Әһли Бејт -АБНА- хәбәр аҝентлијинин вердији хәбәрә әсасән:
Бу ҝүн Азәрбајҹан Ислам Партијасынын (АИП) сәдри Мөвсүм Сәмәдов, партијанын Астара рајон комитәсинин сәдри Руфуллаһ Ахундзадә вә диҝәр һәбс олунанларын аилә үзвләри Президент Апаратына ҝәлибләр. Бу барәдә Хәбәр.Инфо хәбәр порталына Руфуллаһ Ахундзадәнин бөјүк гызы Нуранә Ахундзадә мәлумат вериб. Н.Ахундзадә билдириб ки, артыг үчүнҹү дәфәдир биз Президент Апаратына ҝәлирик: “Ҝүнаһсыз јерә һәбс олунанларын аиләләри илә бирликдә бундан өнҹә ики дәфә ҝәлиб сөзүмүзү өлкә башчысына чатдырмаға сәј ҝөстәрмишик. Амма әввәл дедиләр ки, бир һәфтәдән сонра ҝәлин. Сонра 10 ҝүн, даһа сонра бир ај вахт гојдулар. Биз президентлә ҝөрүшүб, сөзүмүзү она чатдырмаг истәјирик. Тәәссүфләр олсун ки, нәинки бизә бу шәраити јаратмырлар, әксинә өлкә башчысы илә халг арасында учуруму дәринләшдирирләр”.
“Бу дәфә дә сакитҹә ҝәлдик. Сорушдулар ки, нә лазымдыр? Дедик, президентлә ҝөрүш тәләб едирик. Бизи ичәри апардылар, бир гадын гәбул етди. Бизимлә чох кобуд рәфтар едиб, президентлә һеч заман ҝөрүшә билмәјәҹәјимизи деди. Биз дә бунун, һүгугумуз олдуғуну хатырлатдыг. Нәһајәт бизимлә һүндүрдән данышыб, полис чағырды” – дејән Н.Ахундзадә әлавә етди: “Полис ораны тәрк етмәјимизи тәләб едәндә, биз дә мүтләг ҝөрүшәҹәјимизи билдирдик. Сонра бизә гаршы зор ишләдәрәк, мәҹбури шәкилдә полис машынларына миндирмәјә ҹәһд ҝөстәрдиләр. Ону да дејим ки, бизим үстүмүзә бир нечә машын полис ҝәтирмишдиләр. Чох кобудлуг етдиләр, һәтта гуҹағымдакы једди ајлыг ушаға белә рәһм етмирдиләр”.
Н.Ахундзадә онлара гаршы едилән тәзјигләрә бахмајараг, һеч бир ҝүнаһы олмадан һәбс олунан атасы вә диҝәр мәһбусларын азад олунмаларыны тәләб едәҹәкләрини билдирди: “Биз ҝери чәкилмәјәҹәјик. Сон ана гәдәр мүбаризә апараҹағыг. Әминик ки, һәбс олунанларын һеч бир ҝүнаһы јохдур. Онлар дини әгидәләринә ҝөрә зинданлара салыныблар”.
Диггәт: Хәбәрдән истифадә етдикдә мәнбәјә истинад лазымдыр
