Әһли Бејт -АБНА- хәбәр аҝентлијинин вердији хәбәрә әсасән: Бу ҝүн Ағыр Ҹинајәтләрә Даир Ишләр Үзрә Мәһкәмәдә Азәрбајҹан Ислам Партијасынын сәдри Мөвсүм Сәмәдовун, партијанын сәдр мүавини Вагиф Абдуллајевин, Астара рајон тәшкилатынын сәдри Руфулла Ахундзадәнин, Мөвсүм Сәмәдовун гајыны Фирдовси Мәммәдрзајевин, гоһуму Дәјанәт Сәмәдовун, Масаллы руһаниси Фәрамиз Аббасов вә илаһијјатчы алим Зүлфүгар Микајылзадәнин ҹинајәт иши үзрә нөвбәти мәһкәмә иҹласы шаһид ифадәләријлә давам етдирилиб.
Шаһид гисминдә илк олараг Мирмәммәдов Мирәләсҝәр дәвәт олунду. О, тәгсирләндирилән шәхсләрин әксәријјәтинин Азәрбајҹанын ән танынмыш өвладлары олдуғуну билдирди. Бундан әлавә о, ики мәсҹидин – “Сәкинәханым” вә “Һаҹы Ҹәфәр” мәсҹидләринин ахунду олдуғуну деди: «Үстүмүздә дөвләт нәзарәти вар. Бу сәбәбдән бир дәнә артыг һәрәкәт ола билмәз. Чүнки бүтүн бунлар сонда бизә јөнәләр».
Дөвләт иттиһамчысы: Мәсҹиддә нә гәдәр олурсуз?
М.Мирәләсҝәр: 3-4 саат.
Д.И.: Бәс нә билирсиниз ки, сиз олмајанда кәнар сөһбәтләр олмур?
М.М.: Ҝөзәтчиләр, нәзарәтчиләр вар.
Д.И.: Билирик ки, Ашура ҝүнү һәм ичәридә, һәм дә чөлдә адамлар чох олур. Вә тәбии ки, сиз буна нәзарәт едә билмирсиниз. Бәс сиз әминликлә дејә биләрсиниз ки, Ашура ҝүнү сиз олмајанда башга сөһбәтләр олмур?
М.М.: Там әминликлә дејирәм.
Д.И.: Ола биләр ки, Ашура ҝүнү башыныз гарышсын?
Вәкилләр етираз едир: Тәкрар суаллар верир.
Д.И.: Ахы суала ҹаваб вермир?
Вәкилләр: Хејр, сиз истәдијиниз ҹаваб вермир.
Шәфа ханым: Дәјанәти мәсҹиддә ҝөрмүсүнүз?
М.М.: Валлаһ, мәни бағышласын, бәлкә дә ҝәлиб. Амма мән ҝөрмәмишәм.
Ш.Ҹ.: Фирдовси Мәммәдрзајеви неҹә, мәсҹиддә ҝөрмүсүнүз?
М.М.: “Һаҹы Ҹәфәр” мәсҹидиндә ҝөрмүшәм.
Ш.Ҹ.: Бу мәсҹиддә Фирдовсинин јәһудиләрә гаршы террор, силаһ-сурсат, дөвләт әлејһинә чеврилиш вә саир бу истигамәтдә сөһбәтләринин шаһиди олмусунуз?
М.М.: Әслән ҝөрмәмишәм. Онлар һамысы зәһмәт адамларыдыр. Ҝәлиб намазын гылыб, јенидән ишләринә гачырлар.
Ш.Ҹ.: “Сәкинәханым” мәсҹидиндә дин мүҹтәһидләринин шәкли вармы?
М.М.: Үмумијјәтлә шәкил олан јердә ибадәт еләмәк һарамдыр. Хүсусилә дә мәсҹиддә ҹансыз әшјаларын, ағаҹын, ҝүлүн белә шәкилләри олмур.
Ш.Ҹ.: Јәһуди иҹмасы илә тәмасыныз вар?
М.М.: Бәли.
Ш.Ҹ.: Һеч орадан бир етираз, шикајәт олубму ки, сизин мәсҹидин иҹмасы бизи инҹидир?
