Әһли Бејт -АБНА- хәбәр аҝентлијинин вердији хәбәрә әсасән: Республика Прокурорлуғу мәктәбләрин тикинтиси заманы јол верилән ганун позунтулары илә әлагәдар арашдырмалара башлајыб. Бу барәдә “АПА”ја Баш Прокурорлуғун мәтбуат хидмәтинин рәһбәри Елдар Султанов мәлумат вериб.
О, гејд едиб ки, сон дөврдә Бакы шәһәринин вә гәсәбәләрин сосиал-игтисади инкишафы мәгсәдилә дөвләт бүдҹәсиндән ајрылан вәсаит һесабына јени орта мәктәбләр тикилиб, көһнә мәктәб биналары әсаслы тәмир олунуб: “Лакин тәәссүф ки, бир сыра һалларда мәктәбләрин тикинтиси вә тәмири заманы суи-истифадә һалларына јол верилиб, стандартлара ујғун олмајан вә мөвҹуд нормаларын тәләбләри позулмагла тикинти ишләри апарылыб”.
Арашдырма заманы Хәзәр рајонунун 123 вә Сураханы рајонунун 85 сајлы мәктәбләринин тикинтиси заманы бир сыра ҹидди ганун позунтулары ашкар едилиб.
Е.Султанов гејд едиб ки, һазырда арашдырма давам етдирилир, гыса мүддәтдә јекунлашдырылараг вә бу барәдә иҹтимаијјәтә мәлумат верәҹәк.
Прокурорлуғун мәктәбләрин тикинтиси заманы јол верилән ганун позунтуларыны арашдырмасынын сәбәбләриндән бири дә баш прокурор Закир Гараловла тәһсил назири Мисир Мәрданов арасында мүнасибәтләрин ҝәрҝин олмасыдыр. Мисир Мәрданов баш прокурорун әмиси Заһид Гараловун дәрслик бизнесинә зәрбә ендирәндән сонра Закир Гаралов тәһсил назиринә гаршы һүҹума кечиб. Доғрудур, тәһсил саһәсиндә рүшвәт вә коррупсија фактлары мөвҹуддур, мәктәбләрин тикинтиси заманы да ганун позунтуларынын баш вермәси тәзә хәбәр дејил. Лакин мәсәлә бурасындадыр ки, һакимијјәт дахилиндә “нөгсанлара гаршы мүбаризә” бир гајда олараг групларарасы савашын тәркиб һиссәси олуб. Закир Гаралов да әмисинин бизнесинә әл гојулмасыны һәзм едә билмир. Јери ҝәлмишкән, Тәһсил Назирлијинин малијјә идарәсинин рәис мүавини Орхан Кәримовун һәбсинин дә Закир Гаралов-Мисир Мәрданов савашындан гајнагландығы билдирилирди.
Диггәт: Хәбәрдән истифадә етдикдә мәнбәјә истинад лазымдыр
