Әһли Бејт -АБНА- хәбәр аҝентлијинин вердији хәбәрә әсасән: Неһрәм “Мүгавимәт Һәрәкаты” етираз аксијаларына башламағы планлашдырыр вә нөвбәти аксија даһа мүтәшәккил вә күтләви олаҹаг. Бу барәдә “Туран”ын бөлҝә мүхбиринә Һәрәкатын Тәшкилат Комитәсиндән билдирибләр.
ТК бу илин ијунунда кәнддә кечирилән илк етираз аксијасында галдырылан проблемләрә јерли һакимијјәтин һәлә дә лагејд мүнасибәт ҝөстәрмәсинин давам етдијини вурғулајыб.
Кәнддә вәзијјәт ҝәрҝин олараг галыр. Бу сәбәбдән дә гаршыдакы аксијанын ҝенишләнәрәк Бабәк рајонуну әһатә едәҹәји истисна дејил. Бунунла бағлы ТК үзвләри рајон әһалиси арасында иш апарырлар. Мүгавимәт Һәрәкаты бу мәсәлә илә бағлы бәјанат да јајыб.
Бәјанатда бир мүддәт әввәл Неһрәмдә кечирилән илк аксијадан сонра јерли һүгуг-мүһафизә органларынын Мүгавимәт Һәрәкатынын үзвләринә гаршы зоракылыглары вә Һәрәкатын сәдри Рзагулу Һәсәновун Нахчывандан мәҹбури депортасија едилмәси писләнилир. Р.Һәсәновун јенидән Нахчывана гајыдараг етираз аксијаларында иштирак едәҹәји, она гаршы төрәдилә биләҹәк һәр-һансы тәхрибата ҝөрә јерли һакимијјәтин мәсулијјәт дашыјаҹағы гејд едилир.
Һәрәкат илк аксијасыны Неһрәмдә мајын 31-дә кечириб. Аксијада кәнддә су чатышмазлығы, ишсизлик кими сосиал проблемләрлә јанашы, јерли һакимијјәт органлары тәрәфиндән кәнд әһалисинин шәрәф вә ләјагәтинин алчалдылмасы, инсан һаглары вә мүлкијјәт һүгугларынын позулмасы вә с. проблемләр галдырылыб.
Диггәт: Хәбәрдән истифадә етдикдә мәнбәјә истинад лазымдыр