М.М.: Онлар јерли адамдыр. Биз онларын, онлар да бизим хејир-шәримиздә иштирак едирләр. Мәҹилсләрдә өпүшүб-ҝөрүшүрүк. Бу вахта гәдәр олмајыб, иншаллаһ да бундан сонра олмајаҹаг.
Ш.Ҹ.: Бәс садә ҹамаатдан неҹә, јәһудиләрә гаршы етираз олуб?
М.М.: Һеч вахт.
ШАҺИД АЗАД ӘЛӘКБӘРОВ: «АДАМ САВАДСЫЗ ОЛАНДА БЕЛӘ ЕДӘРЛӘР?»
Сонра көнүллү сурәтдә шаһидлик етмәк истәјән Азад Әкбәров дәвәт олунду. Хатырладаг ки, А.Әкбәров өтән мәһкәмә иҹласында телеграм васитәсилә сәһһәти илә әлагәдар мәһкәмәдә иштирак едә билмәјәҹәјини, истинтага вердији илкин ифадәсини тәсдигләдијини билдирмишди.
Бу иҹласда исә о, үмумијјәтлә тәгсирләндирилән шәхсләрдән һеч кими танымадығыны билдирди: «Мәнә мүстәнтиг деди ки, «Сәһәр» каналы вар, онун бағланмасы илә әлагәдар чағырылыбсан. Сонра бир дәфә јолда Әлиһүсејнә раст ҝәлдим. Мәнә деди ки, мәһкәмәјә нијә ҝетмәмисән. Дедим нә олуб? Деди ки, Фәрамиз адлы бири вар, онун үзүнә дурубсан. Мән дә дедим ки, адам савадсыз оланда белә едәрләр?».
Дөвләт иттиһамчысы: Протоколу охумусунуз?
Шаһид: Мән јазы јаза билмирәм. Она ҝөрә дә охумамышам. Дедиләр адам лазымды, Иранын каналыны бағламагдан өтрү.
Д.И.: Сәнин сөзүнлә бағлајаҹагдылар, о каналы?
Шаһид: Мән нә билим. Деди гол чәк, мән дә имзаладым.
Д.И.: Демәли Фәрамизи танымырсыныз…
Шаһид: Һеч билмирәм, кимди, нәчиди.
ШАҺИД: “ДЕДИМ, ҜӨРМӘЈӘ-ҜӨРМӘЈӘ ҮЗҮНӘ ДУРА БИЛМӘРӘМ”
Мәзаһир Шаһларов: Әлиһүсејнлә ҝөрүшәндә, онун тәрәфиндән нәсә бир хаһиш, тәзјиг олдуму?
Шаһид: Хејр.
М.Ш.: Бәс Фәрамизин гоһумларындан нәсә тәзјиг олубму?
Шаһид: Хејр.
М.Ш.: Бәс сәни чағыранда нәсә ҹаваб вермисән?
Шаһид: Прокурор чағырды. Деди ҝетмәк истәмирсән? Дедим, ҝөрмәјә-ҝөрмәјә үзүнә дура билмәрәм.
М.Ш.: Мәһкәмәјә телеграм вурубсунуз ки, ифадәни дәстәкләјирсиз?
Шаһид: Билмирәм нә јазылыб. Прокурор деди ки, ҝетмирсәнсә белә јаз.
ФИРДОВСИ МӘММӘДРЗАЈЕВ: “МИСИР МӘРДАНОВ ТӘҺСИЛ НАЗИРИ ОЛАН ЈЕРДӘ БЕЛӘ ОЛУР”
Һаким: Бу өлкә о вәзијјәтә галыб ки, сәнин имзанла канал бағлансын?
Јердәкиләр етираз еләди: «Бу дөвләтин вәтәндашыдыр да.»
Һаким: Јахшы, дејирсән, Әлиһүсејн мәнә белә деди. Ахы о һарадан биләрди ки, сән нә ифадә верибсән?
Шаһид: Мән нә билим?
Анар: Бу суал Әлиһүсејнә үнванланмалыдыр
Руфулла: Намаз гылырам дејән јаланчы шаһидләрә бу суалы верәјдиниз дә...
