Әһли Бејт -АБНА- хәбәр аҝентлијинин вердији хәбәрә әсасән: “Гарабағда мүһарибәнин башламасы ан мәсәләсидир. Саваш һәр ан башлаја биләр. Азәрбајҹан тәрәфи бу мәсәләдә артыг чох гәрарлы ҝөрүнүр. Артыг мүвафиг һазырлыглар да башлајыб. Онсуз да илләрдир дөјүш һазырлығы вәзијјәти режиминдә олан ҹәбһәјаны һәрби һиссәләрин һамысы ҝүҹләндирилмиш вәзијјәтә ҝәтирилиб. Онлара 1 сајлы команда верилиб”. Бу мәлумат редаксијамыза мөтәбәр вә рәсми һәрби гајнаглардан дахил олуб. Өн хәтдә јерләшән һәрби һиссәләрдә баш верәнләри шәрһ едән гајнағымызын демәсинә ҝөрә, Мүдафиә Назирлијинин рәһбәрлији там һејәти илә мүһарибә һазырлыглары просесинә ҹәлб олунуб. “Ҝенералитет ајаг үстәдир. Әсҝәрин јанындадыр. Бу исә ордудакы мәнәви-психоложи дуруму јахшылашдырмаг мәгсәди дашыјыр”, - дејә гајнағымыз билдириб.
Хатырладаг ки, мүһарибә һазырлыглары истигамәтиндә конкрет аддымлар да атылыб. Әсас диггәт ҹәбһәнин гәрб истигамәтинә јетирилир. Бурадакы Н сајлы һәрби һиссә ҹәбһә хәттинә даһа јахын әразијә - километрләрлә габаға апарылыб. Һәмин јердәки диҝәр һәрби һиссә исә башга јерә чәкилмәјиб. Буна ҝүҹләндирмә дејилир. (Рајонларын вә һәрби һиссәләрин адлары вар, лакин дислокасија јерләрини биләрәкдән јазмырыг-ред.)
Мүһарибә һазырлыгларыны тәсдигләјән диҝәр мәлумат исә беләдир ки, дөјүш, сәнҝәр ҝөрмүш тәҹрүбәли забитләри јердәјишмә принсипи әсасында сәфәрбәр едиб өн ҹәбһәјә топлајырлар. Габаглар гајда белә иди ки, дөјүш бөлҝәсиндә хидмәт едән забитләр бир мүддәт сонра арха ҹәбһәјә хидмәтә езам олунур, онларын јеринә исә арха ҹәбһәдә хидмәтдә оланлар вә ҝәнҹ забитләр апарылырды ки, Милли Ордуда гуллуг кечән һәр бир һәрбчи, неҹә дејәрләр, сәнҝәрин јолуну танысын, барыт ијини дујсун, даһа бөјүк тәҹрүбә топласын. Инди исә белә дејил. Дөјүш бөлҝәсиндә хидмәт кечмиш забитләрин һеч бирини гејри-дөјүш бөлҝәсинә хидмәтә ҝөндәрмирләр. Арха ҹәбһәдә оланлары да өн хәттә топлајырлар.
Бу арада дөјүш бөлҝәсинә јахын шәһәрләрдәки вә пајтахтдакы һоспиталларын тәмири вә онларын аваданлыгларла тәҹһиз олунмасы барәдә дә мәхфи ҝөстәришләр верилдији барәдә мәлуматлар ҝәлир. Һоспиталларда јенидәнгурма апарылыр, онларын чарпајы тутуму артырылыр. Бундан әлавә, Силаһлы Гүввәләрин Баш Тибб Идарәсинин рәһбәрлијинә тапшырыг верилиб ки, һәрбчи-һәкимләрин учоту апарылсын, хүсусилә дә һоспиталларда, сәјјар шәраитдә ишләмәк практикасы олан ҹәрраһлара ишдән вә өлкәдән чыхмаг мәсәләсиндә мәһдудијјәтләр гојулсун. Әҝәр белә һал варса, бу һагда Баш Идарәјә мәлумат верилсин.
***
Бу мәлуматлары тәһлил едән бәзи експертләр исә һесаб едирләр ки, игтидар дүнјада вә Азәрбајҹанда ҝедән просесләрин индики мәрһәләсиндә һәрби әмәлијјатлара башламагла тамамилә фәргли бир мәгсәди дә һәдәфләјир. Бу да ондан ибарәтдир ки, һакимијјәт дүнјадакы ингилаби характерли просесләрин Азәрбајҹанда даһа бөјүк формада тәкрарланмасынын гаршысыны бу јолла ала биләр. Һәрби әмәлијјатлара башламаг, һәтта кичик уғурлара наил олмаг һакимијјәтин ҹәмијјәтдәки мөвгеләрини ҝүҹләндирмәклә јанашы, мүхалифәти дә фәалијјәт истигамәтләрини дәјишмәјә сөвг едә биләр.
Хатырладаг ки, Бејнәлхалг Бөһран Групунун Авропа програмлары үзрә директору Сабина Фрајзер дә бу һәфтә бәјанат вермишди ки, Азәрбајҹан гәфил һүҹумла Ағдам вә Фүзулини ҝери гајтармаға һазырлашыр. Мараглыдыр ки, һакимијјәт бу иддиалары тәкзиб етмир. Русија вә Гәрб мәтбуатында да һәрби әмәлијјатларын башлаја биләҹәјинә даир ҹидди тәһлилләр, мөтәбәр гајнаглара истинадән јазылар ҝетмәкдәдир.
Азәрбајҹан һакимијјәтинин сон ајларда ҹәбһә хәттиндәки һәрби һиссәләрдә һәјата кечирдији јердәјишмәләр бу һазырлыгларын ҹиддилији барәдә тәәссүратлары дәринләшдирир. Дөјүш тәҹрүбәси олан ҝенерал Рөвшән Әкбәровун Бакы корпусундакы ҝөрәвиндән алынараг өн хәтдәки һәрби һиссәјә (Шәмкир корпусуна) ҝөндәрилмәси дә бу мөвзуја даир ән ҹидди аргументләрдән бири һесаб олуна биләр.
***
Истәнилән һалда, бәлли олан будур ки, игтидар ҹидди шәкилдә һәрби әмәлијјатлара һазырлашыр вә бу просесә артыг старт верилиб. Бунун Азәрбајҹан үчүн һансы нәтиҹәләр верә биләҹәјини исә демәкдә чәтинлик чәкирик.
Диггәт: Хәбәрдән истифадә етдикдә мәнбәјә истинад лазымдыр
