Әһли Бејт -АБНА- хәбәр аҝентлијинин вердији хәбәрә әсасән: Мәлум олдуғу кими, гәмәри ајларынын башланмасы вә гуртармасы Ајын ҝөрүнмәси илә мүәјјән едилир. "Ајын ҝөрүнмәси" дедикдә, бирҝүнлүк Ајын визуал (о ҹүмләдән, ириләшдирән ҹиһазларла) ҝөрүнмәси нәзәрдә тутулур. Лакин, бирҝүнлүк Ај чох назик олдуғундан вә булудлуг, сәманын тоз-торпагла тутулмасы кими амилләрин нәтиҹәсиндә, ону ҝөрмәк мүәјјән чәтинликләрлә мүшајиәт олунур. Бу сәбәбдән, гәмәри ајынын башланмасы вә гуртармасы һеч дә һәмишә өнҹәки ҝеҹәдә мәлум олмур. Бу мәсәлә, мүбарәк Рамазан ајында хүсуси актуаллыг кәсб едир. Белә ки, мүбарәк ајда мөмин вә мөминәләрин үзәриндә ваҹиби оруҹун тутулмасы вәзифәси мөвҹуд олдуғундан, ајын башланмасыны вә гуртармасыны билмәк чох әһәмијјәтлидир. Мүгәддәс динимиз, һәр мәсәләдә олдуғу кими, бу мөвзуда да дәгиг вәзифәләр мүәјјән етмишдир. Шәбан ајынын ахырынҹы ҝүнү - ајын 30-у, јахуд Рамазан ајынын әввәли - ајын 1-и олмасы мәлум олмајан ҝүндә үзрлү сәбәби олмајан мүкәлләфин вәзифәси - оруҹ тутмагдыр. Бу заман нијјәти Рамазан ајынын оруҹу кими тутмаг олмаз - чүнки, Рамазан ајынын дахил олмасы дәгиг мәлум дејилдир. Гәзасы олан - гәза нијјәтилә, гәзасы олмајан - киминсә гәзасы нијјәтилә, јахуд мүстәһәб оруҹ нијјәтилә һәмин ҝүндә оруҹ тутмалыдыр. Әҝәр ҝүн әрзиндә мүбарәк Рамазан ајынын дахил олмасы мәлум олса, садәҹә нијјәти дәјишмәк кифајәтдир. "Нијјәти дәјишмәк" дедикдә, һансыса сөзләри демәк ҝәрәк дејил. Садәҹә инсан мүәјјәнләшир ки, "тутдуғум оруҹ - артыг Рамазан ајынын оруҹудур", бу, кифајәт едир.
Бу ил августун 1-и - мәһз белә ҝүнләрдәндир. Бу саатадәк августун 1-нин Шәбан ајынын 30-у, јахуд Рамазан ајынын 1-и олмасы һәлә ки, мәлум дејил. Бу бахымдан, августун 1-дә јухарыда дејилән нијјәтләрдән (гәза, мүстәһәб) бири илә оруҹ тутмаг ваҹибдир. Әҝәр ҝүн әрзиндә мүбарәк ајын дахил олмасы мәлум олса, садәҹә, нијјәт Рамазан ајынын оруҹуна чеврилир.
Аллаһ Тәала ҹәми ибадәт вә итаәтләримизи гәбул етсин!
Диггәт: Хәбәрдән истифадә етдикдә мәнбәјә истинад лазымдыр