Һаким: Јазы јаза билирсиз?
Шаһид: Көһнә дилдә, елә-белә.
Һаким: Нечә синиф охујубсан?
Шаһид: Охумамышам.
Фирдовси Мәммәдрзајев: Мисир Мәрданов тәһсил назири олан јердә белә олур.
Һаким ифадәни охуду. Шаһид ифадә илә разылашмадығыны, бу сөзләрин она аид олмадығыны билдирди.
Шаһид: Онлар мәним савадсызлығымдан истифадә едибләр.
Шаһид чыхандан сонра Руфулла Ахундов Рамиз Меһдијевин бир нечә ҝүн өнҹә исламчыларын әлејһинә чыхыш етдијини хатырладараг, онун шаһид кими дәвәт олунмасы һаггында вәсатәт галдырды.
Сонра Ингилаб Әһәдли шаһид кими дәвәт олунду. О, Мөвсүм Сәмәдовун АИП-ин 15-ҹи Баш Мәҹлисинин иҹласында һиҹабдан данышдығыны билдирди вә бу мәсәләдә ону тамамилә дәстәкләдијини деди: «Бир мәсәләни дә гејд едим ки, о, сијаси партијанын лидери кими коррупсија илә әлагәдар да данышмышды. Мән дејәрдим ки, мәһз бу чыхышдан сонра коррупсија илә мүбаризә барәдә фәрман верилди». Партијанын сијаси фәалијјәтинә ҝәлдикдә исә билдирди ки, бу 19 илдә фәгәт маарифчиликлә мәшғул олунуб: «Совет режиминин вурдуғу јаралара фәгәт о, мәлһәм олуб».
Даһа сонра көнүллү сурәтдә шаһидлик етмәк истәјән диҝәр шаһид Намиг Пиријев дәвәт олунду. Хатырладаг ки, Н.Пиријев дә өтән мәһкәмә иҹласында телеграм васитәсилә сәһһәти илә әлагәдар мәһкәмәдә иштирак едә билмәјәҹәјини, истинтага вердији илкин ифадәсини тәсдигләдијини билдирән шаһидләр сырасында иди.
О да үмумијјәтлә тәгсирләндирилән шәхсләрдән һеч кими танымадығыны, она «Сәһәр» каналынын бағланмағы илә әлагәдар мүраҹиәт едилдијини билдирди: «Сонрадан билдим ки, иш башгадыр. Инди утандығымдан күчәјә чыха билмирәм».
Дөвләт Иттиһамчысы: Нәдән утанырсыныз?
Фирдовси Мәммәдрзајев: Бу сөз сизә јаддыр, она ҝөрә билмәзсиз.
Шаһид: Ҹамаат дејир ки, сән гол чәкибсән, онун үстүндә бир молланы тутублар.
ШАҺИД: “СӨЗ-СӨҺБӘТӘ СОН ГОЈМАГ ҮЧҮН ҜӘЛМИШӘМ. НИЈӘ МӘНИМ ҮСТҮМДӘ КИМӘСӘ НАҺАГДАН НӘСӘ ОЛСУН”
Анар Гасымлы: Мәһкәмәјә телеграм вурмусунуз?
Шаһид: Хәстә идим. Полис Идарәсиндән евә зәнҝ олунду. Мән дә вурдум.
А.Г.: Бәс бу ҝүн неҹә ҝәлдиз?
Шаһид: Сөз-сөһбәтә сон гојмаг үчүн ҝәлмишәм. Нијә мәним үстүмдә кимәсә наһагдан нәсә олсун…
А.Г.: ИИР-ин телевизијасыны бағламаг барәдә сизә ким деди?
Шаһид: Танымырам. Јолдан тутуб Ләнкәрана апардылар.
А.Г.: Телеграмын пулуну сиз өдәдиз?
Шаһид: Мән телеграма пул вермәмишәм.
Мәзаһир Шаһларов: Бакыја нечә нәфәр ҝәлдиниз?
Шаһид: 4 нәфәр идик. Азад, мән, Әлиһүсејн бири дә вар иди, бир аз дәлифасон иди.
