Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасынын президенти дејиб: АБШ һөкумәти 30 ил өнҹә дүнја халгларынын зеһниндә мәғлубедилмәз гүдрәт иди. Лакин бу ҝүн иш о јерә чатыб ки, һәтта өзүнүн ән кичик проблемини белә һәлл едә билмир вә дүнјада америкалы рәсмиләрдән ән зәифи вә ән тәдбирсизи јохдур.
Иран Ислам Республикасы президент апаратынын информасија порталынын мәлуматына ҝөрә, ИИР президенти Маһмуд Әһмәдинежад Нју-Јоркда АБШ-ын мүһарибәјә гаршы олан групларынын рәһбәрләри вә фәаллары илә ҝөрүшдә билдириб: Һәр бир идеја, мәктәб вә инсанын јерини ҝөрмәмәзлијә вуран вә јахуд ону зәифләдән иддиа шүбһәсиз бөјүк бир јаландыр.
Инсансифәт шејтанларын әлиндән инсанлығын хиласыны бүтүн бәшәријјәтин өнәмли вәзифәси адландыран Иран президенти дејиб: Бәзи инсансифәт шејтанлар капиталистләрин ҹибини долдурмаг үчүн вә онларын мәнафејинин тәмини истигамәтиндә мүхтәлиф өлкәләрә һүҹум едир, милјонларла инсаны гәтлә јетирир вә дидәрҝин салырлар.
Мәдәнијјәт вә сивилизасијалар арасында һеч бир нөв мүһарибәнин мөвҹуд олмадығыны вурғулајан Әһмәдинежад билдириб: Мәдәнијјәт вә сивилизасија инсанларын инсани тәләбләри просеси, али ҹилвәләри вә онларын әбәдијјәтидир. Бүтүн мәдәнијјәтләрдә инсани дәјәрләр хүсуси јерә маликдир вә бу ҝүн әслиндә мәдәнијјәтсизлик вә сивилизасијалығын инсани мәдәнијјәт вә сивилизасијаја гаршы мүһарибәсинин шаһидијик.
Һазырда дүнјада халгларын мүгавимәтин һәгигәтини горумаг үчүн чалышдыгларыны вә бир-бирләри илә мүһарибә вә дүшмәнчиликләрә малик олмадыгларыны бәјан едән Иран президенти сөјләјиб: Мүһарибә вә гаршыдурма јарадан шәхсләр өзләрини һамыдан үстүн һесаб едир вә өзләринин даһа артыг имтијаза саһиб олдугларыны дүшүнүрләр.
Шејтанын нәзарәтиндән инсанын хиласыны вә зоракылыглар гаршысында мүгавимәти
әдаләтсевәр инсанларын мүштәрәк вәзифәси адландыран Әһмәдинежад дејиб: Шејтанын заһирдә гүдрәтли вә мәғлубедилмәз олмасына бахмајараг, әслиндә шејтан вә шејтансифәтләр чох зәиф вә зәлилдирләр.
"Шејтана гәләбәнин лазыми мәсәләси будур ки, һамы әл-әлә верәрәк, кәрамәт вә сәадәт истигамәтиндә аддым атсын" -дејә Иран президенти билдириб.
30 ил өнҹә АБШ һөкумәтинин дүнја халгларынын зеһниндә мәғлубедилмәз гүдрәт олдуғуну, лакин һал-һазырда һәтта өзүнүн ән кичик проблемләрини белә һәлл едә билмәдијини бәјан едән Маһмуд Әһмәдинежад гејд едиб: Дүнјада Америк рәсмиләриндән ән зәифи вә ән тәдбирсизи јохдур. Белә ки, 60 илдән чохдур ки, Фәләстин мәсәләси үчүн мүнасиб һәлл јолу тапа билмәјибләр.
"Бир ҝүн Нилдән Фәрата гәдәр бүтүн әразиләрә нәзарәтдән сөз ачан сионистләр дә бу ҝүн ишғал олунмуш әразиләрдә өз әтрафларына бетон диварлар чәкирләр" -дејә Иран президенти билдириб.
Ҹәнаб Әһмәдинежад халгларын гәләбәсинин јахын олдуғуну гејд едәрәк дејиб: Бәшәријјәтин зеһнијјәти ислаһ олундугда вә әдаләт тәләби әтрафа јајылдыгда, мүтләг әдаләт ҝәләҹәк вә һамымыз инанырыг ки, Һәзрәт Иса (ә)-ла бирликдә бир шәхс әдаләти дүнјада рәһбәр едәҹәк. Буна ҝөрә дә әдаләтин бәргәрар олунмасы истигамәтиндә вар-ҝүҹүмүзлә чалышмалыјыг.
Мүһарибәјә гаршы олан групларын рәһбәрләриндән бир нечәси дә бу ҝөрүшүн әввәлиндә дүнјада сүлһ, стабиллик вә тәһлүкәсизлијин ҝенишләндирилмәси үчүн өз тәклиф вә бахышларыны президентлә пајлашыб.
Диггәт: Хәбәрдән истифадә етдикдә мәнбәјә истинад лазымдыр
