Әһли Бејт -АБНА- хәбәр аҝентлијинин вердији хәбәрә әсасән: ЈАП-чы депутат Сијавуш Новрузовун Милли Мәҹлисдә “Дини етигад азадлығы һаггында” Ганунун мүзакирәси заманы чыхыш едәркән ишләтдији бәзи фикирләрә елә онун һәмкарындан реаксија ҝәлиб. Гафгаз Мүсәлманлары Идарәсинин сәдри Шејх Аллаһшүкүр Пашазадәнин гардашы, депутат Ҹаваншир Пашазадә дин хадимләринин хүсуси ҝејиминин олмасыны тәклиф едәркән шејхин “бостанына даш атан” вә бир сыра диҝәр фикирләр сөјләјән һәмкарынын һаглы олмадығыны дејиб.
“Гафгазинфо”ја ачыгламасында о, ејни заманда әлавә едиб ки, С.Новрузовун кимәсә тохунмаг истәји илә бу чыхышы етдијини ҝүман етмир: “Гануна едилән дәјишиклик һансы чатышмазлыгларын олуб-олмадығыны ҝөстәрәҹәк. Ола билсин Сијавуш Новрузов о ганунлары јахшы билмир, бу сәбәбдән дә белә бир чыхыш едиб. Ганун да ондан ибарәдир ки, дини иҹмалар һесабаты дөвләтә дејил, өз коллективләриндә јаратдыглары дини шуралара верәҹәкләр”.
Ҹ.Пашазадә С.Новрузовун чыхышында дин хадимләринин Иран моллалары кими әммамә гојмасына етиразыны билдирмәсинә бу ҹүр реаксија вериб: “Мән инанмырам ки, Сијавуш Новрузов бу сөзләри хүсуси мәгсәдлә десин. Сијавуш мүәллим дә, медиа да, һәр кәс дә билмәлидир ки, әммамә тәкҹә Иранда дејил, бүтүн әрәб өлкәләриндә вар. Диндә форма анлајышы јохдур. Дүздүр, католикләрдә һәр ибадәтин өз ҝејими вар. Биздә исә белә бир гајда јохдур. Һәр ил Һәҹҹә нә гәдәр инсан ҝедир вә һеч бири дә әммамә гојмур. Бурадан да белә нәтиҹәјә ҝәлирик ки, диндә ҝејим формасы мүтләг дејил. Ҝөзәллик үчүн ҝејим сечмәк олар, лакин Исламда бу ҝејим мүтләг ҝејиниләҹәк дејә конкрет бир гајда јохдур. Бәли, Пејғәмбәримиз (с) башына әммамә гојуб вә дејибдир ки, бу мәним кәфәним олаҹаг. Буну да инсанлар сонрадан Пејғәмбәрә (с) һөрмәт әламәти олараг башларына гојублар. Ола биләр ки, Сијавуш мүәллим буну билмәсин, бу да тәбиидир”.
Ҹ.Пашазадә С.Новрузовун кечән ил нәзир гутулары барәдә дедикләрини дә хатырладыб. Анҹаг онун шејхлә мүнасибәтләриндә һансыса проблемин олмадығыны гејд едиб: “О, һәр заман шејхин һөрмәтини сахлајыб. Һәр кәсин бир фикри вар, о да өз фикрини бу ҹүр ифадә едиб. Бу һансыса елм саһәси дејил ки, һамынын дәгиг хәбәри олсун. Инди елә инсанлар вар ки, һәр шеј барәдә фикир билдирирләр. Амма факт одур ки, бир инсан һәр шеји билә билмәз, чүнки буна имканы чатмаз”.
Диггәт: Хәбәрдән истифадә етдикдә мәнбәјә истинад лазымдыр