М.Ш.: Һабили дејирсән.
Шаһид: Һә. Бир аз анормал иди.
М.Ш.: Вурдуғунуз телеграм нә мәзмунда иди?
Шаһид: Дедим ки, мәним адымдан јалан јазыблар.
М.Ш.: Бәс мәһкәмәјә телеграм ҝәлиб ки, сиз илкин ифадәнизи тәсдиг едирсиниз?
Шаһид: Јох, мән елә сөз демәмишәм.
Һаким шаһидин илкин истинтаг заманы вердији ифадәни елан еләди.
Анар Гасымлы: Ифадәдәки сөзләр сизә аиддир?
Шаһид: Анҹаг аиләмлә бағлы олан һиссәләр. Галанлары мәнә аид дејил.
Сонра мәһкәмәнин тәшәббүсү илә чағырылан шаһид дәвәт олунду. Бу, Мәрдан Сәмәдовун дүканында вә Дәјанәт Сәмәдовун евиндә ахтарыш групуна рәһбәрлик едән Садәтдинов Елмар иди. О, һәмин ҝүнү олан ахтарыш барәдә гыса мәлумат верди.
Һәбиб Әлијев: Протоколда јазыбсыз ки, һәјәтјаны саһәјә вә бир дә зирзәмијә бахыш кечирилди. Бу нә демәкдир?
Шаһид : Зирзәмијә бахдыг. Бир дә һәјәтдә ајагјолу-зад варды. Һеч газанхананы ҝөрмәмишдим?
Һ.Ә.: «Бахдыг» дејирсиз, «бахыш кечирлди» јазыбсыз.
Шаһид: Ҝирдик бахдыг. Сонра га гәрара ҝөрә ахтарыш кечирдик.
Һ.Ә.: Икинҹи дәфә бахыш кечириләркән гәрарда «јашадығы ев вә диҝәр сахланҹ» јерләри јазылыб. Сиз исә мәһз газанханаја ҝирибсиз, евдә исә ахтарыш олмајыб.
Шаһид: Биринҹи дәфә бахышда газанханаја бахмамышдыг
Һ.Ә.: Бу сизин ишинизә минусду.
Дөвләт иттиһамчысы: Бәлкә әввәл силаһлар јох имиш, сонрадан гојулуб?
Һ.Ә.: Диҝәр мәсәлә одур ки, һал-шаһиди кими тәгдим етдијиниз Пироғланов Талеһин ады, сојады, јашадығы јер, һеч бир шеј протокола ујғун ҝәлмир.
Шаһид: Техники сәһв олуб да (?)
Анар Гасымлы: Видеочәкилиш олуб?
Шаһид: Јадымда дејил.
А.Г.: Неҹә олур, иттиһамын марағына оланлар там дәгигликлә јадындадыр, амма бу јох?
Шаһид:….
А.Г.: Гәрара ҝөрә евдә ахтарыш олмалы иди. Нијә кечирмәдиниз?
Шаһид: Әлимиздә дәгиг мәлумат вар иди.
А.Г.: Мәрдан Сәмәдовун евиндә бахыш олуб.
Шаһид: Бәли.
А.Г.: Ахы о дејир ки, ахтарыш олмады. Садәҹә дедиләр ки, биз билирик ки, бурда һеч нә јохдур.
Шаһид: Мән шәхсән олмушам.
А.Г.: Һал шаһидләри дә дејирләр ки, ахтарыш олмајыб
Шаһид: Нә билим. Јалан дејирләр.
А.Г.: Мәммәдрзајев барәдә нә ашкар еләдиниз?
Һаким: Биз ону конкрет епизод үзрә чағырмышыг. Вәсатәт верәрсиниз, бир дә дәвәт едәрик.
Анар Гасымлы: Мән инди вәсатәт верирәм. Хаһиш едирәм башга епизод үзрә суал вермәјә иҹазә верәсиниз.
Һаким гәбул едир.
Анар Гасымлы: Сизә ким иҹазә вериб ки, ев саһибинин, мәһкәмәнин изни олмадан онун евинә ҝирәсиниз.
Шаһид: Ганунун 445-ҹи маддәсинә ујғун олараг мәним буна ихтијарым вар.
