Әһли Бејт -АБНА- хәбәр аҝентлијинин вердији хәбәрә әсасән: Вәкил Дилгәм Ағајев дејиб: “Һиҹаб аксијасына ҝөрә инзибати гајдада һәбс едиләнләрин әксәријјәти азад олунуб. Јалныз 12 вә 15 сутка һәбс ҹәзасы аланлар галыб. 15 сутка һәбс ҹәзасы алан илаһијјатчы Талеһ Бағыров барәсиндә Нәриманов Рајон Мәһкәмәсинин гәрарындан апеллјасија шикајәти вермишәм”.
Вәкил билдириб ки, Т.Бағыров Инзибати Хәталар Мәҹәлләсинин 296-ҹы (хырда хулиганлыг) маддәси илә ҝүнаһландырылыб лакин әслиндә исә бу садәҹә бир азад вәтәндашы шәрләмәкдир: “Биринҹи инстансијанын гәрары верилән ҝүндән 10 ҝүн әрзиндә апеллјасија шикајәти тәгдим едә биләрик вә артыг буну еләмишәм. Мәһкәмә ишин маһијјәтинә ујғун олмајан, ганунвериҹилијин тәләбиндә ҝөстәрилмәјән һаллара сөјкәниб гәрар вериб. Гәрар ҹәми ики ҹүмләдән ибарәтдир, шәхс барәсиндә нә ағырлашдырыҹы, нә јүнҝүлләшдириҹи һалын тәтбиг едилдији ҝөрүнүр, ејни заманда һәмин маддәнин санксијасында ҹәримә олдуғу һалда һакимин јалныз 15 сутканы сечмәси ганунвериҹилијә зиддир”.
Т.Бағыров Бингәди рајонундакы Инзибати Һәбс Олунанларын Сахланма Тәҹридханасында ҹәза чәкир.
“Һиҹаба азадлыг” аксијасы мајын 6-да Бакыда кечирилиб. Бу аксијаја ҝөрә Бакы Шәһәр Прокурорлуғунда Ҹинајәт Мәҹәлләсинин 221.2.2. (иҹтимаи гајданын горунмасы үзрә вәзифәни јеринә јетирән вә ја иҹтимаи гајданын позулмасынын гаршысыны алан һакимијјәт нүмајәндәсинә вә ја диҝәр шәхсә мүгавимәт ҝөстәрмәклә хулиганлыг) вә 221.3. (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) маддәләри илә иш ачылыб. Истинтаг групунун рәһбәри Бакы Шәһәр Баш Полис Идарәсинин истинтаг вә тәһгигат идарәсинин рәиси Назим Исмајыловдур.
Диггәт: Хәбәрдән истифадә етдикдә мәнбәјә истинад лазымдыр
