиҹәдә исламчылара үст-үстә 65 ил јарым ҹидди режимли, 11 ил шәрти һәбс ҹәзасы верилиб. Конфранс иштиракчыларынын дедијинә ҝөрә, бу гәрар өлкә иҹтимаијјәтини тәәҹҹүбләндириб.
Мәтбуат конфрансында гејд едилиб ки, мәһкәмә истинтагы дөврүндә, хүсусән истинтагын сон ҝүнләриндә мәһкәмәдән әдаләтли һөкм ҝөзләјән вә мәһкәмә бинасынын өнүнә топлашан инсанлар - гадын, киши, гоҹалар дәфәләрлә полис дәјәнәјинә туш ҝәлиб, бәзиләри мүхтәлиф дәрәҹәли бәдән хәсарәти алыб.
Мәтбуат конфрансында чыхыш едәнләр вурғулајыблар ки, белә һәбсләр јалныз сијаси сифариш әсасында һәјата кечирилир: “Бу да нәтиҹәдә өлкәдә мәһкәмәләрин әдаләтини шүбһә алтына алыр, ејни заманда прокурорлуг вә полис органларынын ганунлары кобудҹасына позмасына, иттиһам едиләнләрин һүгугларынын вәкилләр тәрәфиндән сәмәрәли мүдафиә олунмасынын сыфыра ендирилмәсинә, өлкә ганунларынын вәтәндашларын тәһлүкәсизлијини тәмин етмәјә дејил, онлары һәр ҹүр басгы алтында гојмагдан өтрү һүгуг мүһафизә органларынын әлиндә аләтә чеврилмәсинә сәбәб олур”.
Сонда топланты иштиракчылары мәһкум едилән исламчыларын тезликлә азадлыға бурахылмасыны тәләб едибләр. Әкс тәгдирдә онлар гаршы өлкәнин бүтүн иҹтимаи, сијаси тәшкилатларынын бирҝә мүбаризәсинин ваҹиблијини вурғулајыблар.
Диггәт: Хәбәрдән истифадә етдикдә мәнбәјә истинад лазымдыр