А.Г.: Бәс нијә мәһкәмәјә мүраҹиәт едәрәк иҹазә алмадыныз?
Шаһид: Тәхирәсалынмаз һал олдуғуна ҝөрә.
А.Г.: 445-ҹи маддәдә гејд олунуб ки, әсасландырылмыш гәрар олмалыдыр. Бу әсасландырманы ҝөрмәк истәјирәм. Гој елан еләсин.
Һаким: Әҝәр әмәлијјат едән кимсә нәсә просесуал сәһвә јол верибсә, буна ҝөрә шаһид һаггында гәрар чыхармырыг.
ҺӘБИБ ӘЛИЈЕВ: “ПРОТОКОЛ ЕЛӘ «БӘЛКӘ» ИЛӘ ЈАЗЫЛЫБ”
Немәт Һејдәров: Һал-шаһиди Пироғлановун шәхсијјәтини нә илә мүәјјән етдиниз?
Шаһид: Сәнәди јанында дејилди. Саһә мүвәккили онун шәхсијјәтини тәсдигләди.
Н.Һ.: О дејиләнләрлә разылашмаға һүгугунуз вармы?
Шаһид: Бәли.
Н.Һ.: Дејирсиниз техники сәһв олуб. Бәлкә һеч о адам јохдур?
Һаким: Бәлкә илә суал вермәјин.
Һәбиб Әлијев: Протокол елә «бәлкә» илә јазылыб.
Мөвсүм Сәмәдов: Неҹә олур ки, мүхтәлиф јерләрдә, мүхтәлиф вахтларда әмәлијјатлар апарылыб, анҹаг һамысы стандарт 45 дәгигә чәкиб?
Вагиф Абдуллајев: Биз Азәрбајҹанын ән ләјагәтли өвладларынданыг. Сиз әдаләти мүдафиә етмәлисиниз. Ахы бу адам һеч бир суала нормал ҹаваб вермәди…
Сонра диҝәр шаһидләрин динләмәләри илә бағлы мәсәлә мүзакирәјә верилди. Вәкилләр вә тәгсирләндирилән шәхсләр бәзи шаһидләрин диндирилмәсини ваҹиб сајараг, диндирилмәсини тәләб етдиләр. Лакин јериндә едилән мүшавирәјә ҝөрә зәрури шаһид олмадығындан диндирилмә олмајаҹағыны билдирди, садәҹә чәкилән фотоларын ҹинајәт ишинә әлавә олунаҹағыны деди.
Бундан сонра експертиза рәјләринин нәтиҹәси охунду. Мөвсүм Сәмәдовун чыхышы олан диск сүбут кими ҝөстәрилди.
Анар Гасымлы: Бу диск орижинал дејил, монтаж олунуб. Истәсәниз интернет сајтларында вә мәндә бунун орижиналына баха биләрик. Чүнки монтаж нәтиҹәсиндә мәтн там контекстини итириб, сөзләр дә мәналарыны дәјишиб. Бунунла әлагәдар олараг вәсатәт верирәм.
Лакин мәһкәмә јериндә мүшавирә едәрәк гәрара ҝәлди ки, вәсатәт тәмин олунмасын.
Сон олараг истинтаг ишинин јекунлашмасы илә әлагәдар мәсәлә мүзакирәјә верилди. Вәкилләр бунун әлејһинә чыхдылар.
Немәт Һејдәров: Абдуллајев Вагиф барәдә әлејһинә бир нәфәр шаһид ифадә вермәди вә һеч бир сүбут арашдырылмады. Вәсатәт верирәм ки, Вагиф Абдуллајевлә әлагәдар сүбутлар ишдән хариҹ едилсин.
Һакимләр јерләриндә мүшавирә едәрәк гәрара ҝәлдиләр ки, Вагиф Абдуллајевин вәсатәти бахылмамыш галсын, истинтаг исә ишини јекунлашдырсын.
Нөвбәти мәһкәмә иҹласы сентјабрын 28 саат 10.00-а тәјин олунду.
Диггәт: Хәбәрдән истифадә етдикдә мәнбәјә истинад лазымдыр
