Әһли Бејт -АБНА- хәбәр аҝентлијинин вердији хәбәрә әсасән: “6 мај аксијасында һәбс олунанларын һамысы диндардыр. Араларында бир нәфәр илаһијјатчы вар. Бу бахымдан онларын дини мотив әсасында һәбс олундуғу бирмәналыдыр”. Вәкил Дилгәм Ағајев Гафгаз Мүсәлманлары Идарәси рәсмисинин Тәһсил Назирлији гаршысында кечирилмиш “Һиҹаба азадлыг” аксијасына ҝөрә һәбс олунанлар барәдә фикирләринә белә мүнасибәт билдириб.
Гафгаз Мүсәлманлары Идарәси мәтбуат хидмәтинин рәһбәри Рәһимә Дадашова “Мусават.ҹом”а ачыгламасында дејиб ки, 6 мај аксијасында һәбс олунанлар диндар олдуглары үчүн дејил, ганунлары поздугларына ҝөрә иттиһам олунурлар. Идарә сөзчүсү һәбс олунан диндарларын мүдафиәси илә бағлы һәр һансы мүраҹиәтин олмадығыны билдириб: “О инсанлар диндар олдуглары үчүн сахланылмајыблар. Ҝөрүнүр, һансыса ҹинајәт әмәлиндә иттиһам олунурлар. Онларла бағлы һәр һансы мүраҹиәтин олуб-олмадығыны дејә билмәрәм”.
“Медиа форум” сајтына данышан вәкил Дилгәм Ағајев Рәһимә Дадашованын ачыгламасына етираз билдириб: “Гафгаз Мүсәлманлары Идарәси һәбс олунанларын иттиһам олундуғу ҹинајәт маддәләри илә марагланса, мәнзәрә ајдын оларды. Нә бу идарә, нә Омбудсман Апараты, нә дә һүгуг мүдафиәчиләри бу шәхсләрлә марагланырлар, билмирләр ки, онлара гаршы һансы ишҝәнҹәләр верилиб. Һүгугларыны мүдафиә етдијим Тәрлан Исмајылов ишҝәнҹәләрә мәруз галыб. Гафгаз Мүсәлманлары Идарәси һакимијјәтин мөвгејиндән чыхыш едиб дејир ки, бу диндар шәхсләр ганун позублар. Бәс онларын һансы гануну поздуғуну ҝөстәрә биләрми? Буну сүбута јетирә биләрми? “Һиҹаба азадлыг” демәклә һансы ганун позулуб ки?
Әслиндә онлар конститусијада тәсбит олунмуш азад топлашма һүгугундан истифадә едибләр. Әҝәр һансыса гурума хәбәрдарлыг етмәдән аксијада иштирака ҹәһд едибләрсә, буну ҹәзасы белә ағыр олмамалы иди, бу гәдәр шәхсә иттиһам ирәли сүрүлмәмәли иди. Онларын һамысы ҝәнҹ шәхсләрдир. Әҝәр сабаһ онлара ҹәза верилсә, онлар мәһбуса чеврилсәләр, о ҝәнҹләр мәһв олма тәһлүкәси илә үз-үзә галаҹаг”.
Вәкил мүдафиә етдији шәхсин һүгугларынын бәрпасы үчүн бејнәлхалг тәшкилатлара, хариҹи өлкәләрин Азәрбајҹандакы дипөломатик нүмајәндәликләринә мүраҹиәт етдијини дејиб: “Ијунун 2-дә мән АБШ сәфирлијинин сијаси мәсәләләр үзрә мүшавири Бриҝет Бучетлә ҝөрүшдүм вә о, инсан һагларынын позулмасы факты олараг баш верәнләрин диггәтдә сахланылаҹағыны деди”.
Һиҹаб мәһбусу Ширхан Оруҹовун анасы Раиса Оруҹова мајын 8-дә дахили ишләр назири Рамил Усубова, Һејдәр Әлијев Фондунун президенти Меһрибан Әлијеваја телеграм вурдуғуну, Омбудсман Апараты рәһбәринин мүавини илә ҝөрүшдүјүнү билдириб: “Лакин идијә гәдәр онларын һеч бириндән хәбәр јохдур, һеч бир реаксија олмады. Омбудсман Апаратындан мәнә дедиләр ки, мајын 8-дә оғлумла ҝөрүшүбләр. Амма о вахт Ширхан Нәриманов Рајон Полис Идарәсиндә сахланылырды. Мәнә инди ондан хәбәр лазымдыр. Дүз бир ајдыр ки, Ширхан Күрдәханыдадыр (Бакы Истинтаг Тәҹридханасы - ред.). Онун вәзијјәти неҹәдир, нә јејир, нә ичир - хәбәрим јохдур”.
Раиса Оруҹова бир мүддәт өнҹә Гафгаз Мүсәлманлары Идарәсиндә дә олдуғуну дејиб: “Идарәдә билдирдиләр ки, шејх Өзбәкистанда сәфәрдәдир. Дедиләр ки, һәтта бурда олса белә, сәнә һеч бир көмәји дәјмәјәҹәк, наһаг јерә ҝөзләјиб вахт итирмә. Амма мәним оғлум да, диҝәрләри дә диндар, мөмин адамдырлар. Неҹә олур ки, бу идарә онлары мүдафиә еләмир? Ахы онлар аксијаја “һиҹаб” дејиб чыхыблар. Һиҹаб исә диндарларын һаггыдыр. Әҝәр гануну позубса, ҹәримәси нәдир, десинләр, өдәјәк. Даһа һәбс еләмәк, ајларла, бундан сонра билмирик, бәлкә илләрлә, һәбсдә сахламаг нәјә лазым?!”
Дини Етигад вә Виҹдан Азадлыгларыны Мүдафиә Мәркәзинин сәдри Илгар Ибраһимоғлу “Дејерлер.орҝ” сајтына ачыгламасында дејиб ки, ГМИ-нин ачыгламасы өлчүлүб-бичилмәмиш ачыгламадыр: “Гафгаз Мүсәлманлары Идарәсинин ишчиләри ән азындан заһирдә бу идарәнин рәһбәрлијинә хас политкорректлијә риајәт етсинләр. Диндарлыға ҝәлдикдә вә диндарлыға ҝөрә һәбс олунмаға ҝәлдикдә, бирмәналы олараг һиҹабы, јәни Аллаһын әмрини мүдафиәјә галхараг тутулан инсанлар елә диндарлыгларына ҝөрә тутулублар. Әҝәр мәтбуат хидмәтиндә бунунла бағлы чашгынлыг варса, ГМИ-нин рәһбәрлијиндән вә орада олан савадлы инсанлардан дәгигләшдирә биләрләр. Ән бөјүк мәнәви ҹинајәт Аллаһ јолунда тутулан инсанлары мүдафиә етмәмәкдир. Буну етмәјәнләр бары суссунлар!”
Диггәт: Хәбәрдән истифадә етдикдә мәнбәјә истинад лазымдыр
