Әһли Бејт -АБНА- хәбәр аҝентлијинин вердији хәбәрә әсасән: Ислам Партијасынын лидери Мөвсүм Сәмәдов вә һәбс олунан диҝәр диндарларын истинтагы баша чатыб. Артыг иттиһам акты тәгсирләндирилән шәхсләрин вәкилләринә тәгдим олунуб, һәмчинин иш бахылмасы үчүн Бакы Ағыр Ҹинајәтләр Мәһкәмәсинә ҝөндәрилиб.
Хатырладаг ки, М.Сәмәдов, сүрүҹүсү Мирһүсејн Казымов, АИП тәшкилат шөбәсинин мүдири Вагиф Абдуллајев вә партија функсионери Елчин Һәсәнов бу илин јанварында тутулублар. Бундан башга, М.Сәмәдовун Губа рајонунда јашајан әмиси оғлу Дәјанәт Сәмәдов вә башга гоһуму Фирдовси Мәммәдрзајев дә һәбс олунуб.
Ејни заманда сонракы дөврдә АИП Астара рајон тәшкилатынын сәдри Руфулла Ахундзадә, Масаллынын Хыл кәндинин ахунду Фәрамиз Аббасов һәбс олунублар. АИП-чиләр Ҹинајәт Мәҹәлләсинин 28, 214.2.1-ҹи (габагҹадан әлбир олан бир груп шәхс, мүтәшәккил дәстә вә ја ҹинајәткар бирлик (ҹинајәткар тәшкилат) тәрәфиндән ҹинајәтә һазырлыг), 28, 214.2.3-ҹү (одлу силаһдан вә силаһ гисминдә истифадә олунан предметләрдән истифадә етмәклә ҹинајәтә һазырлыг), 228.3-ҹү (ганунсуз олараг одлу силаһ, онун комплект һиссәләрини, дөјүш сурсаты (јивсиз одлу ов силаһы вә һәмин силаһ үчүн дөјүш сурсаты истисна олмагла), партлајыҹы маддәләр вә гурғулар әлдә етмә, башгасына вермә, сатма, сахлама, дашыма вә ја ҝәздирмә), 278-ҹи (һакимијјәти зорла әлә кечирмә вә ја ону зорла сахлама) маддәләри илә иттиһам олунурлар.
Анҹаг АИП рәһбәрлији һәбсләрин сифаришли олдуғуну, бунун архасында дајанан әсл сәбәбин М.Сәмәдовун јанварын 2-дә партијанын топлантысында һакимијјәти тәнгид етмәсинин дајандығыны дејир. Гејд едәк ки, АИП һәбсләрә вә давам едән һиҹаб гадағасына етираз олараг аксија кечирмәјә тәшәббүс етсә дә, Бакы Шәһәр Иҹра Һакимијјәти мүхтәлиф бәһанәләрлә аксијалара иҹазә вермәјиб. Бу ҝүнләрдә Ислам Партијасы јенидән аксија кечирмәклә бағлы гәрар гәбул едиб. Бунунла бағлы һазырланан мүраҹиәтдә гејд олунур ки, ијулун 5-дә Бакынын “Улдуз” метро стансијасы јахынлығында, јахуд “Тәбриз” кинотеатрынын гаршысында аксија кечирилмәси планлашдырыр.
“Медиа форум” сајтына ачыгламасында АИП сәдри сәлаһијјәтләрини иҹра едән Елчин Манафов бу, мүраҹиәтин сајҹа үчүнҹү олдуғуну дејиб, ејни заманда БШИҺ-ин тәклиф едәҹәји диҝәр мәканларда аксија кечирә биләҹәкләрини дејиб: “Әсас одур ки, биз өз сөзүмүзү дејәк вә бу митинг иҹазәли олсун ки, кимсә зијан чәкмәсин”.
Ислам Партијасы сәдринин мүавини Ингилаб Әһәдли исә “Јени Мүсават”а билдирди ки, бир һәфтә әразиндә партија үзвләринин мәһкәмәси башлајаҹаг. И.Әһәдли мәһкәмәнин ачыг кечириләҹәјини вә АИП нүмајәндәләринин просеси изләјәҹәјини билдирди. АИП функсионери ијулун 5-дә кечирилмәси планлашдырылан митингин әсас шүарынын һәбс олунанларын азадлыгға бурахылмасы олаҹағыны гејд етди: “Митингин шүары дәјишмәјиб, Гарабағын вә ишғал алтындакы торпагларын азадлығы, исламафобијаја етираз, һиҹаб гадағасынын ләғв олунмасы вә һиҹаб гадағасына етиразлара ҝөрә һәбс олунан гардашларымызын азадлығы”.
И.Әһәдли өлкә башчысынын гәбулунда олмаг үчүн мүраҹиәт етдикләрини, анҹаг мүраҹиәтләринин нәтиҹәсиз олдуғуну билдирди: “Бизим президентлә ҝөрүш мүраҹиәтимизә ҹаваб олараг бизи Президент Админстрасијасынын шөбә мүдири Мүзәффәр мүәллимлә ҝөрүшдүрдүләр, јәни бунунла да президентин гәбулунда олмајаҹағымызы дедиләр. Бунунла да бизим мүраҹиәтимиз гәбул олунмады”.
КӘНАН
Диггәт: Хәбәрдән истифадә етдикдә мәнбәјә истинад лазымдыр
